കുടുംബ പാർപ്പിട മേഖലകളിൽ നിന്നും ബാചിലേഴ്സിനെ ഒഴിപ്പിക്കാൻ കുവൈത്ത് മുനിസിപ്പാലിറ്റി
കുവൈത്ത് സിറ്റി : കുടുംബങ്ങൾ താമസിക്കുന്നതിനിടയിൽ ബാചിലേഴ്സ് താമസിക്കുന്നത് കർശനമായി വിലക്കിക്കൊണ്ട് കുവൈത്ത് മുനിസിപ്പാലിറ്റി ബന്ധപ്പെട്ട അധികൃതർക്ക് മുന്നറിയിപ്പ് നൽകി. അവിവാഹിതരെ പാർപ്പിച്ചിരിക്കുന്നത് എത്രയും വേഗം ഒഴിവാക്കണമെന്നാണ് മുനിസിപ്പാലിറ്റിയുടെ നിർദ്ദേശമെന്നു കൗൺസിൽ അംഗം മുഹമ്മദ് അൽ രാഖിബ് വാർത്താകുറിപ്പിൽ വ്യക്തമാക്കുന്നു.
കുവൈത്ത് സ്വദേശി കുടുംബങ്ങൾക്ക് സുരക്ഷ ഭീഷണി ഉയർത്തുന്ന സാഹചര്യം അതീവ ഗൗരവത്തോടെ കാണേണ്ടതാണെന്നും മുന്നറിയിപ്പിൽ വ്യക്തമാക്കുന്നു. അതേസമയം നിലവിലുള്ള സുരക്ഷ ഭീഷണി അധികൃതർ കണ്ടില്ലെന്ന് നടിക്കുന്നത് കാരണം കുടുംബങ്ങൾ മറ്റ് താമസ മേഖലകളിലേക്ക് ചേക്കേറേണ്ട അവസ്ഥയാണുള്ളത്.
കുടുംബ താമസ മേഖലകളിൽ നിന്നും വിദേശികളായ അവിവാഹിതരെ ഒഴിവാക്കുന്നതിന് വേണ്ട നടപടികൾ സ്വീകരിച്ചിട്ടുള്ളതായി ഫർവാനിയ ഗവർണർ ഷെയ്ഖ് ഫൈസൽ അൽ ഹ്യൂമുദ് അൽ മാലിക് അൽ സബ അറിയിച്ചു.വിവിധ പ്രദേശങ്ങളിലെ മേയർമാറുമായുള്ള കൂടിക്കാഴ്ചയിലാണ് ഗവർണർ ഇക്കാര്യം അറിയിച്ചത്.
