ഖത്തർ എയർവേയ്സ് വിമാന സർവീസുകൾ വർദ്ധിപ്പിക്കുന്നു; പുതുക്കിയ സമയക്രമം പുറത്തിറക്കി
പ്രദീപ് പുറവങ്കര I ഗൾഫ്
ദോഹ: ദോഹയിൽ നിന്നുള്ള വിമാന സർവീസുകളുടെ എണ്ണത്തിൽ ഘട്ടംഘട്ടമായ വർദ്ധനവ് വരുത്തിക്കൊണ്ട് ഖത്തർ എയർവേയ്സ് പുതിയ യാത്രാ ഷെഡ്യൂൾ പ്രഖ്യാപിച്ചു. ഖത്തർ ന്യൂസ് ഏജൻസി (QNA) പുറത്തുവിട്ട പ്രസ്താവന പ്രകാരം, 2026 ഏപ്രിൽ 15 വരെ നിലവിലുള്ള ഈ പരിഷ്കാരത്തിൽ ആഗോള ശൃംഖലയിലുടനീളമുള്ള തൊണ്ണൂറിലധികം ലക്ഷ്യസ്ഥാനങ്ങളിലേക്കുള്ള അധിക സർവീസുകൾ ഉൾപ്പെടുത്തിയിട്ടുണ്ട്.
ജനറൽ അതോറിറ്റി ഓഫ് സിവിൽ ഏവിയേഷനുമായി ഏകോപിപ്പിച്ച് നിശ്ചയിച്ചിട്ടുള്ള പ്രത്യേക എയർ റൂട്ടുകളിലൂടെയാണ് ദോഹയിലേക്കും തിരിച്ചുമുള്ള സർവീസുകൾ ഖത്തർ എയർവേയ്സ് തുടരുന്നത്. പുതിയ ഷെഡ്യൂളിൽ ഉൾപ്പെട്ടിട്ടുള്ള സ്ഥലങ്ങളിലേക്ക് ടിക്കറ്റ് ബുക്ക് ചെയ്തിട്ടുള്ള യാത്രക്കാരെ വിമാന വിവരങ്ങൾ അറിയിക്കുന്നതിനായി നേരിട്ട് ബന്ധപ്പെടുമെന്ന് എയർവേയ്സ് അറിയിച്ചു. യാത്രക്കാർ ഖത്തർ എയർവേയ്സ് വെബ്സൈറ്റോ ആപ്പോ സന്ദർശിച്ച് തങ്ങളുടെ കോൺടാക്റ്റ് വിവരങ്ങൾ കൃത്യമാണെന്ന് ഉറപ്പുവരുത്തണമെന്നും അധികൃതർ നിർദ്ദേശിച്ചു.
യാത്രക്കാർക്ക് കൃത്യമായ ബുക്കിംഗ് രേഖകൾ ഉണ്ടെങ്കിൽ മാത്രമേ വിമാനത്താവളത്തിലേക്ക് എത്താവൂ എന്ന് എയർവേയ്സ് പ്രത്യേകം ഓർമ്മിപ്പിച്ചു. സുരക്ഷാ ക്രമീകരണങ്ങൾക്കോ മറ്റ് സാങ്കേതിക സാഹചര്യങ്ങൾക്കോ വിധേയമായി വിമാന സമയക്രമത്തിൽ മാറ്റങ്ങളോ റദ്ദാക്കലോ ഉണ്ടാകാൻ സാധ്യതയുണ്ടെന്നും പ്രസ്താവനയിൽ വ്യക്തമാക്കുന്നുണ്ട്.
ADSADSADSA
