ഇന്ത്യൻ സ്കൂൾ ബഹ്റൈന് ദേശീയ ദിനം ആഘോഷിച്ചു
മനാമ: ഇന്ത്യൻ സ്കൂൾ ഇസ ടൗൺ കാമ്പസിൽ വർണ ശബളമായ പരിപാടികളോടെ ബഹ്റൈന് ദേശീയ ദിനം ആഘോഷിച്ചു . ഇസ ടൗൺ ജഷൻമൽ ഓഡിറ്റോറിയത്തിൽ വ്യാഴാഴ്ച രാവിലെ നടന്ന പരിപാടികളിൽ ദേശീയ വസ്ത്രമണിഞ്ഞു പതാകയും കയ്യിലേന്തി കുട്ടികൾ അണിനിരന്നു . സ്കൂളിലെ അറബിക് വിഭാഗത്തിന്റെ നേതൃത്വത്തിലാണ് ദേശീയ ദിനം ആഘോഷിച്ചത് . ഇന്ത്യൻ സ്കൂൾ ചെയർമാൻ പ്രിൻസ് എസ് നടരാജൻ ദേശീയ പതാക ഉയർത്തി. വൈസ് ചെയർമാൻ ജയഫർ മൈദാനി, എക്സിക്യൂട്ടീവ് കമ്മിറ്റി അംഗം മുഹമ്മദ് നയാസ് ഉല്ല, പ്രിൻസിപ്പൽ വി.ആർ.പളനിസ്വാമി , വൈസ് പ്രിൻസിപ്പൽമാർ, സ്റ്റാഫ്, സ്കൂൾ വിദ്യാർത്ഥികൾ സന്നിഹിതരായിരുന്നു . വിദ്യാർത്ഥികൾക്കിടയിൽ ദേശീയ ദിനങ്ങളുടെ നിർണായക പ്രാധാന്യം പ്രതിഫലിപ്പിക്കുന്നതിനുള്ള അറബിക് വകുപ്പിന്റെ സമർപ്പിത പരിശ്രമങ്ങളെ പ്രിൻസ് എസ് നടരാജൻ അഭിനന്ദിച്ചു . ബഹറിൻ മതപരമായ വൈവിധ്യം, സഹിഷ്ണുത, സഹവർത്തിത്വം എന്നിവയ്ക്ക് മാതൃകയാണെന്ന് അദ്ദേഹം പറഞ്ഞു. അറബിക് വിഭാഗം മേധാവി റുഖയ എ റഹിം സ്വാഗതം പറഞ്ഞു.
വിശുദ്ധ ഖുർആൻ പാരായണത്തോടെയും , ദേശീയഗാന ആലാപനത്തോടെയും ബഹ്റൈന് ദേശീയ ദിന ആഘോഷ പരിപാടികൾ ആരംഭിച്ചു . പരമ്പരാഗത നൃത്തങ്ങൾ ഉൾപ്പെടെ വിവിധ സാംസ്കാരിക പരിപാടികൾ അരങ്ങേറി.
