ഭിന്നശേഷിക്കാർക്കായി ദേശീയ ഡാറ്റാബേസ് വേണം: ഡോ. മുനീർ സുറൂർ എം.പി
പ്രദീപ് പുറവങ്കര
മനാമ: ഭിന്നശേഷിക്കാരായ വ്യക്തികളുടെ കഴിവിനും ശേഷിക്കും അനുയോജ്യമായ തൊഴിലുകൾ കണ്ടെത്താൻ സഹായിക്കുന്ന ദേശീയ ഡാറ്റാബേസ് രൂപീകരിക്കണമെന്ന് ബഹ്റൈൻ പാർലമെന്റ് അംഗം ഡോ. മുനീർ സുറൂർ ആവശ്യപ്പെട്ടു. നിലവിൽ പല ഭിന്നശേഷിക്കാർക്കും അവരുടെ ശാരീരിക അവസ്ഥകൾക്ക് ചേരാത്ത ജോലി സാധ്യതകളാണ് ലഭിക്കുന്നത്. ഈ സാഹചര്യം ഒഴിവാക്കാൻ തൊഴിൽ ദാതാക്കൾക്കും പരിശീലന സ്ഥാപനങ്ങൾക്കും ഉദ്യോഗാർത്ഥികളുടെ കഴിവുകളെയും ആവശ്യങ്ങളെയും കുറിച്ച് വ്യക്തമായ വിവരങ്ങൾ ലഭ്യമാകേണ്ടതുണ്ടെന്ന് അദ്ദേഹം വ്യക്തമാക്കി.
കേൾവിപരിമിതി ഉള്ള ഒരാൾക്ക് സ്വീകരണമുറിയിലെ (Reception) ജോലി അനുയോജ്യമായിരിക്കില്ലെങ്കിലും, ഡാറ്റാ എൻട്രി പോലുള്ള മേഖലകളിൽ അവർക്ക് മികച്ച പ്രകടനം കാഴ്ചവെക്കാൻ സാധിക്കുമെന്ന് അദ്ദേഹം ഉദാഹരണസഹിതം ചൂണ്ടിക്കാട്ടി. ബഹ്റൈൻ ഡെഫ് സൊസൈറ്റിയുമായി നടത്തിയ ചർച്ചയ്ക്കിടെയായിരുന്നു അദ്ദേഹത്തിന്റെ നിർദ്ദേശം.
ഭിന്നശേഷിക്കാരായ ഉദ്യോഗാർത്ഥികളെ വേഗത്തിൽ കണ്ടെത്താൻ തൊഴിലുടമകളെ സഹായിക്കുന്നതിനൊപ്പം, അവരുടെ കഴിവുകൾക്ക് അനുസൃതമായ കോഴ്സുകൾ രൂപകല്പന ചെയ്യാൻ പരിശീലന കേന്ദ്രങ്ങളെയും ഈ സംയോജിത പ്ലാറ്റ്ഫോം സഹായിക്കും. ഭിന്നശേഷിക്കാരുടെ പരിമിതികളേക്കാൾ ഉപരി അവർക്ക് ചെയ്യാൻ സാധിക്കുന്ന കാര്യങ്ങൾക്കാണ് സമൂഹവും തൊഴിൽദാതാക്കളും മുൻഗണന നൽകേണ്ടതെന്ന് ഡോ. മുനീർ സുറൂർ കൂട്ടിച്ചേർത്തു.
aa
