ഓൺലൈൻ ഇടപാടുകൾക്ക് സുരക്ഷ ശക്തമാക്കുന്നു; ബാങ്കിംഗ് തട്ടിപ്പുകൾ തടയാൻ കർശന നടപടികളുമായി സർക്കാർ
പ്രദീപ് പുറവങ്കര I ബഹ്റൈൻ:
ബഹ്റൈനിലെ ഓൺലൈൻ സാമ്പത്തിക ഇടപാടുകൾ കൂടുതൽ സുരക്ഷിതമാക്കുന്നതിനായി കർശനമായ നിരീക്ഷണവും സുരക്ഷാ മാനദണ്ഡങ്ങളും നടപ്പിലാക്കിവരികയാണെന്ന് പാർലമെന്ററി കാര്യ മന്ത്രി ഘാനിം അൽ ബുഐനൈൻ വ്യക്തമാക്കി. ഡിജിറ്റൽ ബാങ്കിംഗ് മേഖലയിലെ പുതിയ വെല്ലുവിളികൾ നേരിടുന്നതിനായി ബാങ്കുകളും ധനകാര്യ സ്ഥാപനങ്ങളും ഒടിപി (OTP) വഴിയുള്ള പരിശോധനയും ക്രെഡിറ്റ് ലിമിറ്റുകളും നിർബന്ധമാക്കണമെന്ന പാർലമെന്റ് നിർദ്ദേശം ഗവൺമെന്റ് നിലവിൽ പഠിച്ചുവരികയാണ്. സെൻട്രൽ ബാങ്ക് ഓഫ് ബഹ്റൈൻ (CBB) നിലവിൽ തന്നെ രാജ്യത്തെ ഇടപാടുകൾക്ക് ഒടിപി ഉൾപ്പെടെയുള്ള സുരക്ഷാ മാനദണ്ഡങ്ങൾ നിർബന്ധമാക്കിയിട്ടുണ്ടെങ്കിലും വിദേശ കമ്പനികളുമായുള്ള ഇടപാടുകളിലെ വെല്ലുവിളികൾ പരിഹരിക്കാനുള്ള ശ്രമങ്ങൾ തുടരുകയാണ്. ഉപഭോക്താക്കളുടെ വിവരങ്ങളുടെ രഹസ്യാത്മകത ഉറപ്പാക്കുന്നതിനൊപ്പം ബയോമെട്രിക് തിരിച്ചറിയൽ, മൾട്ടി-ഫാക്ടർ ഓതന്റിക്കേഷൻ, സംശയാസ്പദമായ ഇടപാടുകൾ കണ്ടെത്താനുള്ള സംവിധാനങ്ങൾ എന്നിവ വഴി തട്ടിപ്പുകൾ തടയാനാണ് ലക്ഷ്യമിടുന്നത്.
അതേസമയം ഉപഭോക്തൃ സംരക്ഷണ നിയമം ലംഘിക്കുന്നവരുടെ സർക്കാർ സേവനങ്ങൾ തടയണമെന്ന പാർലമെന്റ് നിർദ്ദേശം സർക്കാർ തള്ളിയതായും മന്ത്രി അറിയിച്ചു. കുറ്റം തെളിയുന്നതിന് മുൻപ് സേവനങ്ങൾ നിഷേധിക്കുന്നത് നീതിയല്ലെന്നും നിലവിലെ നിയമപ്രകാരം പിഴയും സ്ഥാപനങ്ങൾ അടച്ചുപൂട്ടുന്നതും അടക്കമുള്ള കർശന നടപടികൾ നിലവിലുണ്ടെന്നും അദ്ദേഹം ചൂണ്ടിക്കാട്ടി.
sds
