വിദേശരാജ്യത്തെ അപമാനിച്ച കേസ്: ബഹ്‌റൈൻ സ്വദേശിയുടെ തടവുശിക്ഷ ഒഴിവാക്കി ബദൽ ശിക്ഷ വിധിച്ചു

പ്രദീപ് പുറവങ്കര I ബഹ്റൈൻ

മനാമ: വിദേശരാജ്യത്തെ അപമാനിക്കുകയും തെറ്റായ വാർത്തകൾ പ്രചരിപ്പിക്കുകയും ചെയ്ത കേസിൽ ശിക്ഷിക്കപ്പെട്ട 68-കാരനായ ബഹ്‌റൈൻ സ്വദേശിക്ക് കോടതി ശിക്ഷയിൽ ഇളവ് അനുവദിച്ചു. ആറുമാസം തടവിനായിരുന്നു നേരത്തെ ഇയാളെ ശിക്ഷിച്ചിരുന്നത്. എന്നാൽ പ്രതി നൽകിയ അപ്പീൽ പരിഗണിച്ച ഹൈയർ ക്രിമിനൽ അപ്പീൽ കോടതി, തടവുശിക്ഷയ്ക്ക് പകരം ബദൽ ശിക്ഷ (Alternative Penalty) നടപ്പിലാക്കാൻ ഉത്തരവിടുകയായിരുന്നു.

നേരത്തെ ലോവർ ക്രിമിനൽ കോടതി പ്രതിക്ക് ആറുമാസം തടവും 200 ബഹ്‌റൈൻ ദിനാർ പിഴയുമാണ് വിധിച്ചിരുന്നത്. ഇതിനെതിരെയാണ് പ്രതി അപ്പീൽ കോടതിയെ സമീപിച്ചത്. പ്രതി കുറ്റക്കാരനാണെന്ന വിധി കോടതി ശരിവെച്ചെങ്കിലും, അദ്ദേഹത്തിന്റെ പ്രായം കൂടി കണക്കിലെടുത്താണ് തടവുശിക്ഷ ഒഴിവാക്കാൻ കോടതി തീരുമാനിച്ചത്. പകരം ആഴ്ചയിലൊരിക്കൽ 'ആൾട്ടർനേറ്റീവ് പെനാൽറ്റി സെന്ററിൽ' ഹാജരായി പ്രൊബേഷൻ വ്യവസ്ഥകൾ പാലിക്കണമെന്ന് കോടതി നിർദ്ദേശിച്ചു. കൂടാതെ, മറ്റ് അറബ് രാജ്യങ്ങളെ അപമാനിക്കുന്ന തരത്തിലുള്ള പ്രസ്താവനകൾ മേലിൽ നടത്തരുതെന്ന് കോടതി പ്രതിക്ക് കർശന മുന്നറിയിപ്പും നൽകി.

ഒരു പ്രമുഖ വാർത്താ ചാനലിൽ സംസാരിക്കവെ പ്രതി നടത്തിയ വിവാദ പ്രസ്താവനകളാണ് കേസിന് ആധാരമായത്. വിദേശരാജ്യത്തെ അപമാനിക്കുന്ന തരത്തിലുള്ള രണ്ട് വീഡിയോ ക്ലിപ്പുകൾ പ്രോസിക്യൂഷൻ കോടതിയിൽ തെളിവായി ഹാജരാക്കിയിരുന്നു. രാജ്യത്ത് അസ്ഥിരതയുണ്ടാക്കാനും കലാപത്തിന് ആഹ്വാനം ചെയ്യാനും പ്രതി ബോധപൂർവ്വം ശ്രമിച്ചുവെന്നും പ്രോസിക്യൂഷൻ വാദിച്ചു. പ്രതി പ്രചരിപ്പിച്ചത് തികച്ചും വ്യാജമായ വാർത്തകളാണെന്ന് കോടതിയും നിരീക്ഷിച്ചു.

ബഹ്‌റൈനിലെ ബദൽ ശിക്ഷാ നിയമപ്രകാരം (Alternative Sanctions Law), പ്രായമോ മറ്റ് സാഹചര്യങ്ങളോ പരിഗണിച്ച് തടവുശിക്ഷയ്ക്ക് പകരം സാമൂഹിക സേവനമോ നിശ്ചിത കേന്ദ്രങ്ങളിൽ ഹാജരാകലോ പോലുള്ള ശിക്ഷാ രീതികൾ നടപ്പിലാക്കാറുണ്ട്. ഈ നിയമത്തിന്റെ ആനുകൂല്യമാണ് ഇപ്പോൾ പ്രതിക്ക് ലഭിച്ചിരിക്കുന്നത്.