ഇറാൻ സായുധ ഗ്രൂപ്പുകളെ പിന്തുണയ്ക്കുന്നത് നിർത്തണം; യുഎന്നിൽ സംയുക്ത മുന്നറിയിപ്പുമായി ഗൾഫ് രാഷ്ട്രങ്ങൾ
പ്രദീപ് പുറവങ്കര I അന്തർദേശീയം
ന്യൂയോർക്ക്: മേഖലയിലെ സായുധ ഗ്രൂപ്പുകൾക്ക് നൽകുന്ന പിന്തുണയും ശത്രുതാപരമായ നീക്കങ്ങളും ഇറാൻ അടിയന്തരമായി അവസാനിപ്പിക്കണമെന്ന് ആവശ്യപ്പെട്ട് ബഹ്റൈന്റെ നേതൃത്വത്തിൽ ഗൾഫ് രാഷ്ട്രങ്ങൾ ഐക്യരാഷ്ട്രസഭയ്ക്ക് കത്തയച്ചു. സൗദി അറേബ്യ, യുണൈറ്റഡ് അറബ് എമിറേറ്റ്സ്, ഖത്തർ, കുവൈറ്റ്, ബഹ്റൈൻ എന്നീ രാജ്യങ്ങൾ സംയുക്തമായാണ് യുഎൻ സെക്രട്ടറി ജനറലിനും സെക്യൂരിറ്റി കൗൺസിൽ പ്രസിഡന്റിനും ഈ കർശനമായ നയതന്ത്ര മുന്നറിയിപ്പ് നൽകിയത്.
2026 ഫെബ്രുവരി 28 മുതൽ ഗൾഫ് രാജ്യങ്ങളെ ലക്ഷ്യമിട്ട് ഇറാൻ നടത്തിയ മിസൈൽ, ഡ്രോൺ ആക്രമണങ്ങൾ അന്താരാഷ്ട്ര നിയമങ്ങളുടെയും യുഎൻ ചാർട്ടറിന്റെയും നഗ്നമായ ലംഘനമാണെന്ന് കത്തിൽ വ്യക്തമാക്കുന്നു. ഇത്തരം നടപടികൾ അയൽരാജ്യങ്ങളുടെ പരമാധികാരത്തെ ചോദ്യം ചെയ്യുന്നതും നല്ല അയൽപക്ക ബന്ധങ്ങളുടെ തത്വങ്ങൾക്ക് വിരുദ്ധവുമാണെന്ന് രാജ്യങ്ങൾ ചൂണ്ടിക്കാട്ടി.
അൽ-ഖ്വയ്ദ, ഹൂതികൾ, ഹിസ്ബുള്ള, ഇറാഖിലെ വിവിധ സായുധ സംഘടനകൾ തുടങ്ങിയ ഗ്രൂപ്പുകൾക്ക് ഇറാൻ ഫണ്ടിംഗും പരിശീലനവും ആയുധങ്ങളും നൽകുന്നതിനെതിരെ കത്തിൽ ശക്തമായ ആരോപണങ്ങൾ ഉന്നയിച്ചിട്ടുണ്ട്. ഇറാന്റെ നേരിട്ടുള്ള മാർഗനിർദ്ദേശത്തിൽ പ്രവർത്തിക്കുന്ന ഇത്തരം ശൃംഖലകൾ രാജ്യങ്ങളുടെ അതിർത്തികൾ ലംഘിച്ച് സൈനിക നടപടികൾ വ്യാപിപ്പിക്കുകയാണെന്നും ഇത് മേഖലയിലുടനീളം അസ്ഥിരത പടർത്താൻ കാരണമാകുന്നുവെന്നും ഗൾഫ് രാഷ്ട്രങ്ങൾ അറിയിച്ചു.
ഇറാന്റെ ഭാഗത്തുനിന്നുണ്ടാകുന്ന ഇത്തരം പിന്തുണകൾ പ്രാദേശിക സുരക്ഷയെ തകർക്കുന്നതാണെന്നും ശത്രുതാപരമായ ഇത്തരം പ്രവർത്തനങ്ങളിൽ നിന്ന് ഇറാൻ പിന്തിരിയണമെന്നും സംയുക്ത കത്തിൽ ഗൾഫ് സഖ്യം ആവശ്യപ്പെട്ടു.
gdfg
