ഉദ്ധവ് വിളിച്ച യോഗത്തിനെത്തിയത് മൂന്ന് എംപിമാർ മാത്രം; വിമതരെ അയോഗ്യരാക്കാൻ ശിവസേന നീക്കം
ഷീബ വിജയൻ
ന്യൂഡൽഹി: ശിവസേന ഉദ്ധവ് താക്കറെ വിഭാഗം വിളിച്ചുചേർത്ത പാർലമെന്ററി പാർട്ടി യോഗത്തിൽ വൻ തിരിച്ചടി. പാർട്ടിയിലെ ഒമ്പത് ലോക്സഭാ എംപിമാരിൽ വെറും മൂന്ന് പേർ മാത്രമാണ് യോഗത്തിൽ പങ്കെടുക്കാൻ എത്തിയത്. എല്ലാ എംപിമാരും യോഗത്തിൽ നിർബന്ധമായും പങ്കെടുക്കണമെന്ന് ആവശ്യപ്പെട്ട് പാർട്ടി നേരത്തെ വിപ്പ് പുറപ്പെടുവിച്ചിരുന്നു.
അരവിന്ദ് സാവന്ത്, അനിൽ ദേശായ്, രാജാഭാവു വാജെ എന്നിവരാണ് യോഗത്തിൽ പങ്കെടുത്ത ലോക്സഭാ അംഗങ്ങൾ. ഇവർക്ക് പുറമെ പാർട്ടിയുടെ ഏക രാജ്യസഭാ എംപിയായ സഞ്ജയ് റാവുത്തും യോഗത്തിനെത്തിയിരുന്നു. അതേസമയം, വിപ്പ് ലംഘിച്ച് യോഗത്തിൽ നിന്നും വിട്ടുനിന്ന ആറ് എംപിമാരെ അയോഗ്യരാക്കാനുള്ള നിയമപരമായ നീക്കങ്ങൾ ശിവസേന ഉദ്ധവ് വിഭാഗം ഇതിനകം ആരംഭിച്ചിട്ടുണ്ട്. യോഗത്തിൽ പങ്കെടുക്കാത്ത എംപിമാർക്കെതിരെ ശക്തമായ അച്ചടക്ക നടപടി സ്വീകരിച്ചിട്ടുണ്ടെന്നും ഹാജരാകാത്തതിന്റെ കൃത്യമായ കാരണം അടിയന്തരമായി ബോധിപ്പിക്കാൻ ആവശ്യപ്പെട്ട് എല്ലാവർക്കും കാരണം കാണിക്കൽ നോട്ടീസ് നൽകിയിട്ടുണ്ടെന്നും നേതാവായ അനിൽ ദേശായ് മാധ്യമപ്രവർത്തകരോട് വ്യക്തമാക്കി.
aqssaas
