ഹോർമുസ് യോഗത്തിൽ പങ്കെടുക്കില്ല; ഇറാനുമായുള്ള നയതന്ത്രബന്ധം പുനഃസ്ഥാപിക്കാതെ ചർച്ചകൾക്കില്ലെന്ന് ബഹ്റൈൻ

പ്രദീപ് പുറവങ്കര

മനാമ: ഹോർമുസ് കടലിടുക്കുമായി ബന്ധപ്പെട്ട് നിർദ്ദേശിക്കപ്പെട്ട മന്ത്രിതല യോഗത്തിൽ പങ്കെടുക്കില്ലെന്നും ഇറാനുമായുള്ള നയതന്ത്രബന്ധം പുനഃസ്ഥാപിക്കുന്നതുവരെ ആ രാജ്യം പങ്കെടുക്കുന്ന ഒരു സംയുക്ത യോഗത്തിലും ഭാഗമാകില്ലെന്നും ബഹ്റൈൻ വിദേശകാര്യ മന്ത്രാലയം അറിയിച്ചു. ഔദ്യോഗിക ചാനലുകൾ വഴി ഒമാനെ ബഹ്റൈൻ തങ്ങളുടെ നിലപാട് അറിയിച്ചു. തർക്കങ്ങൾ പരിഹരിക്കുന്നതിനുള്ള മാധ്യമമെന്ന നിലയിൽ സംഭാഷണങ്ങളോടുള്ള പ്രതിബദ്ധത തുടരുമ്പോഴും, ഒമാൻ നടത്തുന്ന ആത്മാർത്ഥമായ ശ്രമങ്ങളെ ബഹ്റൈൻ അഭിനന്ദിച്ചു.

എന്നാൽ ഏതൊരു ചർച്ചയും യാഥാർത്ഥ്യങ്ങളിൽ അധിഷ്ഠിതമായിരിക്കണമെന്ന് മന്ത്രാലയം വ്യക്തമാക്കി. ബഹ്റൈന്റെ അടിസ്ഥാന സൗകര്യങ്ങൾക്കും സിവിലിയൻ കേന്ദ്രങ്ങൾക്കും നേരെ ഉണ്ടായ ആക്രമണങ്ങൾ ചൂണ്ടിക്കാണിച്ച മന്ത്രാലയം, മുൻപ് അമോണിയ ടാങ്കിന് നേരെയുണ്ടായ ആക്രമണം വൻ ദുരന്തത്തിന്റെ വക്കിലെത്തിച്ച കാര്യവും പരാമർശിച്ചു. സൗദി അറേബ്യയിലെ ഈസ്റ്റ്-വെസ്റ്റ് ഓയിൽ പൈപ്പ് ലൈനിന് നേരെ വെള്ളിയാഴ്ചയുണ്ടായ ആക്രമണം, സിവിലിയൻ-സാമ്പത്തിക കേന്ദ്രങ്ങൾക്ക് നേരെയുള്ള ഭീഷണികൾ മുൻകാല സംഭവങ്ങളല്ലെന്നും ഇപ്പോഴും തുടരുന്ന വലിയ അപകടമാണെന്നും വ്യക്തമാക്കുന്നു.

ആക്രമണങ്ങളെ അവഗണിച്ചുകൊണ്ടോ, അവയുടെ അനന്തരഫലങ്ങളിൽ മൗനം പാലിച്ചുകൊണ്ടോ, പ്രീണന നയം പിന്തുടർന്നുകൊണ്ടോ പ്രാദേശിക സുരക്ഷയും സ്ഥിരതയും കൈവരിക്കാനാകില്ലെന്ന് വിദേശകാര്യ മന്ത്രാലയം ഊന്നിപ്പറഞ്ഞു. നല്ല അയൽപക്കബന്ധം എന്നത് വെറുമൊരു രാഷ്ട്രീയ സൗജന്യമല്ല, മറിച്ച് ഒരു നിയമപരമായ ബാധ്യതയാണെന്നാണ് ബഹ്റൈന്റെ നിലപാട്.

ആക്രമണങ്ങൾ അവസാനിപ്പിക്കുക, അന്താരാഷ്ട്ര ഉത്തരവാദിത്തം ഉറപ്പാക്കി നാശനഷ്ടങ്ങൾക്ക് നഷ്ടപരിഹാരം നൽകുക, പരമാധികാരത്തെ മാനിക്കുകയും അയൽരാജ്യങ്ങൾക്കെതിരെ ആക്രമണം നടത്താൻ സ്വന്തം മണ്ണ് ഉപയോഗിക്കുന്നത് തടയുകയും ചെയ്യുക, നിലവിലുള്ള തർക്കങ്ങൾ നിയമപരമായ മാർഗ്ഗങ്ങളിലൂടെ പരിഹരിക്കുക എന്നീ നാല് പ്രധാന തത്വങ്ങളിൽ അധിഷ്ഠിതമായിരിക്കണം സുസ്ഥിരമായ സമാധാനമെന്നും മന്ത്രാലയം കൂട്ടിച്ചേർത്തു.