യു.എസ് വ്യോമാക്രമണത്തിന് പിന്നാലെ ഗൾഫ് രാജ്യങ്ങൾക്ക് നേരെ ഇറാന്റെ മിസൈൽ-ഡ്രോൺ വർഷം; ഹോർമുസ് കടലിടുക്ക് അടച്ചു, വീണ്ടും യുദ്ധഭീതി

പ്രദീപ് പുറവങ്കര

മനാമ: മിഡിൽ ഈസ്റ്റിൽ വീണ്ടും യുദ്ധപ്രതിസന്ധി രൂക്ഷമാക്കിക്കൊണ്ട് തന്ത്രപ്രധാനമായ ഹോർമുസ് കടലിടുക്ക് (Strait of Hormuz) അടച്ചതായി ഇറാൻ പ്രഖ്യാപിച്ചു. ഇന്ന് പുലർച്ചെ അമേരിക്ക നടത്തിയ ശക്തമായ വ്യോമാക്രമണത്തിന് പകരമായി ബഹ്‌റൈൻ, ഖത്തർ, യു.എ.ഇഎന്നീ അയൽരാജ്യങ്ങൾക്ക് നേരെയാണ് ഇറാൻ വ്യാപകമായി മിസൈലുകളും ഡ്രോണുകളും തൊടുത്തുവിട്ടത്.

ആക്രമണത്തെ തുടർന്ന് ബഹ്‌റൈൻ, ഖത്തർ, യു.എ.ഇ എന്നിവിടങ്ങളിൽ വ്യോമാക്രമണ മുന്നറിയിപ്പ് സൈറണുകളും സ്ഫോടന ശബ്ദങ്ങളും കേട്ടതായി പ്രാദേശിക അധികൃതരും അന്താരാഷ്ട്ര മാധ്യമങ്ങളും റിപ്പോർട്ട് ചെയ്തു. യു.എ.ഇയും ഖത്തറും ബഹ്റൈനും തങ്ങൾക്ക് നേരെ വന്ന മിസൈലുകൾ പ്രതിരോധിച്ചതായി അറിയിച്ചു. മിഡിൽ ഈസ്റ്റ് യുദ്ധം അവസാനിപ്പിക്കാൻ വാഷിംഗ്ടണും ടെഹ്‌റാനും തമ്മിലുണ്ടാക്കിയ താല്ക്കാലിക സമാധാന കരാറിനെ പൂർണ്ണമായി തകിടം മറിക്കുന്നതാണ് പുതിയ സംഭവവികാസങ്ങൾ.

ഹോർമുസ് കടലിടുക്കിലൂടെ 'അനധികൃത പാതയിൽ' സഞ്ചരിച്ച സൈപ്രസ് രജിസ്ട്രേഷനുള്ള ചരക്കുകപ്പലിന് നേരെ ഇറാൻ്റെ റവല്യൂഷണറി ഗാർഡ്സ് വെടിയുതിർത്തതിന് പിന്നാലെയാണ് അമേരിക്ക ഇന്ന് പുലർച്ചെ ഇറാനിൽ പ്രത്യാക്രമണം നടത്തിയത്. ഇറാന്റെ പക്കലുള്ള ബന്ദർ അബ്ബാസ്, സിരിക്, ജാസ്ക്, ഖേഷ്മ് ദ്വീപ്, ഇറാഖ് അതിർത്തിയോട് ചേർന്നുള്ള ഖുസെസ്താൻ പ്രവിശ്യ എന്നിവിടങ്ങളിൽ സ്ഫോടനങ്ങൾ ഉണ്ടായതായി ഇറാൻ മാധ്യമങ്ങൾ റിപ്പോർട്ട് ചെയ്തു.

അമേരിക്കൻ പ്രസിഡന്റ് ഡൊണാൾഡ് ട്രംപിന്റെ നിർദ്ദേശപ്രകാരം ഇറാനിലെ 140-ഓളം സൈനിക ലക്ഷ്യങ്ങൾക്ക് നേരെയാണ് യു.എസ് സെൻട്രൽ കമാൻഡ് (CENTCOM) ഈ ആഴ്ചയിലെ മൂന്നാം ഘട്ട ആക്രമണം നടത്തിയത്. "ഇറാൻ എടുത്തത് തെറ്റായ തീരുമാനമാണ്, ഇപ്പോൾ അതിനുള്ള വില അവർ നൽകുന്നു," യു.എസ് പ്രതിരോധ സെക്രട്ടറി പീറ്റ് ഹെഗ്സെത് പ്രതികരിച്ചു.

