സൽമാനിയ മെഡിക്കൽ കോംപ്ലക്സിൽ മരുന്ന് വിതരണത്തിന് റോബോട്ടുകൾ വരുന്നു
പ്രദീപ് പുറവങ്കര
മനാമ: ബഹ്റൈനിലെ പ്രമുഖ മെഡിക്കൽ കേന്ദ്രമായ സൽമാനിയ മെഡിക്കൽ കോംപ്ലക്സിൽ മരുന്ന് വിതരണവും സ്റ്റോക്ക് മാനേജ്മെന്റും കൂടുതൽ കാര്യക്ഷമമാക്കുന്നതിനായി നൂതന റോബോട്ടിക് സംവിധാനങ്ങൾ വരുന്നു. ഫാർമസി ഓട്ടോമേഷൻ പദ്ധതിയുടെ ഭാഗമായി ഔട്ട്പേഷ്യന്റ് ഫാർമസിയിൽ മരുന്നുകൾ നൽകാൻ റോബോട്ടുകളെയും, വാർഡുകളിൽ ഓട്ടോമേറ്റഡ് മെഡിസിൻ ഡിസ്പെൻസിംഗ് ക്യാബിനറ്റുകളും സജ്ജീകരിക്കും.
ആരോഗ്യ മേഖലയിലെ ഡിജിറ്റൽ മാറ്റങ്ങളുടെ പുരോഗതി വിലയിരുത്തുന്നതിനായി ആരോഗ്യ മന്ത്രി ഡോ. ജലീല ബിൻത് അൽ സയ്യിദ് ജവാദ് ഹസൻ പദ്ധതി പ്രദേശം സന്ദർശിച്ചു. ഗവൺമെന്റ് ഹോസ്പിറ്റൽസ് ചീഫ് എക്സിക്യൂട്ടീവ് ഓഫീസർ ഡോ. മറിയം അഥ്ബി അൽ ജലാഹ്മയും മറ്റ് ഉന്നത ഉദ്യോഗസ്ഥരും മന്ത്രിയോടൊപ്പമുണ്ടായിരുന്നു. ഏറ്റവും പുതിയ സാങ്കേതികവിദ്യകൾ പ്രയോജനപ്പെടുത്തി ആരോഗ്യ സേവനങ്ങൾ അന്താരാഷ്ട്ര നിലവാരത്തിലേക്ക് ഉയർത്തുന്നതിനായുള്ള പ്രവർത്തനങ്ങളെ മന്ത്രി അഭിനന്ദിച്ചു.
ഈ പദ്ധതി ആരോഗ്യ മേഖലയിൽ വലിയൊരു ഗുണപരമായ മാറ്റത്തിന് വഴിതെളിക്കുമെന്ന് ഡോ. മറിയം അൽ ജലാഹ്മ പറഞ്ഞു. മരുന്ന് വിതരണത്തിലെ വേഗതയും കാര്യക്ഷമതയും വർധിപ്പിക്കുന്നതിനൊപ്പം, ഇൻവെന്ററി മാനേജ്മെന്റ് കൂടുതൽ കൃത്യമാക്കാനും സാങ്കേതികവിദ്യ സഹായിക്കും. രോഗികളുടെ സുരക്ഷ ഉറപ്പാക്കുന്നതിനും ആശുപത്രി വിഭവങ്ങൾ പരമാവധി പ്രയോജനപ്പെടുത്തുന്നതിനും പദ്ധതി പ്രയോജനപ്പെടുമെന്ന് അവർ കൂട്ടിച്ചേർത്തു.
sdfsdf
