ലുലു ഗ്രൂപ്പ് ചെയർമാൻ യൂസഫലിയുമായി ബഹ്റൈൻ ധനകാര്യമന്ത്രി കൂടിക്കാഴ്ച നടത്തി
പ്രദീപ് പുറവങ്കര
മനാമ: ബഹ്റൈനിലെ ഭക്ഷ്യസുരക്ഷ, വിതരണ ശൃംഖലയുടെ കാര്യക്ഷമത, പ്രാദേശിക വിപണിയിൽ അവശ്യസാധനങ്ങളുടെ ലഭ്യത എന്നിവയുമായി ബന്ധപ്പെട്ട വിഷയങ്ങൾ ചർച്ച ചെയ്യുന്നതിനായി ധനകാര്യ, ദേശീയ സാമ്പത്തിക കാര്യ മന്ത്രി ശൈഖ് സൽമാൻ ബിൻ ഖലീഫ അൽ ഖലീഫ, ലുലു ഗ്രൂപ്പ് ചെയർമാൻ എം.എ. യൂസഫലിയുമായി കൂടിക്കാഴ്ച നടത്തി.
പ്രാദേശിക വിപണിയുടെ ആവശ്യങ്ങൾ നിറവേറ്റുന്നതിന് ഭക്ഷ്യസുരക്ഷ ഉറപ്പാക്കുന്നതിന്റെയും കാര്യക്ഷമമായ വിതരണ ശൃംഖല സ്ഥാപിക്കുന്നതിന്റെയും പ്രാധാന്യം ശൈഖ് സൽമാൻ എടുത്തുപറഞ്ഞു. ബഹ്റൈനിലെ റീട്ടെയിൽ മേഖലയിൽ ലുലു ഗ്രൂപ്പ് നടത്തുന്ന സജീവമായ സംഭാവനകളെയും ഉപഭോക്താക്കൾക്ക് ഭക്ഷ്യോൽപ്പന്നങ്ങളും മറ്റ് അവശ്യസാധനങ്ങളും ലഭ്യമാക്കുന്നതിൽ വഹിക്കുന്ന പങ്കിനെയും അദ്ദേഹം പ്രശംസിച്ചു.
രാജ്യത്തിന്റെ വികസന സംരംഭങ്ങളെ പിന്തുണയ്ക്കുന്നതിലും നിക്ഷേപ അവസരങ്ങൾ സൃഷ്ടിക്കുന്നതിലും സാമ്പത്തിക വളർച്ചയ്ക്ക് കരുത്തേകുന്നതിലും സ്വകാര്യ മേഖലയ്ക്കുള്ള പങ്കിനെ മന്ത്രി ഊന്നിപ്പറഞ്ഞു. ദേശീയ സാമ്പത്തിക രംഗത്തെ സംഭാവന കണക്കിലെടുത്ത് റീട്ടെയിൽ മേഖല ഉൾപ്പെടെയുള്ള പ്രധാന സാമ്പത്തിക മേഖലകൾക്ക് ആവശ്യമായ പിന്തുണയും അനുകൂല സാഹചര്യങ്ങളും നൽകാൻ ബഹ്റൈൻ പ്രതിജ്ഞാബദ്ധമാണെന്ന് അദ്ദേഹം വ്യക്തമാക്കി.
സ്വകാര്യ മേഖലയ്ക്ക് നൽകുന്ന പിന്തുണയ്ക്കും ബഹ്റൈന്റെ സാമ്പത്തിക വളർച്ചയിലെ പങ്കാളിത്തത്തിനും ധനകാര്യ, ദേശീയ സാമ്പത്തിക കാര്യ മന്ത്രിയോട് എം.എ. യൂസഫലി നന്ദി രേഖപ്പെടുത്തി. ബഹ്റൈനിലെ ഭക്ഷ്യസുരക്ഷാ സംവിധാനത്തെ പിന്തുണയ്ക്കുന്നതിലും അത് സുസ്ഥിരമായി നിലനിർത്തുന്നതിലും ലുലു ഗ്രൂപ്പിന്റെ പ്രതിജ്ഞാബദ്ധത അദ്ദേഹം ആവർത്തിച്ചു.
dsfsdf
