സുരക്ഷാ സജ്ജീകരണങ്ങൾ വിലയിരുത്തി ബഹ്റൈൻ ആഭ്യന്തര മന്ത്രി
പ്രദീപ് പുറവങ്കര I ബഹ്റൈൻ
മനാമ: ഇറാനിയൻ പ്രകോപനത്തെത്തുടർന്നുണ്ടായ സങ്കീർണ്ണമായ സാഹചര്യത്തിൽ രാജ്യത്തെ സുരക്ഷാ സംവിധാനങ്ങളുടെയും അടിയന്തര സേവന വിഭാഗങ്ങളുടെയും പ്രവർത്തന സജ്ജത നേരിട്ട് വിലയിരുത്താൻ ആഭ്യന്തര മന്ത്രി ലെഫ്റ്റനന്റ് ജനറൽ ഷെയ്ഖ് റാഷിദ് ബിൻ അബ്ദുള്ള അൽ ഖലീഫ സന്ദർശനം നടത്തി. നാഷണൽ ആംബുലൻസ് ഓപ്പറേഷൻസ് സെന്റർ, ജനറൽ ഡയറക്ടറേറ്റ് ഓഫ് മീഡിയ ആൻഡ് സെക്യൂരിറ്റി കൾച്ചർ എന്നിവിടങ്ങളിലാണ് അദ്ദേഹം എത്തിയത്. രാജ്യത്തെ പൗരന്മാരുടെയും താമസക്കാരുടെയും സുരക്ഷ ഉറപ്പാക്കുന്നതിൽ അതീവ ജാഗ്രത പുലർത്തുന്ന ഉദ്യോഗസ്ഥരെ അദ്ദേഹം അഭിനന്ദിച്ചു.
ബഹ്റൈൻ രാജാവ് ഹിസ് മജസ്റ്റി കിംഗ് ഹമദ് ബിൻ ഈസ അൽ ഖലീഫയുടെയും, കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫയുടെയും പ്രത്യേക അഭിനന്ദനങ്ങളും നന്ദിയും മന്ത്രി ഉദ്യോഗസ്ഥരെ അറിയിച്ചു. ഇറാനിയൻ ആക്രമണത്തിന്റെ പ്രത്യാഘാതങ്ങൾ നേരിടുന്നതിൽ നാഷണൽ ആംബുലൻസ്, സുരക്ഷാ മാധ്യമ വിഭാഗങ്ങൾ എന്നിവർ കാട്ടിയ അസാമാന്യമായ പ്രതിബദ്ധതയെ ഭരണനേതൃത്വം പ്രത്യേകം പ്രശംസിച്ചു.
നാഷണൽ ആംബുലൻസ് ഓപ്പറേഷൻസ് സെന്ററിൽ എത്തിയ മന്ത്രി മെഡിക്കൽ ടീമുകളുടെ സജ്ജതയും ഏകോപനവും വിശദമായി പരിശോധിച്ചു. അടിയന്തര പ്ലാനിന്റെ ഭാഗമായി 176-ലധികം ആംബുലൻസുകൾ പ്രവർത്തനസജ്ജമാക്കുകയും അപകടസ്ഥലങ്ങളിലും അഭയകേന്ദ്രങ്ങളിലും അതിവേഗത്തിൽ വൈദ്യസഹായം എത്തിക്കുകയും ചെയ്തു. വളരെ കുറഞ്ഞ സമയത്തിനുള്ളിൽ അടിയന്തര കേസുകളിൽ ഇടപെടാനും പരിക്കേറ്റവരെ ആശുപത്രികളിൽ എത്തിക്കാനുമുള്ള ആംബുലൻസ് വിഭാഗത്തിന്റെ മികവ് കമ്മ്യൂണിറ്റിയുടെ അംഗീകാരം നേടിയതായും മന്ത്രി കൂട്ടിച്ചേർത്തു.
സെക്യൂരിറ്റി മീഡിയ സെന്റർ സന്ദർശിക്കവേ, രാജ്യം നേരിട്ട ആദ്യത്തെ യഥാർത്ഥ പരീക്ഷണമണിതെന്നു മന്ത്രി വിശേഷിപ്പിച്ചു. സാധാരണ നിലയിൽ നിന്ന് ഓപ്പറേഷണൽ നിലയിലേക്ക് മണിക്കൂറുകൾക്കുള്ളിൽ മാറാൻ ബഹ്റൈന് സാധിച്ചുവെന്നും സായുധ സേനകൾ ആക്രമണത്തെ കരുത്തോടെ നേരിട്ടുവെന്നും അദ്ദേഹം പറഞ്ഞു. ഗവൺമെന്റ് ഒരൊറ്റ ടീമായി പ്രവർത്തിച്ചതുകൊണ്ടാണ് ഈ വിജയം സാധ്യമായത്. കൃത്യതയും വ്യക്തതയുമുള്ള വാർത്തകൾ അതിവേഗത്തിൽ ജനങ്ങളിൽ എത്തിച്ചതിലൂടെ ഭീതി അകറ്റാൻ സാധിച്ചു. സോഷ്യൽ മീഡിയയിലൂടെ 12.8 കോടിയിലധികം വ്യൂസാണ് മന്ത്രാലയത്തിന്റെ വാർത്താക്കുറിപ്പുകൾക്ക് ലഭിച്ചത്. ഇത് ജനങ്ങളും സർക്കാരും തമ്മിലുള്ള വിശ്വാസം വർദ്ധിപ്പിച്ചതായും മന്ത്രി ചൂണ്ടിക്കാട്ടി.
രാജ്യം കൈവരിച്ച നേട്ടങ്ങൾ സംരക്ഷിക്കാനും സമാധാനം നിലനിർത്താനും ഓരോ പോലീസ് ഉദ്യോഗസ്ഥനും പ്രതിജ്ഞാബദ്ധരാണെന്ന് അദ്ദേഹം ഓർമ്മിപ്പിച്ചു. സുരക്ഷാ മാധ്യമ വിഭാഗം ഡയറക്ടർ ജനറൽ മേജർ ജനറൽ മുഹമ്മദ് ബിൻ ദിന മന്ത്രിയുടെ സന്ദർശനത്തിന് നന്ദി രേഖപ്പെടുത്തി. സംഭവങ്ങളുടെ ഓരോ വിശദാംശങ്ങളും കൃത്യമായി ജനങ്ങളെ അറിയിക്കുന്നതിൽ മന്ത്രിയുടെ മാർഗ്ഗനിർദ്ദേശങ്ങൾ വലിയ പങ്കുവഹിച്ചതായി അദ്ദേഹം പറഞ്ഞു.
szfdf
