കുട്ടിയെ മാതാവിന് വിട്ടുനൽകാൻ വിസമ്മതിച്ചു: ബഹ്റൈൻ സ്വദേശി റിമാൻഡിൽ
പ്രദീപ് പുറവങ്കര
മനാമ: കോടതി ഉത്തരവ് നിലവിലുണ്ടായിട്ടും ഏകദേശം ഒരു വർഷത്തോളമായി കുട്ടിയെ മാതാവിന് വിട്ടുനൽകാൻ വിസമ്മതിച്ച ബഹ്റൈൻ സ്വദേശിയെ റിമാൻഡ് ചെയ്തതായി പബ്ലിക് പ്രോസിക്യൂഷൻ അറിയിച്ചു. ഈസ ടൗൺ പോലീസ് സ്റ്റേഷനിൽ നിന്ന് ലഭിച്ച പരാതിയുടെ അടിസ്ഥാനത്തിലാണ് ഫാമിലി ആൻഡ് ചൈൽഡ് പ്രോസിക്യൂഷൻ നടപടി സ്വീകരിച്ചത്. കുട്ടിയുടെ കസ്റ്റഡി സംബന്ധിച്ച അന്തിമ വിധി ആവർത്തിച്ച് ലംഘിച്ചതിനാണ് ഇയാൾക്കെതിരെ കേസെടുത്തത്.
കുട്ടിക്ക് മാതാവിനൊപ്പം താമസിക്കാൻ താൽപ്പര്യമില്ലെന്ന വാദമാണ് പ്രതി ഉന്നയിച്ചത്. എന്നാൽ, മാതാവ് നൽകിയ പരാതികളെത്തുടർന്ന് നടത്തിയ അന്വേഷണത്തിൽ പ്രതി കോടതി വിധി മനഃപൂർവ്വം നടപ്പാക്കാതിരുന്നതാണെന്ന് വ്യക്തമായി. ചോദ്യം ചെയ്യലിൽ കുറ്റസമ്മതം നടത്തിയതിനെത്തുടർന്ന് ഇയാളെ വിചാരണയ്ക്ക് മുന്നോടിയായി തടങ്കലിലാക്കാൻ പ്രോസിക്യൂഷൻ ഉത്തരവിട്ടു. സോഷ്യൽ റിസർച്ച് ഡിപ്പാർട്ട്മെന്റ് നടത്തിയ പരിശോധനയിൽ കോടതി വിധി നടപ്പിലാക്കുന്നതിന് തടസ്സങ്ങളൊന്നുമില്ലെന്നും കണ്ടെത്തി.
സോഷ്യൽ ഡെവലപ്മെന്റ് മന്ത്രാലയവുമായി ഏകോപിപ്പിച്ച് കോടതി ഉത്തരവ് ഉടനടി നടപ്പിലാക്കാൻ പ്രോസിക്യൂഷൻ നിർദ്ദേശം നൽകി. കുട്ടിക്കും കുടുംബത്തിനും ആവശ്യമായ സാമൂഹികവും മാനസികവുമായ പിന്തുണ നൽകുന്നതിനായി പ്രത്യേക സർക്കാർ സഹായ പദ്ധതിയിൽ ഇവരെ ഉൾപ്പെടുത്തിയിട്ടുണ്ട്. കുട്ടികളുടെ കസ്റ്റഡി, സന്ദർശന അനുമതി എന്നിവയുമായി ബന്ധപ്പെട്ട കോടതി വിധികൾ പാലിക്കാൻ എല്ലാവരും ബാധ്യസ്ഥരാണെന്നും നിയമലംഘനം നടത്തുന്നവർ കർശനമായ നിയമനടപടികൾ നേരിടേണ്ടി വരുമെന്നും അധികൃതർ മുന്നറിയിപ്പ് നൽകി.
f
