സ്വിമ്മിംഗ് പൂളുകൾക്ക് ചുറ്റുമുള്ള നനഞ്ഞ പ്രതലങ്ങൾ രോഗബാധയ്ക്ക് കാരണമാകാം: മുന്നറിയിപ്പുമായി ഡോ. കൗതർ അൽ ഈദ്

പ്രദീപ് പുറവങ്കര

മനാമ: കൃത്യമായി പരിപാലിക്കപ്പെടുന്ന സ്വിമ്മിംഗ് പൂളുകളിലെ വെള്ളത്തേക്കാൾ ഫംഗസ് ബാധയ്ക്കുള്ള സാധ്യത പൂളിന് ചുറ്റുമുള്ള നനഞ്ഞ പ്രതലങ്ങളിലും ചേഞ്ചിംഗ് റൂമുകളിലുമാണെന്ന് പൊതുജനാരോഗ്യ വിദഗ്ദ്ധ ഡോ. കൗതർ അൽ ഈദ് വ്യക്തമാക്കി. ശരിയായി അണുവിമുക്തമാക്കിയ പൂളിലെ വെള്ളത്തിൽ നിന്ന് ഫംഗസ് ബാധയുണ്ടാകാൻ സാധ്യത കുറവാണ്. എന്നാൽ പൂളിന് ചുറ്റുമുള്ള നനഞ്ഞ നിലങ്ങളിലൂടെ നഗ്നപാദരായി നടക്കുക, മറ്റുള്ളവരുടെ ടവലുകളും ചെരിപ്പുകളും ഉപയോഗിക്കുക, കാൽവിരലുകൾക്കിടയിൽ ദീർഘനേരം ഈർപ്പം നിലനിൽക്കുക എന്നിവ വഴിയാണ് അണുബാധ കൂടുതലായി പകരുന്നത്. വെള്ളത്തിലെ ക്ലോറിൻ, പി.എച്ച് (pH) അളവുകൾ കൃത്യമല്ലെങ്കിലോ, രോഗബാധിതരായ ആളുകൾ പൂളിൽ ഇറങ്ങിയാലോ രോഗസാധ്യത വർദ്ധിക്കും.

ചെവിയിൽ വെള്ളം കെട്ടിക്കിടന്നുണ്ടാകുന്ന ബാഹ്യ ചെവിയിലെ അണുബാധ, ചർമ്മത്തിലുണ്ടാകുന്ന ഫംഗസ് ബാധ, സൂഡോമോണസ് എയ്റുഗിനോസ (Pseudomonas aeruginosa) ബാക്ടീരിയ മൂലം ചർമ്മത്തിൽ ചുവന്ന പാടുകളുണ്ടാകുന്ന ഫോളിക്കുലൈറ്റിസ് (Folliculitis) എന്നിവയാണ് പൂളുകളുമായി ബന്ധപ്പെട്ട് സാധാരണയായി കണ്ടുവരുന്നത്. ക്ലോറിൻ അംശമോ ജലത്തിന്റെ ഗുണനിലവാരമില്ലായ്മയോ മൂലം കണ്ണുകളിൽ അസ്വസ്ഥതയും ഉണ്ടാകാം. കുളിക്കുന്നതിന് മുൻപ് ഷവർ ചെയ്യാതിരിക്കുക, വയറിളക്കമോ ചർമ്മ രോഗങ്ങളോ ഉള്ളപ്പോൾ പൂളിൽ ഇറങ്ങുക, വെള്ളം കുടിക്കുക, ശരീരം കൃത്യമായി തുടച്ച് ഉണക്കാതിരിക്കുക എന്നിവ അപകടസാധ്യത വർദ്ധിപ്പിക്കുന്നു. കുട്ടികളുടെ കാര്യത്തിൽ പ്രത്യേക ശ്രദ്ധ ആവശ്യമാണ്.

പൂളിൽ ഇറങ്ങുന്നതിന് മുൻപും ശേഷവും സോപ്പ് ഉപയോഗിച്ച് കുളിക്കുക, വാട്ടർ പ്രൂഫ് ചെരിപ്പുകൾ ധരിക്കുക, കാൽവിരലുകൾക്കിടയിലെ ഈർപ്പം പൂർണ്ണമായും തുടച്ചുമാറ്റുക എന്നിവയിലൂടെ അണുബാധ തടയാം. ടവലുകൾ പരസ്പരം മാറി ഉപയോഗിക്കരുത്. അസുഖമുള്ളപ്പോൾ പൂളിൽ ഇറങ്ങുന്നത് ഒഴിവാക്കണമെന്നും വെള്ളം കുടിക്കുന്നത് തടയണമെന്നും മുറിവുകളുണ്ടെങ്കിൽ വാട്ടർപ്രൂഫ് ബാൻഡേജുകൾ ഉപയോഗിക്കണമെന്നും അവർ കൂട്ടിച്ചേർത്തു.