ബഹ്‌റൈൻ അന്താരാഷ്ട്ര കാർഷിക പ്രദർശനം 'മറാഈ 2026' മികച്ച വിജയമെന്ന് ഹമദ് രാജാവ്

ഷീബ വിജയൻ

മനാമ: ബഹ്‌റൈൻ അന്താരാഷ്ട്ര കാർഷിക പ്രദർശനമായ 'മറാഈ 2026'-ന്റെ വിജയത്തെ പ്രശംസിച്ച് ബഹ്‌റൈൻ രാജാവ് ഹമദ് ബിൻ ഇസ അൽ ഖലീഫ. രാജ്യത്തിന്റെ പൈതൃകത്തെ കാർഷിക-മൃഗസംരക്ഷണ മേഖലകളിലെ ആധുനിക വളർച്ചയുമായി ബന്ധിപ്പിക്കുന്ന പ്രധാനപ്പെട്ട ദേശീയ വേദിയാണ് ഇതെന്നും അദ്ദേഹം വിശേഷിപ്പിച്ചു. മുനിസിപ്പാലിറ്റി കാര്യ കാർഷിക മന്ത്രി വെയ്ൽ ബിൻ നാസർ അൽ മുബാറക്, പ്രദർശനത്തിൽ പങ്കെടുക്കുന്ന വിവിധ സംഘങ്ങളുടെയും സാംസ്കാരിക ഗ്രൂപ്പുകളുടെയും പ്രതിനിധികൾ എന്നിവരെ രാജാവ് സ്വീകരിച്ചു.

'മറാഈ 2026' സംഘടിപ്പിക്കുന്ന പിക്കോ ഇന്റർനാഷണൽ (PICO International) കമ്പനിയുടെ ചീഫ് എക്സിക്യൂട്ടീവ് ഓഫീസർ ഖാലിദ് ജുമാൻ, റൂഹ് അൽ മഗ്രിബ് ഈക്വസ്ട്രിയൻ ആർട്സ് ടീം മേധാവി അബ്ദുസ്സദിക് അൽ ബഹ്ജൗയി എന്നിവരും പ്രതിനിധി സംഘത്തിലുണ്ടായിരുന്നു. അമാസിഗ് അഹ്വാഷ്, ത്‍ബൂരിഡ (ഫാന്റാസിയ) ട്രൂപ്പുകളിലെ അംഗങ്ങളും കൂടിക്കാഴ്ചയിൽ പങ്കെടുത്തിരുന്നു. രാജാവിന്റെ രക്ഷാകർതൃത്വത്തിൽ നടക്കുന്ന പ്രദർശനത്തിന്റെ ഉദ്ഘാടന വേളയിൽ ആശംസകൾ അർപ്പിക്കാനാണ് സംഘം രാജാവിനെ സന്ദർശിച്ചത്.

പ്രതിനിധി സംഘത്തെ സ്വാഗതം ചെയ്ത രാജാവ്, അന്താരാഷ്ട്ര പ്രദർശനം മികച്ച നിലവാരത്തിൽ ഒരുക്കുന്നതിനായി പ്രവർത്തിച്ച മുനിസിപ്പാലിറ്റി കാര്യ കാർഷിക മന്ത്രിയെയും മന്ത്രാലയ ടീമുകളെയും സംഘാടക സമിതികളെയും അഭിനന്ദിച്ചു. ബഹ്‌റൈന്റെ കാർഷിക-സാംസ്കാരിക പൈതൃകത്തെ കൃഷിയിലെയും മൃഗസംരക്ഷണത്തിലെയും ആധുനിക സാങ്കേതികവിദ്യകളുമായി സംയോജിപ്പിക്കുന്ന മുൻനിര ദേശീയ വേദിയായി 'മറാഈ' മാറിയിട്ടുണ്ടെന്ന് ഹമദ് രാജാവ് എടുത്തുപറഞ്ഞു. കർഷകർ, മൃഗസംരക്ഷകർ, വിദഗ്ധർ എന്നിവർക്ക് പരസ്പരം അറിവുകളും വൈദഗ്ധ്യവും കൈമാറുന്നതിനും നിക്ഷേപങ്ങൾക്കുള്ള അവസരങ്ങൾ സൃഷ്ടിക്കുന്നതിനും ഈ പ്രദർശനം സഹായകരമാകുമെന്നും അദ്ദേഹം ചൂണ്ടിക്കാട്ടി.

സംഘാടകർ, പങ്കെടുക്കുന്നവർ, പ്രദർശകർ, സ്പോൺസർമാർ തുടങ്ങി പ്രദർശനത്തിന്റെ വിജയത്തിനായി പ്രവർത്തിച്ച എല്ലാവർക്കും രാജാവ് നന്ദി രേഖപ്പെടുത്തി. ബഹ്‌റൈനിൽ നിന്നും മറ്റ് ജി.സി.സി രാജ്യങ്ങളിൽ നിന്നും നിരവധി സന്ദർശകരെ ആകർഷിക്കുന്ന ഈ പരിപാടിയിൽ ജനങ്ങൾ കാണിക്കുന്ന താൽപ്പര്യത്തെയും അദ്ദേഹം സ്വാഗതം ചെയ്തു. സുസ്ഥിര വികസനത്തെ പിന്തുണയ്ക്കുന്നതിലും ഭക്ഷ്യസുരക്ഷ ശക്തിപ്പെടുത്തുന്നതിലും പ്രാദേശിക ഉൽപ്പാദനം പ്രോത്സാഹിപ്പിക്കുന്നതിലും ഇത്തരം പ്രദർശനങ്ങൾ പ്രധാന പങ്കുവഹിക്കുന്നുണ്ടെന്ന് രാജാവ് വ്യക്തമാക്കി. പ്രാദേശികമായി ഉൽപ്പാദിപ്പിക്കുന്ന സാധനങ്ങളുടെ മത്സരക്ഷമത വർദ്ധിപ്പിക്കേണ്ടതിന്റെയും, ബഹ്‌റൈന്റെ കാർഷിക-മൃഗസംരക്ഷണ മേഖലകളുടെ തുടർച്ചയായ വളർച്ചയ്ക്ക് സംഭാവന നൽകുന്ന പദ്ധതികളെ പിന്തുണയ്ക്കേണ്ടതിന്റെയും പ്രാധാന്യവും അദ്ദേഹം എടുത്തുപറഞ്ഞു.