വളർത്തുമകളെ പെൺവാണിഭത്തിന് ഇരയാക്കി; പ്രവാസി വനിതയ്ക്ക് ബഹ്റൈനിൽ തടവും നാടുകടത്തലും
പ്രദീപ് പുറവങ്കര I ബഹ്റൈൻ
മനാമ: കുടുംബത്തിലെ സാമ്പത്തിക പ്രതിസന്ധി മറികടക്കാൻ പതിനേഴുകാരിയായ വളർത്തുമകളെ നിർബന്ധിച്ച് അനാശാസ്യ പ്രവർത്തനങ്ങൾക്ക് ഇരയാക്കിയ കേസിൽ മുപ്പത്തിയെട്ടുകാരിയായ പാകിസ്താൻ സ്വദേശിനിക്ക് ബഹ്റൈൻ ഹൈ ക്രിമിനൽ കോടതി മൂന്ന് വർഷം തടവുശിക്ഷ വിധിച്ചു. ശിക്ഷാ കാലാവധി പൂർത്തിയാക്കിയ ശേഷം ഇവരെ രാജ്യത്തുനിന്ന് നാടുകടത്താനും കോടതി ഉത്തരവിട്ടു. തടവ് ശിക്ഷയ്ക്ക് പുറമെ രണ്ടായിരം ദിനാർ പിഴയൊടുക്കാനും പെൺകുട്ടിയെ നാട്ടിലേക്ക് തിരികെ അയക്കുന്നതിനുള്ള ചെലവുകൾ പ്രതി തന്നെ വഹിക്കണമെന്നും കോടതി നിർദ്ദേശിച്ചു. പ്രായപൂർത്തിയാകാത്ത പെൺകുട്ടിയെ ക്രൂരമായി ചൂഷണം ചെയ്തതിനും അനാശാസ്യ പ്രവർത്തനങ്ങൾക്ക് പ്രേരിപ്പിക്കുകയും സഹായിക്കുകയും ചെയ്തതിനുമാണ് ഈ കർശന നടപടി.
പെൺകുട്ടിയെ പാകിസ്താനിൽ നിന്ന് ബഹ്റൈനിൽ എത്തിച്ചത് തന്നെ ഈ ലക്ഷ്യത്തോടെയായിരുന്നുവെന്ന് കോടതി കണ്ടെത്തിയിട്ടുണ്ട്. സോഷ്യൽ മീഡിയ വഴി ഇടപാടുകാരെ കണ്ടെത്തിയിരുന്ന പ്രതി, ഓരോ ദിവസവും ഏഴ് പേരെ വരെ പെൺകുട്ടിയുടെ അടുത്തെത്തിച്ചിരുന്നതായി പ്രോസിക്യൂഷൻ ചോദ്യം ചെയ്യലിൽ സമ്മതിച്ചു. ഇതിലൂടെ ലഭിക്കുന്ന പണം മുഴുവൻ പ്രതി തന്നെയാണ് കൈപ്പറ്റിയിരുന്നത്. കുടുംബത്തിലെ കടുത്ത സാമ്പത്തിക ബുദ്ധിമുട്ട് മുതലെടുത്താണ് പ്രതി പെൺകുട്ടിയെ ഈ ക്രൂരതയിലേക്ക് തള്ളിവിട്ടത്. കുടുംബത്തെ സഹായിക്കാൻ താൻ ഇതിന് സമ്മതിക്കുകയായിരുന്നു എന്ന് പെൺകുട്ടി മൊഴി നൽകിയെങ്കിലും, പ്രായപൂർത്തിയാകാത്ത വ്യക്തിയായതിനാൽ ഇത്തരം സമ്മതങ്ങൾക്ക് നിയമസാധുതയില്ലെന്ന് കോടതി വ്യക്തമാക്കി.
ബഹ്റൈനിലെ രണ്ട് ഹോട്ടലുകളിലായി താമസിപ്പിച്ചാണ് പെൺകുട്ടിയെക്കൊണ്ട് അനാശാസ്യ പ്രവർത്തനങ്ങൾ ചെയ്യിപ്പിച്ചിരുന്നത്. ഓരോ ഇടപാടുകാരനിൽ നിന്നും പത്ത് മുതൽ ഇരുപത് വരെ ദിനാറാണ് ഇവർ ഈടാക്കിയിരുന്നത്. പെൺകുട്ടിയുടെ പിതാവിനെപ്പോലും ഈ ക്രൂരതയ്ക്ക് കൂട്ടുനിൽക്കാൻ പ്രതി പ്രേരിപ്പിച്ചതായി കോടതി രേഖകൾ സൂചിപ്പിക്കുന്നു. മനുഷ്യത്വം മരവിച്ച ഇത്തരം കുറ്റകൃത്യങ്ങൾ സമൂഹത്തിന് വലിയ ഭീഷണിയാണെന്നും പ്രതിക്ക് അർഹമായ ശിക്ഷ നൽകി നീതി നടപ്പിലാക്കണമെന്നും പ്രോസിക്യൂട്ടർ കോടതിയിൽ വാദിച്ചു. സദാചാര മൂല്യങ്ങൾ ലംഘിച്ചുള്ള പ്രതിയുടെ നീക്കത്തിനെതിരെ രൂക്ഷമായ ഭാഷയിലാണ് കോടതി പ്രതികരിച്ചത്.
sdfdsfs
