എ.കെ. ശശീന്ദ്രന്റെ എൻ.സി.പി (എസ്)-ഉം കടന്നപ്പള്ളി രാമചന്ദ്രന്റെ കോൺഗ്രസ് (എസ്)-ഉം ലയിച്ചു: പുതിയ പാർട്ടി 'സി.എസ്.പി'
ഷീബ വിജയൻ
കൊച്ചി: കേരള രാഷ്ട്രീയത്തിൽ പുതിയ മാറ്റങ്ങൾക്ക് വഴിതുറന്ന് എ.കെ. ശശീന്ദ്രൻ നേതൃത്വം നൽകുന്ന എൻ.സി.പി (എസ്)-ഉം കടന്നപ്പള്ളി രാമചന്ദ്രന്റെ കോൺഗ്രസ് (എസ്)-ഉം ഔദ്യോഗികമായി ലയിച്ചു. 'സി.എസ്.പി' (CSP) എന്ന പേരിലാണ് പുതിയ പാർട്ടി രൂപീകരിച്ചത്. 'കോൺഗ്രസ് സെക്യുലർ പാർട്ടി', 'കോൺഗ്രസ് സോഷ്യലിസ്റ്റ് പാർട്ടി' എന്നീ പേരുകൾ കേന്ദ്ര തെരഞ്ഞെടുപ്പ് കമ്മീഷന്റെ അംഗീകാരത്തിനായി സമർപ്പിച്ചിട്ടുണ്ടെന്ന് നേതാക്കൾ അറിയിച്ചു. ഇന്ന് മുതൽ ഇരു വിഭാഗങ്ങളും ഒറ്റ പാർട്ടിയായി പ്രവർത്തിക്കുമെന്ന് എ.കെ. ശശീന്ദ്രൻ വ്യക്തമാക്കി.
പുതിയ പാർട്ടിയുടെ പാർലമെന്ററി ബോർഡ് ചെയർമാനായി എ.കെ. ശശീന്ദ്രനെ തെരഞ്ഞെടുത്തു. പാർട്ടി ലയന പ്രഖ്യാപനത്തിന്റെ ഭാഗമായി ഒക്ടോബർ 24, 25 തീയതികളിൽ എറണാകുളത്ത് വിപുലമായ പൊതുസമ്മേളനം സംഘടിപ്പിക്കും. യുവതലമുറയെയും യുവാക്കളെയും ആകർഷിക്കുന്ന തരത്തിലുള്ള പുതിയ രാഷ്ട്രീയ സമീപനവും സംഘടനാ സംവിധാനവുമാണ് പാർട്ടിയുടെ ലക്ഷ്യമെന്ന് ശശീന്ദ്രൻ പറഞ്ഞു.
പുതിയ പാർട്ടിയുടെ ഭാവി പ്രവർത്തനങ്ങൾക്ക് ദിശ നിർണ്ണയിക്കുന്നതിനായി വ്യക്തമായ ഭരണഘടന തയ്യാറാക്കേണ്ടതുണ്ടെന്നും, ഇതുമായി ബന്ധപ്പെട്ട ചർച്ചകൾ പുരോഗമിക്കുകയാണെന്നും അദ്ദേഹം കൂട്ടിച്ചേർത്തു. ഇടത് മുന്നണിയിലെ പ്രമുഖ ഘടകകക്ഷികളുടെ ഈ ലയനം സംസ്ഥാന രാഷ്ട്രീയത്തിൽ നിർണ്ണായക ചലനങ്ങൾ സൃഷ്ടിക്കും.
hklh
