തീയേറ്ററുകളിൽ ദേശീയ ഗാനം നിർബന്ധമാക്കൽ: മലക്കം മറിഞ്ഞ് കേന്ദ്ര സർക്കാർ
ന്യൂഡൽഹി: തിയേറ്ററുകളിൽ സിനിമ തുടങ്ങുന്നതിന് മുന്പ് ദേശീയ ഗാനം കേൾപ്പിക്കണമെന്ന ചട്ടത്തിൽ കേന്ദ്രത്തിന് നിലപാട് മാറ്റം. സിനിമാ തീയേറ്ററുകളിൽ ദേശീയ ഗാനം നിർബന്ധമാക്കുന്നത് സംബന്ധിച്ചു സുപ്രീം കോടതി ഉത്തരവ് ഉടൻ നടപ്പാക്കേണ്ടെന്നു ചൂണ്ടിക്കാട്ടി കേന്ദ്ര സർക്കാർ സുപ്രീംകോടതിയിൽ സത്യവാങ്മൂലം നൽകി.
നവംബർ 30ലെ സുപ്രീം കോടതി ഉത്തരവിന് മുന്പുള്ള സ്ഥിതി പുനഃസ്ഥാപിക്കണം എന്നാണ് കേന്ദ്ര ആഭ്യന്തരമന്ത്രാലയം നൽകിയ അഞ്ചു പേജുള്ള സത്യവാങ്മൂലത്തിൽ ആവശ്യപ്പെട്ടിരിക്കുന്നത്. ഇതിനായി ആറുമാസം വേണ്ടി വരുമെന്നും കേന്ദ്രം സത്യവാങ് മൂലം നൽകി.
തീയേറ്ററുകളിൽ സിനിമ തുടങ്ങുന്നതിന് മുന്പ് ദേശീയ ഗാനം കേൾപ്പിക്കണമെന്നും ആദരവ് പ്രകടിപ്പിച്ച് കൊണ്ട് സിനിമ കാണാനെത്തിയവർ എല്ലാവരും എഴുന്നേറ്റ് നിൽക്കണമെന്നുമുള്ള ഉത്തരവ് സുപ്രീംകോടതി പുറപ്പെടുവുപ്പിച്ചിരുന്നു.
ഈ ഉത്തരവിനെതിരേ സുപ്രീംകോടതിയിൽ നിന്നു തന്നെ വിമർശനം പിന്നീട് ഉയർന്നിരുന്നു. ജസ്റ്റിസ് ദീപക് മിശ്ര തന്നെ തലവനായ മൂന്നംഗ ബെഞ്ചിന്റേതായിരുന്നു ഉത്തരവ്. ഇതിനെതിരെ വ്യാപക പ്രതിഷേധം ഉയർന്നിരുന്നെങ്കിലും ഉത്തരവ് റദ്ദാക്കാൻ സുപ്രീംകോടതി വിസമ്മതിച്ചിരുന്നു.ധനകാര്യ മന്ത്രാലയത്തിലെ അഡീഷണൽ സെക്രട്ടറിയാകും കേന്ദ്രം നിയോഗിക്കുന്ന മന്ത്രിതല കമ്മറ്റിയുടെ തലവൻ.
