ബലിപെരുന്നാൾ; വിപണിയിൽ ഭക്ഷ്യസാധനങ്ങളും കന്നുകാലികളും സുലഭമെന്ന് ബഹ്റൈൻ ചേംബർ
പ്രദീപ് പുറവങ്കര
മനാമ: വരാനിരിക്കുന്ന ബലിപെരുന്നാളിനോടനുബന്ധിച്ച് ബഹ്റൈനിലെ പ്രാദേശിക വിപണിയിൽ കന്നുകാലികൾ, മാംസം, പച്ചക്കറികൾ, പഴങ്ങൾ എന്നിവയുൾപ്പെടെയുള്ള എല്ലാവിധ അവശ്യ ഭക്ഷ്യസാധനങ്ങളും ആവശ്യത്തിന് ലഭ്യമാണെന്ന് ബഹ്റൈൻ ചേംബർ ഓഫ് കൊമേഴ്സ് ആൻഡ് ഇൻഡസ്ട്രിയുടെ (BCCI) ഭക്ഷ്യമേഖലാ കമ്മിറ്റി ചെയർമാൻ ഖാലിദ് അലി അൽ അമീൻ അറിയിച്ചു. വിതരണ ശൃംഖലയുടെ സുസ്ഥിരത ഉറപ്പാക്കാനും വിപണിയിലേക്കുള്ള ഭക്ഷ്യവസ്തുക്കളുടെ ഒഴുക്ക് വർദ്ധിപ്പിക്കാനും കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫ നൽകിയ നിർദ്ദേശങ്ങൾ കൃത്യമായി നടപ്പിലാക്കുന്നുണ്ടെന്നും അദ്ദേഹം വ്യക്തമാക്കി.
പെരുന്നാൾ സീസണിലെ വർദ്ധിച്ചുവരുന്ന ആവശ്യം കണക്കിലെടുത്ത് വൻതോതിൽ ആടുകൾ, പശുക്കൾ, ഒട്ടകങ്ങൾ എന്നിവയ്ക്ക് പുറമെ ഫ്രോസൺ മാംസം, കോഴിയിറച്ചി, പച്ചക്കറികൾ എന്നിവയും വിപണിയിൽ എത്തിച്ചിട്ടുണ്ട്. നിലവിലെ പ്രാദേശിക-ആഗോള ഭൗമരാഷ്ട്രീയ പ്രതിസന്ധികളും ഷിപ്പിംഗ് നിരക്കിലെ വർദ്ധനവും വിതരണ ശൃംഖലയിലെ തടസ്സങ്ങളും നിലനിൽക്കുന്നുണ്ടെങ്കിലും, രാജ്യത്തെ ഉപഭോക്താക്കളുടെ ആവശ്യങ്ങൾ നിറവേറ്റാൻ തക്കവണ്ണം വിപണി പൂർണ്ണ സജ്ജവും സുസ്ഥിരവുമാണെന്ന് അദ്ദേഹം ഉറപ്പുനൽകി.
സുഗമമായ വിതരണത്തിനായി കന്നുകാലി വളർത്തുന്നവർ, കശാപ്പുകാർ, മാംസം ഇറക്കുമതി ചെയ്യുന്ന കമ്പനികൾ എന്നിവരുൾപ്പെടെയുള്ള വിതരണ ശൃംഖലയിലെ എല്ലാ പങ്കാളികളുമായും ചേംബറിന്റെ ഭക്ഷ്യമേഖലാ കമ്മിറ്റി ഏകോപനം നടത്തുന്നുണ്ട്. ഇതിന്റെ ഭാഗമായി സെൻട്രൽ മാർക്കറ്റിലെ വ്യാപാരികളുമായും അരി വ്യാപാരികളുമായും നടത്തിയ ചർച്ചകളിൽ നിലവിലെ സാഹചര്യത്തിൽ വിലക്കയറ്റം ഉണ്ടാകില്ലെന്നും വില പൂർണ്ണമായും സുസ്ഥിരമായിരിക്കുമെന്നും ഉറപ്പാക്കിയിട്ടുണ്ടെന്നും അൽ അമീൻ കൂട്ടിച്ചേർത്തു.
dfsdsdsa
