"വിന്ധ്യാവലി" അരങ്ങിലേക്ക്; ശ്വേത മേനോൻ മുഖ്യാതിഥി
പ്രദീപ് പുറവങ്കര
മനാമ l ബഹ്‌റൈൻ കേരളീയ സമാജത്തിന്റെ ഓണാഘോഷമായ 'ശ്രാവണ'ത്തിന്റെ ഭാഗമായി മഹാബലിയുടെ പത്‌നി വിന്ധ്യാവലിയെ കേന്ദ്രകഥാപാത്രമാക്കി വനിതാ വേദി ഒരുക്കുന്ന നൃത്ത-സംഗീത നാടകം "വിന്ധ്യാവലി" അരങ്ങിലെത്തുന്നു. താരസംഘടനയായ അമ്മയുടെ പ്രഥമ വനിതാ പ്രസിഡന്റും നടിയുമായ ശ്വേത മേനോൻ പരിപാടിയിൽ മുഖ്യാതിഥിയായി പങ്കെടുക്കും.
സെപ്റ്റംബർ 25 വ്യാഴാഴ്ച രാത്രി 8 മണിക്ക് സമാജം ഡയമണ്ട് ജൂബിലി ഹാളിലാണ് നാടകം. ബഹ്‌റൈനിലെ പ്രമുഖ നൃത്താധ്യാപികയും അഭിനേത്രിയുമായ വിദ്യാശ്രീയാണ് നാടകത്തിന്റെ രചനയും നൃത്തസംവിധാനവും നിർവഹിച്ചിരിക്കുന്നത്. കഥകളിലും ഐതിഹ്യങ്ങളിലും അധികം പരാമർശിക്കപ്പെടാത്ത വിന്ധ്യാവലിയുടെ ജീവിത മുഹൂർത്തങ്ങളാണ് ഈ നൃത്തനാടകത്തിലൂടെ ദൃശ്യവത്കരിക്കുന്നത്.
വനിതാ വേദി പ്രസിഡന്റ് മോഹിനി തോമസ്, പ്രോഗ്രാം കൺവീനർ ദിവ്യ മനോജ് എന്നിവരാണ് നാടകത്തിന്റെ ഏകോപനം നിർവഹിക്കുന്നത്. ബഹ്‌റൈനിലെ നൂറിലധികം കലാകാരന്മാരും സാങ്കേതിക പ്രവർത്തകരും അണിനിരക്കുന്ന ഈ കലാവിഷ്‌കാരം ബഹ്‌റൈനിലെ കലാസ്വാദകർക്ക് നവ്യമായൊരു ദൃശ്യാനുഭവമായിരിക്കുമെന്ന് സമാജം പ്രസിഡന്റ് പി.വി. രാധാകൃഷ്ണപിള്ളയും ജനറൽ സെക്രട്ടറി വർഗീസ് കാരയ്ക്കലും അറിയിച്ചു.
കൂടുതൽ വിവരങ്ങൾക്കായി 'ശ്രാവണം' ജനറൽ കൺവീനർ വർഗീസ് ജോർജ്ജിനെ 39291940 എന്ന നമ്പറിൽ ബന്ധപ്പെടാവുന്നതാണ്.
ംമെമ
