പോക്സോ കേസ് കൊടുത്തതിന്റെ പക; ജാമ്യത്തില് ഇറങ്ങിയ പ്രതി അതിജീവിത അടക്കം ആറുപേരെ വെട്ടിക്കൊന്നു; തെലങ്കാനയെ ഞെട്ടിച്ച് കൂട്ടക്കൊല
ഷീബ വിജയൻ
തെലങ്കാനയിലെ രംഗ റെഡ്ഡിയില് മനസ്സാക്ഷിയെ ഞെട്ടിച്ച ക്രൂരകൃത്യം അരങ്ങേറി. തനിക്കെതിരെ ലൈംഗികാതിക്രമ പരാതി നല്കിയ കൗമാരക്കാരിയെയും അവളുടെ കുടുംബത്തെയും കൊലപ്പെടുത്തിയതിന് പുറമേ 35കാരനായ പ്രതി രാജ്കുമാർ സ്വന്തം ഭാര്യയെയും മക്കളെയും കൊലപ്പെടുത്തിയതായി പൊലീസ് പറയുന്നു. സംഭവത്തിന് പിന്നാലെ ഒളിവില് പോയ പ്രതിക്ക് വേണ്ടി പൊലീസ് തിരച്ചില് ഊര്ജ്ജിതമാക്കിയിട്ടുണ്ട്.
വെള്ളിയാഴ്ച രാത്രിയാണ് സംഭവം നടന്നത്. ഷാബാദിലെ തങ്ങളുടെ വസതിയില് വെച്ച് ആദ്യം 30 വയസ്സുള്ള ഭാര്യ പാര്വതി സരിതയെയും നാലും ഒന്നും വയസുള്ള രണ്ട് ആണ്മക്കളെയും ഇയാൾ ആക്രമിച്ചു. തുടര്ന്ന്, ഒരു മാസം മുന്പ് തനിക്കെതിരെ പോക്സോ കേസ് കൊടുത്ത 17 വയസുകാരിയുടെ വീട്ടിലേക്ക് പോയ ഇയാൾ അവിടെ നിന്നും പെണ്കുട്ടിയെ കാറില് കയറ്റി വിജനമായ ഒരു സ്ഥലത്തേക്ക് കൊണ്ടുപോയി കൊലപ്പെടുത്തുകയായിരുന്നു. കൂടാതെ, പെണ്കുട്ടിയുടെ 45 വയസ്സുള്ള അമ്മയെയും 65 വയസ്സുള്ള അമ്മൂമ്മയെയും ഇയാള് കൊലപ്പെടുത്തി. സംഭവസമയത്ത് വീട്ടില് ഉണ്ടായിരുന്ന, 17കാരിയുടെ സഹോദരിയായ ഭിന്നശേഷിക്കാരിയായ 20കാരിയെ ഇയാൾ ഉപദ്രവിച്ചില്ല. ആറുപേരെ വെട്ടിക്കൊന്ന ശേഷം രാജ്കുമാര് തന്റെ പിതാവിനെ വിളിച്ചാണ് ഇക്കാര്യം ആദ്യം അറിയിച്ചത്. താൻ ആ മനുഷ്യരെയെല്ലാം കൊലപ്പെടുത്തിയെന്നും ആത്മഹത്യ ചെയ്യാന് പോകുകയാണെന്നും പറഞ്ഞ ശേഷം പ്രതി ഫോണ് സ്വിച്ച് ഓഫ് ചെയ്യുകയായിരുന്നു. പ്രതിയെ പിടികൂടാൻ പ്രത്യേക പൊലീസ് സംഘം രൂപീകരിച്ച് അന്വേഷണം ആരംഭിച്ചിട്ടുണ്ടെന്ന് മുതിര്ന്ന പൊലീസ് ഉദ്യോഗസ്ഥനായ തരുണ് ജോഷി വ്യക്തമാക്കി. പ്രായപൂര്ത്തിയാകാത്ത പെണ്കുട്ടിയെ പിന്തുടര്ന്ന് ശല്യം ചെയ്തതിനും ലൈംഗികാതിക്രമത്തിനും മെയ് മാസത്തിലാണ് രാജ്കുമാറിനെതിരെ കേസ് രജിസ്റ്റര് ചെയ്തിരുന്നത്.
xz cdszdsa
