അണ്ടർ 20 ലോകകപ്പ് കിരീടം യുക്രൈന്
ലോഡ്സ്: അണ്ടർ 20 ലോകകപ്പ് ഫുട്ബോൾ കിരീടം യുക്രൈന്. ഫൈനലിൽ ദക്ഷിണ കൊറിയയെ 3− 1ന് തകർത്താണ് യുക്രൈന്റെ കിരീട നേട്ടം. മത്സരത്തിന്റെ അഞ്ചാം മിനിറ്റിൽ തന്നെ ഒരു ഗോളിന് പിന്നിൽ നിന്ന ശേഷം യുക്രൈന്റെ യുവനിര തിരിച്ചുവരികയായിരുന്നു.
അഞ്ചാം മിനിറ്റിൽ തന്നെ കൊറിയക്ക് പെനാൽറ്റി ലഭിച്ചു. ആ പെനാൽറ്റി ലക്ഷ്യത്തിലെത്തിച്ച് ലീ കാങ് ഇൻ കൊറിയയെ മുന്നിലെത്തിച്ചു. എന്നാൽ സുപ്രിയഹയുടെ ഇരട്ട ഗോളിൽ യുക്രൈൻ തിരിച്ചടിച്ചു. 33−ാം മിനിറ്റിൽ സമനില ഗോൾ കണ്ടെത്തിയ സുപ്രിയഹ 52−ാം മിനിറ്റിൽ യുക്രൈന് ലീഡ് നൽകി. പിന്നീട് സമനിലക്ക് വേണ്ടിയായി കൊറിയയുടെ പോരാട്ടം. എന്നാൽ അതിനിടയിൽ അതിവേഗ കുതിപ്പിലൂടെ സതഷ്വെലി യുക്രൈന്റെ വിജയമുറപ്പിച്ച ഗോൾ നേടി. സെമിഫൈനലിൽ ഇറ്റലിയെ തോൽപ്പിച്ചായിരുന്നു യുക്രൈൻ മുന്നേറിയത്. അവരുടെ ആദ്യ അണ്ടർ 20 ലോകകപ്പ് കിരീടം കൂടിയാണിത്.
