ഡൽഹിയിൽ എട്ട് മാസം പ്രായമായ കുഞ്ഞിനെ ബന്ധു പീഡിപ്പിച്ചു
ന്യൂഡൽഹി : എട്ട് മാസം പ്രായമായ പെൺകുഞ്ഞിനെ 28കാരനായ ബന്ധു ലൈംഗികമായി പീഡിപ്പിച്ചു. ഡൽഹിയിലെ ഷക്കോർബസ്തി പ്രദേശത്ത് ഞായറാഴ്ചയായിരുന്നു സംഭവം നടന്നത്. യുവാവിനൊപ്പം കുട്ടിയെ ഇരുത്തിയ ശേഷം മാതാപിതാക്കൾ ജോലി സ്ഥലത്തേയ്ക്ക് പോയ സമയത്താണ് സംഭവം ഉണ്ടായത്. മാതാപിതാക്കൾ തിരികെയെത്തിയപ്പോൾ കുഞ്ഞ് നിർത്താതെ കരയുകയായിരുന്നതിനാലും രഹസ്യഭാഗങ്ങളിൽ രക്തം കണ്ടെത്തിയതിനെത്തുടർന്നും ഉടൻ ആശുപത്രിയിലെത്തിക്കുകയായിരുന്നു. തുടർന്ന് നടത്തിയ വിദഗ്ദ്ധ പരിശോധനയിൽ കുട്ടി പീഡിപ്പിക്കപ്പെട്ടെന്ന് വ്യക്തമായി. ഗുരുതരമായി പരിക്കേറ്റ കുഞ്ഞിന് ശസ്ത്രക്രിയ നടത്തിയതായും ആരോഗ്യനില മെച്ചപ്പെട്ടതായും ആശുപത്രി അധികൃതർ അറിയിച്ചു.
കുഞ്ഞിനെ പീഡിപ്പിച്ചതിന് ശേഷം ഒളിവിലായിരുന്ന ബന്ധുവിനെ പോലീസ് പിടികൂടി. ആദ്യം കുറ്റം നിഷേധിച്ച പ്രതി കൂടുതൽ ചോദ്യം ചെയ്യലിൽ കുറ്റം സമ്മതിച്ചു. കുട്ടിയുടെ കുടുംബം താമസിക്കുന്ന അതേ കെട്ടിടത്തിലാണ് ഇയാളും കഴിഞ്ഞിരുന്നത്. പോക്സോ നിയമപ്രകാരമാണ് യുവാവിനെതിരെ കേസ് എടുത്തിരിക്കുന്നത്.
