ഐ.എസ്.ആർ.ഓ വിട്ട് ചരിത്രം കുറിക്കാൻ രണ്ട് ശാസ്ത്രജ്ഞർ; സ്കൈറൂട്ട് എയറോസ്പേസിലൂടെ ബഹിരാകാശത്ത് വിപ്ലവം

ഷീബ വിജയൻ

ഹൈദരാബാദ് ആസ്ഥാനമായി പ്രവർത്തിക്കുന്ന സ്കൈറൂട്ട് എയറോസ്പേസ് എന്ന സ്റ്റാർട്ടപ്പിലൂടെ ഇന്ത്യയുടെ സ്വകാര്യ ബഹിരാകാശ മേഖലയിൽ വലിയ മുന്നേറ്റത്തിന് നേതൃത്വം നൽകുകയാണ് മുൻ ഐ.എസ്.ആർ.ഒ ശാസ്ത്രജ്ഞരായ പവൻ കുമാർ ചന്ദനയും നാഗ ഭാരത് ഡാകയും. പതിറ്റാണ്ടുകളോളം ഇന്ത്യയിലെ ബഹിരാകാശ ഗവേഷണവും വിക്ഷേപണ പ്രവർത്തനങ്ങളും സർക്കാർ സ്ഥാപനമായ ഐ.എസ്.ആർ.ഒയുടെ കീഴിൽ മാത്രമായിരുന്നതിനാൽ ഉയർന്ന ചെലവും ദീർഘമായ കാത്തിരിപ്പും മൂലം സ്വകാര്യ സ്ഥാപനങ്ങൾക്ക് ഈ രംഗത്ത് അവസരങ്ങൾ കുറവായിരുന്നു. ഈ സാഹചര്യത്തിലാണ് കുറഞ്ഞ ചെലവിലും വേഗത്തിലും ഉപഗ്രഹ വിക്ഷേപണ സേവനങ്ങൾ ലഭ്യമാക്കുക എന്ന ലക്ഷ്യത്തോടെ 2018ൽ ഇരുവരും ചേർന്ന് സ്കൈറൂട്ട് എയറോസ്പേസ് ആരംഭിക്കുന്നത്. നിലവിൽ പവൻ കുമാർ ചന്ദന കമ്പനിയുടെ ചീഫ് എക്സിക്യൂട്ടീവ് ഓഫീസറായും നാഗ ഭാരത് ഡാക ചീഫ് ഓപ്പറേറ്റിങ് ഓഫീസറായും പ്രവർത്തിക്കുന്നു. ആയിരത്തിലധികം വിദഗ്ധരടങ്ങുന്ന വലിയൊരു സംഘമാണ് ഇവർക്ക് കീഴിൽ പ്രവർത്തിക്കുന്നത്.

2022ൽ 'മിഷൻ പ്രാരംഭ്' എന്ന ദൗത്യത്തിലൂടെ ഇന്ത്യയിലെ ആദ്യത്തെ സ്വകാര്യ വികസിത റോക്കറ്റായ 'വിക്രം-എസ്' വിജയകരമായി വിക്ഷേപിച്ച് കമ്പനി ചരിത്രം കുറിച്ചിരുന്നു. അതിനുമുമ്പ് 2020ൽ ഇന്ത്യയിലെ ആദ്യ സ്വകാര്യ റോക്കറ്റ് എൻജിനായ രമൺ-1 ഉം, 2021ൽ ക്രയോജനിക് എൻജിനായ ധവൻ-1 ഉം ഇവർ വിജയകരമായി പരീക്ഷിച്ചു. നിലവിൽ കമ്പനിയുടെ പ്രധാന വിക്ഷേപണ വാഹനമായ വിക്രം-1 അതിന്റെ ചരിത്രപരമായ ആദ്യ ഭ്രമണപഥ വിക്ഷേപണം പൂർത്തിയാക്കിയിരിക്കുകയാണ്. സ്കൈറൂട്ടിന്റെ ഈ വൻ മുന്നേറ്റം അന്താരാഷ്ട്ര നിക്ഷേപകരുടെ ഇടയിലും വലിയ ശ്രദ്ധ നേടിയിട്ടുണ്ട്. പ്രമുഖ നിക്ഷേപകരിൽ നിന്നായി 160 മില്യൺ അമേരിക്കൻ ഡോളറിന്റെ നിക്ഷേപം സമാഹരിച്ചതോടെ കമ്പനിയുടെ ആകെ മൂല്യം 1.1 ബില്യൺ അമേരിക്കൻ ഡോളറായി ഉയർന്നു. സർക്കാർ സ്ഥാപനങ്ങളിലെ അനുഭവസമ്പത്തും സ്വകാര്യ മേഖലയിലെ നവീകരണ ശേഷിയും ഒത്തുചേർന്നാൽ ഇന്ത്യക്ക് ലോക ബഹിരാകാശ വിപണിയിൽ നിർണായക സ്ഥാനം നേടാനാകുമെന്ന് ഈ രണ്ട് ശാസ്ത്രജ്ഞരും തെളിയിക്കുന്നു.