ബഹ്റൈൻ പോളിടെക്നിക്കിൽ നഴ്സിംഗ് കോളേജ് സ്ഥാപിക്കാൻ പാർലിമെന്റ് നിർദ്ദേശം
പ്രദീപ് പുറവങ്കര
മനാമ: ബഹ്റൈൻ പോളിടെക്നിക്കിന് കീഴിൽ നഴ്സിംഗ് ആൻഡ് മിഡ്വൈഫറി കോളേജ് ആരംഭിക്കാനുള്ള നിർദ്ദേശത്തിന് പാർലമെന്റിന്റെ സർവീസ് കമ്മിറ്റി അംഗീകാരം നൽകി. ആരോഗ്യ മേഖലയിൽ വിദഗ്ദ്ധരായ സ്വദേശി ജീവനക്കാരുടെ എണ്ണം വർദ്ധിപ്പിക്കുന്നതിനും വിദേശ തൊഴിലാളികളെ ആശ്രയിക്കുന്നത് കുറയ്ക്കുന്നതിനുമാണ് ഈ നടപടി.
എം.പി ജലീല അൽ സയ്യിദും മറ്റ് നാല് പ്രതിനിധികളും ചേർന്ന് സമർപ്പിച്ച ഈ നിർദ്ദേശം നഴ്സിംഗ്, മിഡ്വൈഫറി, കമ്മ്യൂണിറ്റി കെയർ എന്നിവയിൽ അക്കാദമിക്, പ്രായോഗിക പരിശീലനങ്ങൾ നൽകുന്ന പ്രത്യേക കോളേജ് ആരംഭിക്കാനാണ് ആവശ്യപ്പെടുന്നത്. രാജ്യത്തെ ആരോഗ്യ മേഖലയിൽ സ്വദേശി പ്രതിഭകൾക്കായുള്ള ആവശ്യകത വർദ്ധിച്ചുവരുന്ന സാഹചര്യത്തിലാണ് ഈ നീക്കം.
ആരോഗ്യ രംഗത്തെ ആവശ്യങ്ങൾക്കനുസരിച്ച് സ്വന്തമായി പരിശീലന പരിപാടികളും പാഠ്യപദ്ധതികളും ആസൂത്രണം ചെയ്യാൻ ശേഷിയുള്ള സ്വതന്ത്ര നഴ്സിംഗ് കോളേജിന്റെ അഭാവം മേഖലയിൽ പ്രൊഫഷണലുകളുടെ കുറവിന് കാരണമാകുന്നുണ്ടെന്ന് കമ്മിറ്റി വ്യക്തമാക്കി.
നിലവിലെ നഴ്സിംഗ് പഠന പരിപാടികളിൽ സീറ്റുകളുടെ എണ്ണം വർദ്ധിപ്പിക്കണമെന്നും, ഉയർന്ന ഡിപ്ലോമ, ബിരുദാനന്തര ബിരുദം, ഡോക്ടറേറ്റ് പഠനങ്ങൾ തുടങ്ങിയവ ആരംഭിക്കണമെന്നും ബഹ്റൈൻ നഴ്സിംഗ് ആൻഡ് മിഡ്വൈഫറി സൊസൈറ്റി ആവശ്യപ്പെട്ടു. ജനറൽ നഴ്സിംഗിന് പുറമെ ഇന്റൻസീവ് കെയർ, എമർജൻസി, ഡയാലിസിസ്, പീഡിയാട്രിക്, ഓങ്കോളജി, മെന്റൽ ഹെൽത്ത്, നഴ്സിംഗ് മാനേജ്മെന്റ് തുടങ്ങിയ മേഖലകളിലും കൂടുതൽ വിദഗ്ദ്ധരെ ആവശ്യമുണ്ട്.
ബാഹ്യ ഏജൻസികളുടെ റിപ്പോർട്ടുകൾ പ്രകാരം ജി.സി.സി രാജ്യങ്ങളിൽ ശരാശരി 1,000 ആളുകൾക്ക് 6.5 നഴ്സുമാർ എന്ന തോതിലാണുള്ളത്. തീവ്രപരിചരണം, എമർജൻസി വിഭാഗങ്ങളിൽ ഇപ്പോഴും കടുത്ത ക്ഷാമം അനുഭവപ്പെടുന്നുമുണ്ട്. തംകീൻ (Tamkeen) പ്രസിദ്ധീകരിച്ച സ്കിൽസ് റിപ്പോർട്ടിലും ബഹ്റൈനിൽ ഏറ്റവും ആവശ്യമുള്ള തൊഴിലുകളിലൊന്നായി നഴ്സിംഗിനെ രേഖപ്പെടുത്തിയിട്ടുണ്ട്.
അതേസമയം, ക്ലിനിക്കൽ പരിശീലനത്തിനുള്ള സൗകര്യങ്ങൾ വർദ്ധിപ്പിക്കാതെ വിദ്യാർത്ഥികളുടെ എണ്ണം കൂട്ടുന്നത് ആശുപത്രികളുടെ പ്രവർത്തനത്തെ ബാധിച്ചേക്കാമെന്നും, പഠിച്ചിറങ്ങുന്നവരുടെ എണ്ണത്തിന് അനുസൃതമായി തൊഴിലവസരങ്ങൾ ഉറപ്പാക്കണമെന്നും സൊസൈറ്റി മുൻകരുതൽ നിർദ്ദേശം നൽകിയിട്ടുണ്ട്.
dsgdgf
