ഇറാൻ ആക്രമണം: പ്രതിരോധ നടപടികൾ വിലയിരുത്തി ബഹ്റൈൻ കോർഡിനേഷൻ കമ്മിറ്റി
പ്രദീപ് പുറവങ്കര I ബഹ്റൈൻ
മനാമ: ബഹ്റൈൻ കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫയുടെ അധ്യക്ഷതയിൽ 527-ാമത് കോർഡിനേഷൻ കമ്മിറ്റി യോഗം ചേർന്നു. വീഡിയോ കോൺഫറൻസ് വഴി നടന്ന യോഗത്തിൽ രാജ്യത്തിന്റെ സുരക്ഷയും സാമ്പത്തിക പരിഷ്കരണങ്ങളുമാണ് പ്രധാനമായും ചർച്ച ചെയ്തത്.
ബഹ്റൈന് നേരെ ഇറാൻ നടത്തുന്ന ശത്രുതാപരമായ ആക്രമണങ്ങളെ പ്രതിരോധിക്കുന്നതിനായി നടപ്പിലാക്കി വരുന്ന മുൻകരുതൽ പദ്ധതികളും നടപടികളും കമ്മിറ്റി വിശദമായി വിലയിരുത്തി. ആക്രമണങ്ങൾ മൂലമുണ്ടാകുന്ന പ്രത്യാഘാതങ്ങൾ നേരിടാൻ രാജ്യം സ്വീകരിച്ചിട്ടുള്ള സജ്ജീകരണങ്ങളിൽ യോഗം സംതൃപ്തി രേഖപ്പെടുത്തി. ഏത് സാഹചര്യത്തെയും നേരിടാൻ ഭരണകൂടം സന്നദ്ധമാണെന്നും യോഗം വ്യക്തമാക്കി.
സുരക്ഷാ കാര്യങ്ങൾക്ക് പുറമെ, രാജ്യത്തെ തൊഴിൽ വിപണി ക്രമീകരിക്കുന്നതിനുള്ള നടപടിക്രമങ്ങൾ വികസിപ്പിക്കുന്നതുമായി ബന്ധപ്പെട്ട നിർദ്ദേശങ്ങളും യോഗം ചർച്ച ചെയ്തു. നിലവിൽ കമ്മിറ്റിയുടെ പരിഗണനയിലുള്ള വിവിധ കരട് നിയമങ്ങളുടെ പുരോഗതിയും യോഗം വിലയിരുത്തി. രാജ്യത്തിന്റെ സുരക്ഷയ്ക്കും സാമ്പത്തിക വളർച്ചയ്ക്കും മുൻഗണന നൽകുന്ന തീരുമാനങ്ങളാണ് യോഗത്തിലുണ്ടായത്.
eeretry
