മറാഈ അന്താരാഷ്ട്ര പ്രദർശനം നവംബർ 11 മുതൽ 15 വരെ ; അപൂർവയിനം ജീവികളും ആധുനിക കാർഷിക സാങ്കേതികവിദ്യകളും അണിനിരക്കും

പ്രദീപ് പുറവങ്കര

മനാമ: ബഹ്‌റൈനിലെ ഏറ്റവും വലിയ മൃഗപ്രദർശനവും കാർഷിക മേളയുമായ 'മറാഈ അന്താരാഷ്ട്ര പ്രദർശനം 2026' അടുത്ത മാസം നടക്കും. നവംബർ 11 മുതൽ 15 വരെ സല്ലാഖിലെ ബഹ്‌റൈൻ ഇന്റർനാഷണൽ എൻഡുറൻസ് വില്ലേജിലാണ് അഞ്ചുദിവസം നീളുന്ന ഈ മേള സംഘടിപ്പിക്കുന്നത്. മുൻസിപ്പാലിറ്റി കാര്യ-കാർഷിക മന്ത്രാലയത്തിന്റെ നേതൃത്വത്തിലാണ് മേള ഒരുങ്ങുന്നത്.

വിവിധ ഇനം കുതിരകൾ, പ്രാദേശിക-വിദേശ ഫാം മൃഗങ്ങൾ, അപൂർവയിനം പക്ഷികൾ എന്നിവയുടെ വിപുലമായ ശേഖരം പ്രദർശനത്തിലുണ്ടാകും. ബഹ്‌റൈനിൽ നിന്നും മറ്റ് ജി.സി.സി രാജ്യങ്ങളിൽ നിന്നുമുള്ള കർഷകർ, മൃഗപരിപാലകർ, പ്രജനന വിദഗ്ദ്ധർ, വ്യാപാരികൾ എന്നിവരെ ഒരുമിപ്പിക്കുന്ന വലിയൊരു വേദിയായിരിക്കും ഇത്. ബഹ്‌റൈൻ കർഷകരുടെയും ഫാം ഉടമകളുടെയും ഉടമസ്ഥതയിലുള്ള അറബിയൻ കുതിരകളുടെയും അപൂർവ മൃഗങ്ങളുടെയും പ്രദർശനമാണ് മേളയുടെ പ്രധാന ആകർഷണം.

അത്യാധുനിക കാർഷിക സാങ്കേതികവിദ്യകൾ, ഹരിത നവീകരണങ്ങൾ, പ്രാദേശിക കാർഷിക വിളകൾ എന്നിവ സന്ദർശകർക്കായി ഒരുക്കും. കർഷകർക്കും നിക്ഷേപകർക്കും വ്യാപാര സാധ്യതകൾ തേടാനും കരാറുകളിൽ ഏർപ്പെടാനുമുള്ള പ്രത്യേക സൗകര്യങ്ങളും ഇവിടെയുണ്ടായിരിക്കും. രാജ്യത്തിന്റെ ഭക്ഷ്യസുരക്ഷ വർധിപ്പിക്കാനും പ്രാദേശിക കാർഷിക-മൃഗപരിപാലന മേഖലകളുടെ വളർച്ചയ്ക്കും മേള കരുത്തേകും. ബഹ്‌റൈന്റെ പാരമ്പര്യവും സംസ്‌കാരവും വിളിച്ചോതുന്ന പരിപാടികളും ഇതിന്റെ ഭാഗമായി അരങ്ങേറും.

കഴിഞ്ഞ വർഷം മേള കാണാൻ രാജ്യത്തിനകത്തു നിന്നും ജി.സി.സിയിൽ നിന്നുമുള്ള ആയിരക്കണക്കിന് കുടുംബങ്ങളും സ്കൂൾ വിദ്യാർത്ഥികളും എത്തിയിരുന്നു. പൂച്ചകൾ, നായകൾ, ഒട്ടകങ്ങൾ, വേട്ടപ്പരുന്തുകൾ (Falcons), സലൂക്കി നായകൾ എന്നിവയ്ക്കൊപ്പം ചരിത്രത്തിലാദ്യമായി കൂറ്റൻ മുയലുകളുടെ പ്രത്യേക പ്രദർശനവും കഴിഞ്ഞ പതിപ്പിൽ ശ്രദ്ധേയമായിരുന്നു.

ഇത്തവണത്തെ പ്രദർശനം മുൻപത്തേക്കാൾ കൂടുതൽ വിപുലവും ആകർഷകവുമായിരിക്കുമെന്ന് സംഘാടകർ അറിയിച്ചു. വരും ദിവസങ്ങളിൽ പരിപാടിയുടെ കൂടുതൽ വിവരങ്ങൾ പുറത്തുവിടും.

#BahrainNews #Maraee2026 #BahrainAgriculture #4PMNews