വേനൽക്കാല ഉച്ചവിശ്രമ നിയമം: തൊഴിൽ മന്ത്രാലയത്തിന്റെ നേതൃത്വത്തിൽ നിർമ്മാണ മേഖലകളിൽ മിന്നൽ പരിശോധന

പ്രദീപ് പുറവങ്കര

മനാമ: കഠിനമായ ചൂടിൽ നിന്ന് തൊഴിലാളികളുടെ ആരോഗ്യം സംരക്ഷിക്കുന്നതിനായി രാജ്യത്ത് നടപ്പിലാക്കിയ ഉച്ചവിശ്രമ നിയമം പാലിക്കുന്നുണ്ടെന്ന് ഉറപ്പുവരുത്താൻ തൊഴിൽ മന്ത്രിയും നിയമകാര്യ മന്ത്രിയുമായ യൂസുഫ് ബിൻ അബ്ദുൽഹുസൈൻ ഖലാഫ് വിവിധ നിർമ്മാണ മേഖലകളിൽ നേരിട്ടെത്തി പരിശോധന നടത്തി.

ജൂൺ 15 മുതൽ ഓഗസ്റ്റ് 31 വരെ ഉച്ചയ്ക്ക് 12:00 മണി മുതൽ വൈകിട്ട് 4:00 മണി വരെ തുറസ്സായ സ്ഥലങ്ങളിലും നേരിട്ട് വെയിൽ ഏൽക്കുന്ന ഇടങ്ങളിലും പുറംപണി വിലക്കിക്കൊണ്ട് പുറപ്പെടുവിച്ച മന്ത്രിതല തീരുമാനത്തിന്റെ നിർവ്വഹണം വിലയിരുത്താനായിരുന്നു മന്ത്രിയുടെ സന്ദർശനം.

പരിശോധന വേളയിൽ, നിർമ്മാണ സ്ഥലങ്ങളിൽ സ്വീകരിച്ചിട്ടുള്ള സുരക്ഷാ മുൻകരുതലുകൾ മന്ത്രി വിലയിരുത്തുകയും സുരക്ഷിതമായ ജോലി സാഹചര്യം ഉറപ്പാക്കുന്നത് സംബന്ധിച്ച് ഒക്യുപേഷണൽ സേഫ്റ്റി സൂപ്പർവൈസർമാരുമായി ചർച്ച നടത്തുകയും ചെയ്തു. വേനൽക്കാലത്ത് ജോലിസ്ഥലങ്ങളിലെ സുരക്ഷ ശക്തമാക്കുന്നതിലൂടെ തൊഴിൽപരമായ അപകടങ്ങളും ചൂട് മൂലമുണ്ടാകുന്ന അസ്വസ്ഥതകളും ലഘൂകരിക്കാനാകുമെന്ന് അദ്ദേഹം ചൂണ്ടിക്കാട്ടി.

നിയമം പാലിക്കുന്നതിൽ സ്വകാര്യ കമ്പനികൾ കാണിക്കുന്ന ഉയർന്ന പ്രതിബദ്ധതയെ മന്ത്രി ഖലാഫ് പ്രശംസിച്ചു. തൊഴിലാളികൾക്ക് സുരക്ഷിതവും ആരോഗ്യകരവുമായ തൊഴിൽ അന്തരീക്ഷം ഒരുക്കുന്നതിൽ തൊഴിലുടമകൾക്കുള്ള ഉത്തരവാദിത്തബോധമാണ് ഇത് വ്യക്തമാക്കുന്നത്. തൊഴിൽ സുരക്ഷയിലും ആരോഗ്യ നിലവാരത്തിലും ബഹ്‌റൈൻ പുലർത്തുന്ന ആത്മാർത്ഥതയുടെ തെളിവാണ് ഈ സഹകരണമെന്നും അദ്ദേഹം കൂട്ടിച്ചേർത്തു.

വിലക്ക് ഏർപ്പെടുത്തിയ സമയങ്ങളിൽ തൊഴിൽ മന്ത്രാലയത്തിന്റെ പ്രത്യേക പരിശോധനാ സംഘങ്ങൾ ദിവസേന കർശനമായ ഫീൽഡ് പരിശോധനകൾ തുടരുകയാണ്. തൊഴിലാളികൾക്ക് ആവശ്യത്തിന് കുടിവെള്ളം, വിശ്രമ സൗകര്യങ്ങൾ, മറ്റ് സുരക്ഷാ സംവിധാനങ്ങൾ എന്നിവ ലഭ്യമാണോയെന്ന് ഉദ്യോഗസ്ഥർ ഉറപ്പുവരുത്തുന്നുണ്ട്. നിയമലംഘനം നടത്തുന്ന സ്ഥാപനങ്ങൾക്കെതിരെ നിയമപരമായ തുടർനടപടികൾക്കായി ജുഡീഷ്യൽ അതോറിറ്റിക്ക് കൈമാറുമെന്നും മന്ത്രാലയം വ്യക്തമാക്കി.