ഡൽഹിയിൽ ശക്തമായ കാറ്റും മഴയും: എയർ ഇന്ത്യ വിമാനങ്ങൾക്ക് കേടുപാടുകൾ
ഷീബ വിജയൻ
തലസ്ഥാന നഗരിയിൽ ഞായറാഴ്ച വൈകിട്ടുണ്ടായ അതിശക്തമായ കാറ്റിലും മഴയിലും ഡൽഹി ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ പാർക്ക് ചെയ്തിരുന്ന മൂന്ന് എയർ ഇന്ത്യ വിമാനങ്ങൾക്ക് കേടുപാടുകൾ സംഭവിച്ചു. പെട്ടെന്നുണ്ടായ കാറ്റിൽ റൺവേയിലെ ഗ്രൗണ്ട് സപ്പോർട്ട് ഉപകരണങ്ങൾ നിയന്ത്രണം വിട്ട് തെറിച്ചുപോയി വിമാനങ്ങളിൽ ഇടിച്ചതാണ് അപകടത്തിന് കാരണമായത്. ടെർമിനൽ 2ന് സമീപം പാർക്ക് ചെയ്തിരുന്ന ഈ വിമാനങ്ങളെ അടിയന്തരമായി സർവീസിൽ നിന്ന് പിൻവലിച്ചതായി ഡൽഹി ഇന്റർനാഷണൽ എയർപോർട്ട് ലിമിറ്റഡ് (DIAL) അറിയിച്ചു. ഈ തീവ്ര കാലാവസ്ഥയെക്കുറിച്ച് എയർ ട്രാഫിക് കൺട്രോളിൽ (ATC) നിന്ന് മുൻകൂട്ടി യാതൊരു മുന്നറിയിപ്പും ലഭിച്ചിരുന്നില്ലെന്ന് വിമാനത്താവള അധികൃതർ വ്യക്തമാക്കി. മോശം കാലാവസ്ഥയെത്തുടർന്ന് ഡൽഹിയിൽ നിരവധി സർവീസുകൾ വൈകുകയും ചിലത് വഴിതിരിച്ചുവിടുകയും ചെയ്തിട്ടുണ്ട്. സംഭവത്തിൽ സുരക്ഷാ മുൻകരുതലുകളിൽ വീഴ്ചയുണ്ടായോ എന്ന് കണ്ടെത്താൻ അധികൃതർ വിശദമായ അന്വേഷണം ആരംഭിച്ചു.
aqswaqswaads
