ഓപ്പറേഷൻ സിന്ദൂർ ഡോക്യുമെന്ററി: അർധരാത്രിയിൽ കലിപ്പുമായി പാകിസ്ഥാൻ സൈന്യം
ഷീബ വിജയൻ
ന്യൂഡൽഹി: ഓപ്പറേഷൻ സിന്ദൂർ ഡോക്യുമെന്ററിയുമായി ബന്ധപ്പെട്ട് അസ്വസ്ഥത പ്രകടിപ്പിച്ച് പാകിസ്ഥാൻ സൈന്യം രംഗത്തെത്തി. ഓഗസ്റ്റ് 15-ന് ഡിസ്കവറിയിൽ സംപ്രേഷണം ചെയ്ത ഡോക്യുമെന്ററിയെ പാകിസ്ഥാൻ സൈനിക വക്താവ് ലെഫ്റ്റനന്റ് ജനറൽ അഹമ്മദ് ഷെരീഫ് 'ദുരന്തവും തമാശയും' എന്നാണ് വിശേഷിപ്പിച്ചത്. പുലർച്ചെ രണ്ട് മണിയോടെയാണ് ഇതുസംബന്ധിച്ച പ്രസ്താവന പുറത്തുവിട്ടത്.
ദേശീയ സുരക്ഷാ ഉപദേഷ്ടാവ് അജിത് ഡോവൽ ഉൾപ്പെടെയുള്ള ഇന്ത്യയുടെ ഉന്നത സൈനിക നേതൃത്വത്തിന്റെ പ്രതികരണം ഉൾപ്പെടുത്തിയ ഡോക്യുമെന്ററിക്ക് യാതൊരു ഗൗരവവുമില്ലെന്ന് പാക് സൈനിക വക്താവ് ആരോപിച്ചു. തിരഞ്ഞെടുത്ത അഭിമുഖങ്ങളും നാടകീയ ആഖ്യാനങ്ങളും ഉപയോഗിച്ച് യഥാർഥ സംഭവങ്ങളെ വളച്ചൊടിക്കുകയാണെന്ന് അദ്ദേഹം എക്സിലൂടെ ആരോപിച്ചു. കഴിഞ്ഞ വർഷം മേയ് 7-ന് നടന്ന ഭീകരാക്രമണത്തിന് മറുപടിയായാണ് 'ഓപ്പറേഷൻ സിന്ദൂർ' ആരംഭിച്ചത്. ഏപ്രിൽ 22-ന് പഹൽഗാമിലെ ബൈസരനിൽ നടന്ന ഭീകരാക്രമണത്തിൽ 26 വിനോദസഞ്ചാരികൾ കൊല്ലപ്പെട്ടിരുന്നു. പാകിസ്ഥാൻ ആസ്ഥാനമായി പ്രവർത്തിക്കുന്ന ലഷ്കർ-ഇ-തയ്ബയുടെ ഉപവിഭാഗമായ ദി റെസിസ്റ്റൻസ് ഫോഴ്സാണ് ആക്രമണത്തിന്റെ ഉത്തരവാദിത്തം ഏറ്റെടുത്തത്.
അതേസമയം, പാകിസ്ഥാൻ സൈന്യം തങ്ങളുടെ ഭാഗം ന്യായീകരിച്ചുകൊണ്ട്, ഓപ്പറേഷൻ സിന്ദൂർ പരാജയപ്പെട്ട സൈനിക നീക്കമാണെന്നും ഇന്ത്യ സംഭവങ്ങളെ തെറ്റായ രീതിയിൽ ചിത്രീകരിക്കാൻ ശ്രമിക്കുകയാണെന്നും അവകാശപ്പെട്ടു. ഏതെങ്കിലും തരത്തിലുള്ള സൈനിക അതിക്രമങ്ങൾ ഉണ്ടായാൽ ശക്തവും ഉചിതവുമായ തിരിച്ചടി നൽകാൻ പാകിസ്ഥാൻ സജ്ജമാണെന്നും സൈനിക വക്താവ് മുന്നറിയിപ്പ് നൽകി.
xcxcxcvx
