മുഖ്യമന്ത്രി ഉദ്യോഗാർത്ഥികളുമായി സംസാരിച്ചില്ല; വ്യക്തിപരമായ ആക്ഷേപത്തിന് മറുപടി പറയില്ല
തിരുവനന്തപുരം: മുഖ്യമന്ത്രി ഉദ്യോഗാർത്ഥികളുമായി സംസാരിച്ചില്ലെന്നും അവരുടെ ആവശ്യം എന്തെന്നും മനസ്സിലാക്കിയില്ലെന്നും മുൻ മുഖ്യമന്ത്രി ഉമ്മൻചാണ്ടി. പി.എസ്.സി പരീക്ഷയെഴുതിയ ഉദ്യോഗാർത്ഥികളോട് യുഡിഎഫ് സർക്കാരുകൾ എന്നും നീതിയാണ് കാണിച്ചത്. യുഡിഎഫിന്റെ കാലത്ത് ഒരു പോസ്റ്റ് പോലും നഷ്ടപ്പെടുത്തിയില്ല. തന്റെ കാലത്ത് പഴയ ലിസ്റ്റ് റദ്ദാക്കിയിട്ടില്ല. പകരം ലിസ്റ്റ് ഇല്ലെങ്കിൽ കാലാവധി നീട്ടിയിട്ടുണ്ടെന്നും ഉമ്മൻചാണ്ടി പറഞ്ഞു. റാങ്ക് ലിസ്റ്റിലെ മുഴുവൻ പേർക്കും നിയമനം വേണമെന്നും കാലാവധി തീർന്ന ലിസ്റ്റ് പുനരുജ്ജീവിപ്പിക്കണമെന്നും പറഞ്ഞ് നടക്കുന്ന സമരത്തിന് മുന്പിൽ ഒരു മുൻമുഖ്യമന്ത്രി തന്നെ വരുന്നത് ആശ്ചര്യം ഉണ്ടാക്കുന്നെന്നായിരുന്നു ഇന്നലെ മുഖ്യമന്ത്രി പിണറായി വിജയൻ പറഞ്ഞത്.
വ്യക്തിപരമായ ആക്ഷേപത്തിന് മറുപടി പറയില്ല, തന്നെ എന്തുവേണമെങ്കിലും പറയട്ടേയെന്നും ഉമ്മൻചാണ്ടി പറഞ്ഞു. ഇതിലും വലുതായി ആക്ഷേപിക്കുകയും കല്ലെറിയുകയും ചെയ്തിട്ടുള്ളതാണ്, അന്നൊന്നും ഒരു മറുപടിയും പറഞ്ഞിട്ടില്ലെന്നും അദ്ദേഹം പ്രതികരിച്ചു.
