കൊവിഡ്-19; ലോകത്തെ സുരക്ഷിതമായ രാജ്യങ്ങളില്‍ യുഎഇക്ക് 11ാം സ്ഥാനം
ദുബൈ։ രോഗ ഭീതിയില്‍ നിന്നും സുരക്ഷിതമായ രാജ്യങ്ങളില്‍ യുഎഇ 11ാം സ്ഥാനത്ത്. ദ ഡീപ്പ് നോളജ് ഗ്രൂപ്പ് എന്ന ലാഭേച്ഛയില്ലാതെ പ്രവര്‍ത്തിക്കുന്ന ഒരു ഗ്രൂപ്പാണ് ഈ പഠനം നടത്തിയിരിക്കുന്നത്. മഹാമാരിക്കെതിരെ പോരാടുന്ന നൂറ് രാജ്യങ്ങളെപ്പറ്റിയുള്ള ചോദ്യങ്ങളിലാണ് ഇത്തരത്തില്‍ മറുപടി വന്നിരിക്കുന്നത്. സ്വിറ്റ്സര്‍ലാന്‍ഡ് ആണ് ഒന്നാം സ്ഥാനത്തുള്ളത്. ജര്‍മനി രണ്ടാം സ്ഥാനത്തും ഉണ്ട്.
പട്ടികയിൽ ന്യൂസിലാന്‍ഡ്, ദക്ഷിണ കൊറിയ എന്നീ രാജ്യങ്ങള്‍ക്ക് പിന്നിലായാണ് യുഎഇയുടെ സ്ഥാനം. ഗള്‍ഫ് രാജ്യമായ സൗദിയില്‍ കൊവിഡ് രോഗികളുടെ എണ്ണം ഉയര്‍ന്ന നിരക്കിലാണെങ്കിലും പ്രവര്‍ത്തനത്തില്‍ ജനങ്ങളുടെ പിന്തുണ ലഭിച്ചിട്ടുണ്ട്. പഠനത്തില്‍ 15-ാം സ്ഥാനത്താണ് സൗദിയുള്ളത്. മറ്റ് ഗള്‍ഫ് രാജ്യങ്ങളുടെ സ്ഥാനങ്ങള്‍ ഇങ്ങനെ, കുവൈറ്റ് - 21, ബഹറൈൻ - 23, ഒമാന്‍ - 33. ഹോങ്കോങ്ങും കാനഡയും സമാനമായി യുഎഇയുടെ താഴെയാണ് ഉള്ളത്. നിരവധി ഘടകങ്ങളുടെ അടിസ്ഥാനത്തിലാണ് റിപ്പോര്‍ട്ട് തയ്യാറാക്കിയിരിക്കുന്നത്. ഇതില്‍, ക്വാറന്റൈൻ, സര്‍ക്കാരിന്റെ കാര്യപ്രാപ്തി, എങ്ങിനെ പരിശോധിക്കുന്നു, രോഗം കണ്ടെത്തുന്നു ആരോഗ്യ പരിപാലനം നടത്തുന്നുവെന്നുമെല്ലാം ഇതില്‍ പരിഗണിക്കുന്നുണ്ട്.
സിംഗപ്പൂര്‍, ജപ്പാന്‍, ഓസട്രിയ, ചൈന എന്നീ രാജ്യങ്ങളും മികച്ച അഭിപ്രായം നേടിയ രാജ്യങ്ങളാണ്. ഏറ്റവും അപകട സാധ്യതയുള്ള രാജ്യങ്ങളായി സബ് സഹാറന്‍ ആഫ്രിക്കയും ദക്ഷിണ ആഫ്രിക്കയുമാണ് കണക്കാക്കിയിരിക്കുന്നത്. ഇതില്‍ കമ്പോഡിയ, ലാവോസ്, ദ ബഹമാസ് എന്നീ മൂന്ന് രാജ്യങ്ങളാണ് ഏറ്റവും അപകടസാധ്യതയുള്ള രാജ്യമായ കണക്കാക്കിയിരിക്കുന്നത്.