ഇതിന് മറുപടിയായാണ് ജോർദാൻ, കുവൈറ്റ്, ബഹ്‌റൈൻ, ഖത്തർ എന്നിവിടങ്ങളിലെ യു.എസ് സൈനിക താവളങ്ങൾക്കും റഡാർ കേന്ദ്രങ്ങൾക്കും നേരെ തങ്ങൾ ബാലിസ്റ്റിക് മിസൈലുകളും ഡ്രോണുകളും വിന്യസിച്ചതെന്ന് ഇറാൻ റവല്യൂഷണറി ഗാർഡ്സ് പ്രഖ്യാപിച്ചത്. കൂടാതെ, ഈ മേഖലയിലെ അമേരിക്കൻ ഇടപെടലുകൾ അവസാനിക്കുന്നത് വരെ ഹോർമുസ് കടലിടുക്ക് അടച്ചിടുമെന്നും അവർ വ്യക്തമാക്കി.

ഇറാൻ്റെ ആക്രമണത്തിന് ഇരയായ സൈപ്രസ് ചരക്കുകപ്പലിലെ എൻജിൻ റൂമിന് തീപിടിക്കുകയും കപ്പൽ പൂർണ്ണമായി നിയന്ത്രണരഹിതമാവുകയും ചെയ്തു. കപ്പലിലെ ഒരു ജീവനക്കാരനെ കാണാതായിട്ടുണ്ട്. കപ്പൽ ജീവനക്കാർ ലൈഫ് ബോട്ടിൽ രക്ഷപ്പെട്ടതായി ബ്രിട്ടീഷ് മാരിടൈം ഏജൻസി അറിയിച്ചു. ഒമാൻ തീരത്ത് നിന്ന് 17 കിലോമീറ്റർ കിഴക്കാണ് ഈ സംഭവം നടന്നത്.

കഴിഞ്ഞ ഫെബ്രുവരിയിൽ യു.എസ്-ഇസ്രായേൽ സംയുക്ത വ്യോമാക്രമണത്തിൽ കൊല്ലപ്പെട്ട മുൻ പരമോന്നത നേതാവ് അലി ഖൊമേനിയുടെ വധത്തിന് പ്രതികാരം ചെയ്യുമെന്ന് അദ്ദേഹത്തിന്റെ മകനും പുതിയ പരമോന്നത നേതാവുമായ മൊജ്തബ ഖൊമേനി പ്രഖ്യാപിച്ചു. "പ്രതികാരം ഞങ്ങളുടെ ജനതയുടെ ആഗ്രഹമാണ്, അത് നടപ്പാക്കുക തന്നെ ചെയ്യും. ലക്ഷ്യമിടേണ്ട വ്യക്തികളുടെ പട്ടിക ഇറാൻ തയ്യാറാക്കിയിട്ടുണ്ട്," ഔദ്യോഗിക സന്ദേശത്തിൽ അദ്ദേഹം വ്യക്തമാക്കി.

തനിക്കെതിരെ എന്തെങ്കിലും തരത്തിലുള്ള വധശ്രമമുണ്ടായാൽ ഇറാനെ അമേരിക്ക 'പൂർണ്ണമായി ഇല്ലാതാക്കുമെന്ന്' ട്രംപ് തന്റെ ട്രൂത്ത് സോഷ്യൽ പ്ലാറ്റ്‌ഫോമിലൂടെ മുന്നറിയിപ്പ് നൽകിയതിന് തൊട്ടുപിന്നാലെയാണ് ഇറാന്റെ ഭാഗത്തുനിന്ന് ഈ പ്രസ്താവന വന്നത്.

ലോകത്തിലെ ക്രൂഡ് ഓയിൽ, എൽ.എൻ.ജി കയറ്റുമതിയുടെ പ്രധാന പാതയായ ഹോർമുസ് കടലിടുക്ക് അടച്ചിട്ടത് ആഗോള സമ്പദ്‌വ്യവസ്ഥയെയും എണ്ണവിലയെയും കഠിനമായി ബാധിക്കുമെന്ന ആശങ്ക ശക്തമാണ്. കടലിടുക്കിലൂടെയുള്ള കപ്പലുകളുടെ സഞ്ചാരം നിയന്ത്രിക്കാനും ഫീസ് ഈടാക്കാനും ഇറാൻ ശ്രമിക്കുന്നുണ്ടെങ്കിലും അന്താരാഷ്ട്ര നിയമപ്രകാരം അമേരിക്ക ഇത് അംഗീകരിക്കുന്നില്ല. മേഖലയിൽ സമാധാനം തിരികെ കൊണ്ടുവരാൻ ഖത്തറിന്റെ നേതൃത്വത്തിലുള്ള പ്രതിനിധി സംഘം മധ്യസ്ഥശ്രമങ്ങൾ തുടരുന്നതിനിടയിലാണ് വീണ്ടും യുദ്ധാവസ്ഥ സംജാതമായിരിക്കുന്നത്.