ഇ-മാലിന്യങ്ങൾക്കെതിരെ ബോധവൽക്കരണവുമായി ഇന്ത്യൻ സ്കൂൾ വിദ്യാർത്ഥികൾ

പ്രദീപ് പുറവങ്കര

മനാമ: പരിസ്ഥിതി സംരക്ഷണത്തിനും സുസ്ഥിര വികസനത്തിനുമുള്ള പ്രതിബദ്ധത ശക്തിപ്പെടുത്തുന്നതിന്റെ ഭാഗമായി ബഹ്‌റൈൻ ഇന്ത്യൻ സ്കൂൾ വിദ്യാർത്ഥികളുടെ നേതൃത്വത്തിൽ ഇ-മാലിന്യ (ഇലക്ട്രോണിക് മാലിന്യം) ബോധവൽക്കരണ ക്യാമ്പയിൻ സംഘടിപ്പിച്ചു. സ്കൂളിലെ 'ഇക്കോ-വാരിയേഴ്‌സ്' (Eco-Warriors) ക്ലബ്ബിന്റെ ആഭിമുഖ്യത്തിലായിരുന്നു പരിപാടി. ഇലക്ട്രോണിക് മാലിന്യങ്ങൾ കുറയ്ക്കുന്നതിന്റെയും ശാസ്ത്രീയമായ മാലിന്യ സംസ്‌കരണം പ്രോത്സാഹിപ്പിക്കുന്നതിന്റെയും പ്രാധാന്യം വിദ്യാർത്ഥികൾ ക്യാമ്പയിനിലൂടെ എടുത്തുപറഞ്ഞു.

പരിപാടിയുടെ ഭാഗമായി ഇക്കോ-വാരിയേഴ്‌സ് അംഗങ്ങൾ വിവിധ ക്ലാസ് മുറികളും സ്റ്റാഫ് റൂമുകളും സന്ദർശിച്ച് വിദ്യാർത്ഥികളുമായും അധ്യാപകരുമായും സംവദിച്ചു. ഇലക്ട്രോണിക് ഉപകരണങ്ങൾ അശാസ്ത്രീയമായി ഉപേക്ഷിക്കുന്നത് പരിസ്ഥിതിക്കും ആരോഗ്യത്തിനും ഏൽപ്പിക്കുന്ന ദോഷകരമായ പ്രത്യാഘാതങ്ങൾ അവർ വിശദീകരിച്ചു. യുനെസ്കോയുമായി അഫിലിയേറ്റ് ചെയ്ത സ്ഥാപനമെന്ന നിലയിൽ, പ്രായോഗിക പ്രവർത്തനങ്ങളിലൂടെ പരിസ്ഥിതി വിദ്യാഭ്യാസവും ഉത്തരവാദിത്തബോധവുമുള്ള ഒരു തലമുറയെ വാർത്തെടുക്കുന്നതിനാണ് സ്കൂൾ മുൻഗണന നൽകുന്നത്.

നാല് മുതൽ എട്ട് വരെയുള്ള ക്ലാസുകളിലെ വിദ്യാർത്ഥികളാണ് ക്യാമ്പയിനിൽ അണിനിരന്നത്. അധ്യാപികമാരായ ഹർഷലത അനിരുദ്ധൻ, പ്രിൻസി തുഷാർ, ദിവ്യ ഷിബിൻ ദാസ് എന്നിവർ വിദ്യാർത്ഥികൾക്ക് നേതൃത്വം നൽകി.

ഇ-മാലിന്യ നിർമ്മാർജ്ജനത്തിന് പുറമെ വൃക്ഷത്തൈ നടീൽ, പൂന്തോട്ടപരിപാലനം, പ്ലാസ്റ്റിക് വിമുക്ത ക്യാമ്പയിനുകൾ, മാലിന്യ വേർതിരിക്കലും പുനരുപയോഗവും, ജല-ഊർജ്ജ സംരക്ഷണം, കാമ്പസ് ശുചീകരണം, ജൈവവൈവിധ്യ സംരക്ഷണം തുടങ്ങി വിപുലമായ പരിസ്ഥിതി പ്രവർത്തനങ്ങളാണ് ഇക്കോ-വാരിയേഴ്‌സ് സംരംഭത്തിന് കീഴിൽ നടപ്പിലാക്കുന്നത്.

മാതൃകാപരമായ ഈ പ്രവർത്തനത്തിന് നേതൃത്വം നൽകിയ വിദ്യാർത്ഥികളെയും അധ്യാപകരെയും സ്കൂൾ ചെയർമാൻ അഡ്വ. ബിനു മണ്ണിൽ വറുഗീസ്, സെക്രട്ടറി വി. രാജപാണ്ഡ്യൻ, അസിസ്റ്റന്റ് സെക്രട്ടറിയും അക്കാദമിക അംഗവുമായ രഞ്ജിനി മോഹൻ, ഭരണസമിതി അംഗങ്ങൾ, പ്രിൻസിപ്പൽ ശാന്ത കുമാർ ദസരി എന്നിവർ അഭിനന്ദിച്ചു.