136 സർക്കാർ സേവനങ്ങൾ പുനഃസംഘടിപ്പിച്ച് ബഹ്റൈൻ; സമയപരിധിയിലും നടപടികളിലും വൻ കുറവ്
പ്രദീപ് പുറവങ്കര
മനാമ: ബഹ്റൈനിൽ സർക്കാർ സേവനങ്ങൾ കൂടുതൽ വേഗത്തിലും ലളിതവുമാക്കുന്നതിന്റെ ഭാഗമായി 2026 ജനുവരി 15 മുതൽ ഓഗസ്റ്റ് 27 വരെയുള്ള കാലയളവിൽ 22 സർക്കാർ സ്ഥാപനങ്ങളിലായി 136 സേവനങ്ങൾ പുനഃസംഘടിപ്പിച്ച് വികസിപ്പിച്ചു. സേവനങ്ങളുടെ ഗുണനിലവാരം ഉയർത്തുന്നതിനും പൂർണ്ണമായും ഡിജിറ്റൽ സംവിധാനത്തിലേക്ക് മാറ്റുന്നതിനുമാണ് ഈ പരിഷ്കാരം നടപ്പിലാക്കിയത്.
നടപടിക്രമങ്ങൾക്ക് എടുക്കുന്ന സമയം കുറഞ്ഞത് 25 ശതമാനം വരെ വെട്ടിക്കുറയ്ക്കുക, അപേക്ഷാ ഘട്ടങ്ങൾ പരമാവധി നാലായി പരിമിതപ്പെടുത്തുക, ആവശ്യമായ രേഖകളുടെ എണ്ണം 50 ശതമാനം വരെ കുറയ്ക്കുക, വിവരങ്ങൾ അറിയാനുള്ള പേജുകളുടെ എണ്ണം പകുതിയാക്കുക എന്നിവയാണ് ഈ സംരംഭത്തിലൂടെ ലക്ഷ്യമിട്ടത്.
വിവിധ വകുപ്പുകളിൽ കൈക്കൊണ്ട മാറ്റങ്ങൾ സേവനങ്ങളുടെ കാത്തിരിപ്പ് സമയം വൻതോതിൽ കുറച്ചു. നാഷണൽ ബ്യൂറോ ഫോർ റെവന്യൂവിൽ നികുതിദായകരുടെ പ്രൊഫൈൽ പുതുക്കുന്നതിനായുള്ള നടപടിക്രമ സമയം 30 പ്രവൃത്തി ദിവസങ്ങളിൽ നിന്ന് വെറും 5 ദിവസമായി കുറച്ചപ്പോൾ, സുപ്രീം കൗൺസിൽ ഫോർ എൻവയോൺമെന്റിൽ അപേക്ഷകളിൽ തീരുമാനമെടുക്കാനുള്ള സമയം 20 ദിവസത്തിൽ നിന്ന് 7 ദിവസമായി ചുരുക്കി.
കൂടാതെ, വിവാഹ സർട്ടിഫിക്കറ്റുകളിൽ ക്യൂആർ കോഡ് ഉൾപ്പെടുത്തി വൈവാഹിക നില ഉടനടി പരിശോധിക്കാനുള്ള സൗകര്യമൊരുക്കുകയും പൊസിഷനിങ് റഫറൻസ് നെറ്റ്വർക്ക് അപേക്ഷകൾ ഓൺലൈനായി സമർപ്പിക്കാനും ട്രാക്ക് ചെയ്യാനും സംവിധാനം ലഭ്യമാക്കുകയും ചെയ്തിട്ടുണ്ട്. പൊതുജനങ്ങൾക്ക് വേഗത്തിലും എളുപ്പത്തിലും സേവനങ്ങൾ ലഭ്യമാക്കുക എന്ന സർക്കാറിന്റെ ഡിജിറ്റൽ ലക്ഷ്യങ്ങളിലേക്ക് വലിയ മുന്നേറ്റമാണ് ഈ നടപടികളിലൂടെ സാധ്യമായിരിക്കുന്നത്.
aa
