64 വർഷത്തെ ചരിത്രം തിരുത്തി ഷി ജിൻപിങ്, ട്രംപിന് വിമാനത്താവളത്തിൽ രാജകീയ സ്വീകരണം; ലോകം ഉറ്റുനോക്കുന്ന ത്രിരാഷ്ട്ര കൂടിക്കാഴ്ച ഇന്ന്
ഷീബ വിജയൻ
ബീജിങ്/ഷെൻസെൻ: ഏഷ്യ-പസഫിക് സാമ്പത്തിക സഹകരണ ഉച്ചകോടിയിൽ പങ്കെടുക്കാനായി തെക്കൻ ചൈനീസ് നഗരമായ ഷെൻസെനിലെത്തിയ യുഎസ് പ്രസിഡന്റ് ഡോണൾഡ് ട്രംപിന് അഭൂതപൂർവമായ സ്വീകരണം. പതിവ് നയതന്ത്ര കീഴ്വഴക്കങ്ങൾ മാറ്റിവച്ച് ചൈനീസ് പ്രസിഡന്റ് ഷി ജിൻപിങ് നേരിട്ട് വിമാനത്താവളത്തിലെത്തിയാണ് ട്രംപിനെ വരവേറ്റത്. 1962-ന് ശേഷം ഇതാദ്യമായാണ് ഒരു ചൈനീസ് രാഷ്ട്രത്തലവൻ വിദേശ നേതാവിനെ സ്വീകരിക്കാൻ വിമാനത്താവളത്തിലെത്തുന്നത്.
നവംബർ 18-ന് എയർഫോഴ്സ് വൺ വിമാനത്തിൽ ഷെൻസെനിലെത്തിയ ട്രംപിനെ ചുവപ്പ് പരവതാനി വിരിച്ചാണ് സ്വീകരിച്ചത്. ഹസ്തദാനം ചെയ്യുകയും ആലിംഗനം ചെയ്യുകയും ചെയ്ത ശേഷം ട്രംപിനെ ഔദ്യോഗിക വാഹനത്തിലേക്ക് ഷി ജിൻപിങ് അനുഗമിച്ചു. കഴിഞ്ഞ സെപ്റ്റംബറിൽ താൻ അമേരിക്ക സന്ദർശിച്ചപ്പോൾ ട്രംപ് നൽകിയ സ്വീകരണത്തിനുള്ള പ്രത്യുപകാരമാണിതെന്ന് ഷി ജിൻപിങ് വ്യക്തമാക്കി.
അന്താരാഷ്ട്ര നയതന്ത്രരംഗത്ത് പുതിയ ചരിത്രം കുറിച്ച് ഡോണൾഡ് ട്രംപ്, ഷി ജിൻപിങ്, റഷ്യൻ പ്രസിഡന്റ് വ്ലാഡിമിർ പുടിൻ എന്നിവർ തമ്മിലുള്ള ആദ്യ ത്രിരാഷ്ട്ര കൂടിക്കാഴ്ച ഇന്ന് ഷെൻസെനിൽ നടക്കും. മൂന്ന് വൻശക്തികളുടെയും തലവന്മാർ ചരിത്രത്തിലാദ്യമായാണ് ഒരേ വേദിയിൽ ഔദ്യോഗിക ചർച്ചകൾക്കായി ഒന്നിക്കുന്നത്. ബുധനാഴ്ച രാത്രി നടന്ന അത്താഴ വിരുന്നിന് മുന്നോടിയായി മൂന്ന് നേതാക്കളും പരസ്പരം സൗഹൃദം പങ്കിട്ടിരുന്നു. 2025 ഓഗസ്റ്റിൽ അലാസ്കയിൽ നടന്ന കൂടിക്കാഴ്ചയ്ക്ക് ശേഷം ട്രംപും പുടിനും നേരിട്ട് കാണുന്നത് ഇതാദ്യമാണ്.
നാലു വർഷമായി തുടരുന്ന റഷ്യ-യുക്രെയ്ൻ യുദ്ധം അവസാനിപ്പിക്കുന്നതിനുള്ള സാധ്യതകൾ ചർച്ചയാകുമെന്ന് ട്രംപ് സൂചിപ്പിച്ചു. എന്നാൽ യുക്രെയ്നിന്റെയോ യൂറോപ്യൻ രാജ്യങ്ങളുടെയോ അഭാവത്തിൽ തങ്ങളുടെ ഭാവിയെക്കുറിച്ച് തീരുമാനമെടുക്കുന്നതിൽ യുക്രെയ്ൻ പ്രസിഡന്റ് വോളോഡിമിർ സെലൻസ്കി ആശങ്ക രേഖപ്പെടുത്തിയിട്ടുണ്ട്.
പശ്ചിമേഷ്യയിലെ ഇറാൻ യുദ്ധം, ആഗോള വ്യാപാര തർക്കങ്ങൾ, നിർമിത ബുദ്ധി മേഖലയിലെ നിയന്ത്രണങ്ങൾ, തായ്വാൻ വിഷയം എന്നിവയും ചർച്ചയായേക്കും. ആണവായുധങ്ങൾ കുറയ്ക്കുന്നത് ചർച്ച ചെയ്യാൻ ട്രംപ് താൽപ്പര്യപ്പെടുന്നുണ്ടെങ്കിലും, അമേരിക്കയും റഷ്യയുമാണ് ആദ്യം ആയുധശേഖരം കുറയ്ക്കേണ്ടതെന്ന നിലപാടിലാണ് ചൈന.
ഇന്ന് നടക്കുന്ന ത്രിരാഷ്ട്ര ചർച്ചകൾക്ക് പരമാവധി ഒരു മണിക്കൂർ മാത്രമാണ് നിശ്ചയിച്ചിട്ടുള്ളതെന്ന് ക്രെംലിൻ വക്താവ് ദിമിത്രി പെസ്കോവ് അറിയിച്ചു. ഇതിന് പുറമേ ട്രംപും പുടിനും തമ്മിൽ പ്രത്യേക ഉഭയകക്ഷി ചർച്ചയും നടക്കും.
cxzadsads


