കുവൈത്തിൽ പൊതുമാപ്പ് അവസാനിക്കാൻ ഇനി മൂന്ന് ദിവസം കൂടി
കുവൈത്ത് സിറ്റി : കുവൈത്തിൽ പൊതുമാപ്പ് അവസാനിക്കാൻ ഇനി മൂന്ന് ദിവസം കൂടി. പൊതുമാപ്പ് പ്രയോജനപ്പെടുത്തിയ ഇന്ത്യക്കാരിൽ ഭൂരിഭാഗവും ഔട്ട്പാസ് വാങ്ങിയിട്ടില്ല. ഇവർ എത്രയും പെട്ടെന്ന് ഔട്ട് പാസ് വാങ്ങണമെന്ന് ഇന്ത്യൻ എംബസി ആവശ്യപ്പെട്ടു. നിലവിൽ ആഭ്യന്തര മന്ത്രാലയം പ്രഖ്യാപിച്ചത് പ്രകാരം ഈ മാസം22നാണ് പൊതുമാപ്പ് അവസാനിക്കുന്നത്. കഴിഞ്ഞ മാസം 29-ന് ആരംഭിച്ച പൊതുമാപ്പിൽ ഇത് വരെ രാജ്യം വിട്ടവരുടെ കൃത്യമായ കണക്ക് അധികൃതർ പുറത്ത് വിട്ടിട്ടില്ല.
ഒന്നര ലക്ഷത്തിലധികം താമസകുടിയേറ്റ നിയമ ലംഘകരുണ്ടെന്നാണ് മന്ത്രാലയത്തെ ഉദ്ദരിച്ച് റിപ്പോർട്ടുള്ളത്. രേഖകളിൽ 30000ൽ അധികം ഇന്ത്യക്കാരുണ്ടെങ്കിലും ഇതുവരെ എംബസിയിൽ ഔട്ട് പാസിനെത്തിയിട്ടുള്ളവരുെട എണ്ണം 10000ൽ താഴെയാണ്. കലാവധിയുള്ള പാസ്‌പോർ‍ട്ട് കൈവശം ഉള്ളവർക്ക് വിമാനടിക്കറ്റ് എടുത്ത് യാത്രചെയ്യാവുന്നതായതിനാൽ ഇത്തരക്കാരുടെ കണക്ക് എംബസിയിൽ ലഭ്യമല്ല. ഇപ്പോഴും നിരവധിയാളുകൾ ഔട്ട്പാസിനായി എംബസിയെ സമീപിക്കുന്നുണ്ട്. എന്നാൽ ഔട്ട്പാസിന് അപേക്ഷിച്ചിട്ടുള്ളവരിൽ ചിലർ ഇത് വരെ അവ കരസ്ഥമാക്കിയിട്ടില്ല. എത്രയും പെട്ടന്ന് എംബസിയിൽ നിന്ന് ഔട്ട്പാസുകൾ കരസ്ഥമാക്കി പൊതുമാപ്പ് ആനുകൂല്ല്യം ഉപയോഗപ്പെടുത്തണമെന്ന് എംബസി വീണ്ടും പ്രസ്താവനയിൽ ആവശ്യപ്പെട്ടിട്ടുണ്ട്.
