ബഹ്റൈനിലെ സ്വകാര്യ ഫാർമസി മേഖലയിൽ റെക്കോർഡ് വളർച്ച: എണ്ണം 456 ആയി ഉയർന്നു
പ്രദീപ് പുറവങ്കര
മനാമ: ബഹ്റൈനിലെ സ്വകാര്യ ഫാർമസി മേഖല ചരിത്രത്തിലെ ഏറ്റവും ഉയർന്ന വളർച്ചാ നിരക്കിലെത്തിയതായി നാഷണൽ ഹെൽത്ത് റെഗുലേറ്ററി അതോറിറ്റി (NHRA) പുറത്തുവിട്ട ഏറ്റവും പുതിയ കണക്കുകൾ വ്യക്തമാക്കുന്നു. റിപ്പോർട്ടുകൾ പ്രകാരം 2024-ൽ രാജ്യത്തെ സ്വകാര്യ ഫാർമസികളുടെ എണ്ണം 456 ആയി ഉയർന്നു.
കഴിഞ്ഞ ഒരു പതിറ്റാണ്ടിനിടയിൽ ഈ മേഖലയിൽ ഇരട്ടിയിലധികം വർദ്ധനവാണ് രേഖപ്പെടുത്തിയിരിക്കുന്നത്. 2015-ൽ വെറും 195 ഫാർമസികൾ ഉണ്ടായിരുന്ന സ്ഥാനത്തുനിന്നാണ് 134 ശതമാനത്തോളം (261 ഫാർമസികൾ) വർദ്ധനവോടെ 2024-ൽ 456-ൽ എത്തിനിൽക്കുന്നത്.
കഴിഞ്ഞ വർഷങ്ങളിൽ ഈ മേഖലയിൽ സ്ഥിരതയാർന്ന വളർച്ചയാണ് ദൃശ്യമായത്. 2015-ൽ 195 ആയിരുന്ന ഫാർമസികളുടെ എണ്ണം 2016-ൽ 213 ആയും, 2017-ൽ 264 ആയും ഉയർന്നു. 2018-ൽ നേരിയ കുറവോടെ ഇത് 263 ആയെങ്കിലും തൊട്ടടുത്ത വർഷം മുതൽ വളർച്ച വീണ്ടും വേഗത്തിലായി. 2019-ൽ 315, 2020-ൽ 331, 2021-ൽ 396 എന്നിങ്ങനെയാണ് ഫാർമസികളുടെ എണ്ണം വർദ്ധിച്ചത്.
ഈ കാലയളവിലെ ഏറ്റവും ഉയർന്ന വാർഷിക വളർച്ച രേഖപ്പെടുത്തിയത് 2021-ലാണ്; മുൻവർഷത്തെ അപേക്ഷിച്ച് 65 പുതിയ ഫാർമസികളാണ് അക്കൊല്ലം തുറന്നത്. 2019-ൽ 52 ഫാർമസികളും, 2017-ൽ 51 ഫാർമസികളും പുതുതായി പ്രവർത്തനമാരംഭിച്ചു എന്നതും ശ്രദ്ധേയമാണ്.
ഈ കുതിപ്പ് 2024-ലും തുടർന്നതായാണ് കണക്കുകൾ കാണിക്കുന്നത്. 2023-ൽ 415 ഫാർമസികൾ ഉണ്ടായിരുന്ന സ്ഥാനത്ത് നിന്ന് ഒരൊറ്റ വർഷം കൊണ്ട് 10 ശതമാനത്തോളം വളർച്ചയോടെ 41 പുതിയ ഫാർമസികൾ കൂടി ഈ മേഖലയിലേക്ക് കൂട്ടിച്ചേർക്കപ്പെട്ടു. രാജ്യത്തെ ആരോഗ്യ പരിപാലന രംഗത്ത് സ്വകാര്യ മേഖലയ്ക്കുള്ള വർദ്ധിച്ചുവരുന്ന പങ്കാളിത്തമാണ് ഈ കണക്കുകൾ അടിവരയിടുന്നത്.
sfdsf
