ലഹരിമരുന്ന് കടത്തിയ കേസ്: മൂന്ന് ഇന്ത്യക്കാർക്ക് ബഹ്റൈനിൽ 10 മുതൽ 15 വർഷം വരെ തടവും വൻ പിഴയും

പ്രദീപ് പുറവങ്കര

മനാമ: യുണൈറ്റഡ് കിംഗ്ഡം (UK), തായ്‌ലൻഡ് എന്നിവിടങ്ങളിൽ നിന്ന് പാർസൽ വഴി കഞ്ചാവും നിയന്ത്രണങ്ങളുള്ള സിബിഡി ഓയിലും ബഹ്റൈനിലേക്ക് കടത്തിയ കേസിൽ മൂന്ന് ഇന്ത്യൻ സ്വദേശികൾക്ക് കഠിന തടവും വൻ പിഴയും വിധിച്ച് ഹൈ ക്രിമിനൽ കോടതി. കേസിലെ ഒന്നാം പ്രതിയായ 23 കാരനായ ലേബർ തൊഴിലാളിക്ക് 15 വർഷം തടവും, മറ്റ് രണ്ട് പ്രതികളായ ഹെവി ട്രക്ക് ഡ്രൈവർക്കും ക്ലീനർക്കും 10 വർഷം വീതം തടവുമാണ് കോടതി വിധിച്ചത്.

ശിക്ഷിക്കപ്പെട്ട മൂന്ന് പ്രതികളും 10,000 ബഹ്റൈനി ദിനാർ (BD 10,000) വീതം പിഴയടക്കണമെന്നും കോടതി ഉത്തരവിട്ടിട്ടുണ്ട്. ഇവർ കടത്തിക്കൊണ്ടുവന്ന മയക്കുമരുന്ന് സാമഗ്രികൾ കണ്ടുകെട്ടാനും, ശിക്ഷാ കാലാവധി പൂർത്തിയാക്കിയ ശേഷം പ്രതികളെ രാജ്യത്തുനിന്ന് നാടുകടത്താനും ജഡ്ജി ഉത്തരവിട്ടു. ഒളിവിലുള്ള 'ഗുലാം' എന്ന് വിളിക്കുന്ന ഒരാളുടെ നിർദ്ദേശപ്രകാരമാണ് തങ്ങൾ പ്രവർത്തിച്ചതെന്ന് പ്രതികൾ സമ്മതിച്ചു. ഇയാളെ കണ്ടെത്താനുള്ള ശ്രമങ്ങൾ അധികൃതർ തുടരുകയാണ്.

കഴിഞ്ഞ സെപ്റ്റംബറിലാണ് യുകെയിൽ നിന്ന് എത്തിയ ആദ്യത്തെ പാർസൽ കസ്റ്റംസ് പരിശോധനയിൽ സംശയകരമായി കണ്ടെത്തിയത്. ഇതിൽ 2.1 കിലോഗ്രാം സിന്തറ്റിക് കഞ്ചാവ് അടങ്ങിയിരുന്നു. തുടർന്ന് നവംബറിൽ തായ്‌ലൻഡിൽ നിന്ന് 1.7 കിലോഗ്രാം കഞ്ചാവുമായി രണ്ടാമത്തെ പാർസലും എത്തി. രണ്ട് പാർസലുകളും ഒരേ പേരിൽ വന്നതായതിനാൽ ആന്റി നാർക്കോട്ടിക് ഡയറക്ടറേറ്റ് ഉദ്യോഗസ്ഥർ ഇവ തമ്മിലുള്ള ബന്ധം കണ്ടെത്തുകയായിരുന്നു.

ഡിസംബറിൽ ഈ പാർസലുകൾ കൈപ്പറ്റാനായി എത്തിയ ഒന്നാം പ്രതിയെ പോലീസ് വിജയകരമായി അറസ്റ്റ് ചെയ്തു. ചോദ്യം ചെയ്യലിൽ, ഈ പാർസലുകൾ വാങ്ങി മറ്റൊരാൾക്ക് കൈമാറുകയാണ് തന്റെ ചുമതലയെന്ന് ഇയാൾ വെളിപ്പെടുത്തി.

തുടർന്ന് പോലീസിന്റെ കർശന നിരീക്ഷണത്തിൽ ഒന്നാം പ്രതി ഫോൺ വഴി അടുത്ത കണ്ണിയായ 34 കാരനായ ഹെവി വെഹിക്കിൾ ഡ്രൈവറെ ബന്ധപ്പെട്ടു. പാർസൽ വാങ്ങാൻ ഡ്രൈവർ ഒന്നാം പ്രതിയുടെ താമസസ്ഥലത്ത് എത്തിയപ്പോൾ പോലീസ് ഇയാളെയും പിടികൂടി. ഇയാളും ഗുലാമിന് വേണ്ടിയാണ് ജോലി ചെയ്യുന്നതെന്ന് സമ്മതിച്ചു. വെസ്റ്റ് ഏക്കറിലെ (West Eker) ഒരു രഹസ്യ കേന്ദ്രത്തിൽ (Dead drop location) പാർസൽ എത്തിക്കാനായിരുന്നു ഇയാൾക്ക് ലഭിച്ച നിർദ്ദേശം.

പോലീസ് തന്ത്രപരമായി ഈ സ്ഥലത്ത് കെണിയൊരുക്കുകയും, അവിടെ പാർസൽ വാങ്ങാൻ എത്തിയ മൂന്നാമത്തെ പ്രതിയായ 23 കാരനായ ക്ലീനറെ സംഭവസ്ഥലത്തുനിന്ന് തന്നെ അറസ്റ്റ് ചെയ്യുകയും ചെയ്തു. മയക്കുമരുന്ന് കടത്തിന് പുറമെ, മോർഫിൻ, മെത്താംഫെറ്റാമൈൻ (ഷാബു) എന്നീ നിരോധിത ലഹരിവസ്തുക്കൾ കൈവശം വെച്ചതിനും പ്രതികൾ കുറ്റക്കാരാണെന്ന് കോടതി കണ്ടെത്തി.