ഇറാൻ ആക്രമണത്തിൽ നാശനഷ്ടം: അടച്ചിടേണ്ടി വന്ന ബഹ്‌റൈൻ കമ്പനിക്ക് 25,000 ദീനാറിലധികം വാടകയിളവ്

പ്രദീപ് പുറവങ്കര

മനാമ: ഇറാൻ നടത്തിയ വ്യോമാക്രമണത്തിൽ കെട്ടിടത്തിന് നാശനഷ്ടം സംഭവിച്ചതിനെ തുടർന്ന് മൂന്ന് മാസത്തേക്ക് പ്രവർത്തനം നിർത്തേണ്ടി വന്ന ബഹ്‌റൈൻ കമ്പനിക്ക് 25,000 ബഹ്‌റൈനി ദീനാറിലധികം (BD 25,000) വാടകയിളവ് ലഭിച്ചു. കെട്ടിട ഉടമയുമായി കോടതിക്ക് പുറത്ത് നടത്തിയ ഒത്തുതീർപ്പ് ചർച്ചകളെ തുടർന്നാണ് ഈ അനുകൂല തീരുമാനം ഉണ്ടായത്.

ആക്രമണത്തെ തുടർന്ന് തകർന്ന കെട്ടിടത്തിൽ ബിസിനസ്സ് തുടരാൻ സാധിക്കാതിരുന്നതിനെ ചൊല്ലി കെട്ടിട ഉടമയും കമ്പനിയും തമ്മിൽ നിലനിന്നിരുന്ന വാടക തർക്കത്തിനാണ് ഇതോടെ പരിഹാരമായത്. ഇരുവിഭാഗവും നടത്തിയ ചർച്ചകൾക്കൊടുവിൽ മൂന്ന് മാസത്തെ വാടക പൂർണ്ണമായും ഒഴിവാക്കി നൽകാൻ കെട്ടിട ഉടമ സമ്മതിക്കുകയായിരുന്നു. കെട്ടിടത്തിനുണ്ടായ നാശനഷ്ടങ്ങൾ, വസ്തു ഉപയോഗിക്കാൻ കഴിയാതെ വന്ന സാഹചര്യം, അടച്ചിടൽ കാലയളവിൽ കമ്പനിക്കുണ്ടായ സാമ്പത്തിക നഷ്ടം എന്നിവ വിലയിരുത്തിയാണ് ഇരുപക്ഷവും ഈ തീരുമാനത്തിലെത്തിയത്.

പ്രാദേശിക സംഘർഷങ്ങളും ആക്രമണങ്ങളും കെട്ടിടങ്ങൾക്ക് വരുത്തുന്ന ഭൗതികമായ നാശനഷ്ടങ്ങൾക്കും അപ്പുറം, ബിസിനസ്സുകളുടെ സുഗമമായ പ്രവർത്തനത്തെയും ബാധിക്കുന്നുണ്ടെന്ന് കേസ് കൈകാര്യം ചെയ്ത പ്രമുഖ അഭിഭാഷക റബാബ് മഹ്ദി ചൂണ്ടിക്കാട്ടി. ഇത്തരം അസാധാരണ സാഹചര്യങ്ങളിൽ കരാറിലെ വ്യവസ്ഥകളും കക്ഷികൾക്കുണ്ടായ സാമ്പത്തിക നഷ്ടങ്ങളും കൃത്യമായി വിലയിരുത്തേണ്ടതുണ്ടെന്നും അവർ പറഞ്ഞു.

വസ്തുതകളുടെയും കൃത്യമായ തെളിവുകളുടെയും അടിസ്ഥാനത്തിൽ ചർച്ചകൾ നടത്തിയാൽ അസാധാരണ സംഭവങ്ങൾ മൂലം ഉണ്ടാകുന്ന ഇത്തരം വാണിജ്യ തർക്കങ്ങൾ കോടതിക്ക് പുറത്ത് തന്നെ പരിഹരിക്കാൻ സാധിക്കുമെന്ന് റബാബ് മഹ്ദി വ്യക്തമാക്കി. നീണ്ട കോടതി നടപടികളും വൻ നിയമച്ചെലവുകളും ഒഴിവാക്കാനും, അതോടൊപ്പം ഇരുപാർട്ടികളും തമ്മിലുള്ള ബിസിനസ്സ് ബന്ധം ഉലയാതെ സൂക്ഷിക്കാനും ഇത്തരം ഒത്തുതീർപ്പുകൾ സഹായിക്കും. പ്രാദേശിക പ്രതിസന്ധികൾക്കിടയിലും ബിസിനസ്സ് ബന്ധങ്ങൾ തകരാതെ മുന്നോട്ട് കൊണ്ടുപോകാൻ പ്രായോഗികമായ പരിഹാരങ്ങൾ കണ്ടെത്താൻ വക്കീലന്മാർക്ക് വലിയ പങ്കുവഹിക്കാൻ സാധിക്കുമെന്നും അവർ കൂട്ടിച്ചേർത്തു.

അസാധാരണമായ സാഹചര്യങ്ങളിൽ കെട്ടിട ഉടമയുടെയും വാടകക്കാരന്റെയും അവകാശങ്ങൾ ഒരുപോലെ സംരക്ഷിച്ചുകൊണ്ട് എങ്ങനെ സമവായത്തിലെത്താം എന്നതിന്റെ മികച്ച ഉദാഹരണമാണ് ഈ ഒത്തുതീർപ്പ് വ്യവസ്ഥയെന്നും അഭിഭാഷക വിശേഷിപ്പിച്ചു.