അർബുദബാധിതരായ കുട്ടികൾക്ക് കൈത്താങ്ങായി 'സ്മൈൽ ഇനീഷ്യേറ്റീവ്'; പുതിയ അധ്യയന വർഷത്തെ വരവേൽക്കാൻ സ്കൂൾ കിറ്റുകൾ നൽകി
പ്രദീപ് പുറവങ്കര
മനാമ: പുതിയ അധ്യയന വർഷത്തിന് തുടക്കം കുറിക്കുന്നതിനോടനുബന്ധിച്ച് അർബുദബാധിതരായ കുരുന്നുകൾക്ക് സന്തോഷവും പ്രതീക്ഷയും പകർന്ന് 'സ്മൈൽ ഇനീഷ്യേറ്റീവ്' സംഘടിപ്പിച്ച 'ബാക്ക് ടു സ്കൂൾ' പരിപാടി ശ്രദ്ധേയമായി. ബഹ്റൈനിലെ ഫ്യൂച്ചർ സൊസൈറ്റി ഫോർ യൂത്തിന്റെ കീഴിൽ കാൻസർ ബാധിതരായ കുട്ടികൾക്കും അവരുടെ കുടുംബങ്ങൾക്കും മാനസിക-സാമൂഹിക പിന്തുണ നൽകുന്ന സംരംഭമാണ് സ്മൈൽ ഇനീഷ്യേറ്റീവ്. കുട്ടികൾക്കായി സ്കൂൾ ബാഗുകളും മറ്റ് പഠനോപകരണങ്ങളും വിതരണം ചെയ്തതിനൊപ്പം വിവിധ വിനോദ പരിപാടികളും സംഘടിപ്പിച്ചു.
കുട്ടികളുടെ മാനസിക സന്തോഷത്തിനും രോഗമുക്തിയിലേക്കുള്ള യാത്രയിൽ അവർക്ക് ആത്മവിശ്വാസം നൽകുന്നതിനുമാണ് ഈ വാർഷിക പരിപാടി നടത്തുന്നതെന്ന് ഫ്യൂച്ചർ സൊസൈറ്റി ഫോർ യൂത്ത് ചെയർമാൻ സബാഹ് അൽ സയാനി പറഞ്ഞു. ചികിത്സയ്ക്കൊപ്പം കുട്ടികളുടെ പഠനം തടസ്സപ്പെടാതിരിക്കാൻ 'അബ്ജദ് എഡ്യൂക്കേഷൻ പ്രോഗ്രാമിലൂടെ' (Abjad Educational Programme) പ്രത്യേക അധ്യാപകരുടെ സേവനവും സ്മൈൽ ഇനീഷ്യേറ്റീവ് ലഭ്യമാക്കുന്നുണ്ട്.
ആഗോള അർബുദ ബോധവൽക്കരണ മാസമായ സെപ്റ്റംബറിന്റെ ഭാഗമായി സ്മൈൽ ഇനീഷ്യേറ്റീവ് നടത്തുന്ന വാർഷിക 'കിഡ്സ് ആർ ഗോൾഡ്' (Kids Are Gold) ക്യാമ്പയിൻ സെപ്റ്റംബർ 5-ന് ദി അവന്യൂസ് ബഹ്റൈനിൽ വെച്ച് ആരംഭിക്കും. രാവിലെ 8 മണിക്ക് ലുലു ഹൈപ്പർമാർക്കറ്റിന് മുന്നിൽ നിന്ന് ആരംഭിക്കുന്ന വാക്കത്തോണും ബോധവൽക്കരണ സ്റ്റാളും ഇതിന്റെ ഭാഗമായി ഒരുക്കും. കുട്ടികളിലെ കാൻസർ ലക്ഷണങ്ങളെക്കുറിച്ച് പൊതുജനങ്ങളിൽ അവബോധം വളർത്തുകയാണ് പദ്ധതിയുടെ ലക്ഷ്യം.
2012-ൽ പ്രവർത്തനം ആരംഭിച്ച സ്മൈൽ ഇനീഷ്യേറ്റീവിന് കമ്മ്യൂണിറ്റി കെയർ രംഗത്തെ മികച്ച പ്രവർത്തനങ്ങൾക്ക് അബുദാബിയിൽ വെച്ച് നടന്ന ശൈഖ ഫാത്തിമ പ്രോഗ്രാം ഫോർ എക്സലൻസ് അവാർഡും ലഭിച്ചിട്ടുണ്ട്.
aaa
