ശ്രീവത്സം ഗ്രൂപ്പുമായി ബന്ധപ്പെട്ട ആരോപണങ്ങള് സിബിഐ അന്വേഷിക്കണമെന്ന് രമേശ് ചെന്നിത്തല
തിരുവനന്തപുരം : ആദായ നികുതി വകുപ്പ് കള്ളപ്പണം പിടികൂടിയ ശ്രീവത്സം ഗ്രൂപ്പുമായി ബന്ധപ്പെട്ട ആരോപണങ്ങളുടെ സത്യാവസ്ഥ പുറത്തു കൊണ്ടുവരണമെന്ന് പ്രതിപക്ഷ നേതാവ് രമേശ് ചെന്നിത്തല. ശ്രീവത്സം ഗ്രൂപ്പുമായി യുഡിഎഫിനും യുഡിഎഫിലെ ഒരു മുന്മന്ത്രിക്കും ബന്ധമുണ്ടെന്ന് ചില കേന്ദ്രങ്ങള് ഉയര്ത്തുന്ന ആരോപണം ദുരീകരിക്കാന് സിബിഐയോ സര്ക്കാര് ഏജന്സികളോ അന്വേഷണം നടത്തണമെന്നാവശ്യപ്പെട്ട് രമേശ് ചെന്നിത്തല മുഖ്യമന്ത്രിക്ക് കത്ത് നല്കി.
സിപിഐ ആലപ്പുഴ ജില്ലാ സെക്രട്ടറി കഴിഞ്ഞ ദിവസം സിപിഐയുടെ നേതാക്കള്ക്ക് ശ്രീവത്സം ഗ്രൂപ്പുമായുള്ള ബന്ധത്തെക്കുറിച്ച് ഉയര്ന്ന ആരോപണങ്ങളില് നിന്ന് രക്ഷപ്പെടുന്നതി യുഡിഎഫിനെതിരെ പുകമറ സൃഷ്ടിക്കുന്ന തരത്തില് അവ്യക്തമായ ആരോപണമാണ് ഉന്നയിച്ചത്. ആരോപണങ്ങൾ മാധ്യമങ്ങളില് വ്യാപകമായി ചര്ച്ച ചെയ്യപ്പെടുന്ന സ്ഥിതിക്ക് ഇതിന്റെ സത്യാവസ്ഥ അറിയാന് ജനങ്ങള്ക്ക് അവകാശമുണ്ട്.
യുഡിഎഫിലെ മുന്മന്ത്രിമാരെയെല്ലാം സംശയത്തിന്റെ നിഴലിലാക്കി രക്ഷപ്പെടാനാണ് സിപിഐയുടെ ശ്രമമെന്ന് കത്തില് രമേശ് ചെന്നിത്തല ആരോപിക്കുന്നു.
ഹരിപ്പാട് മെഡിക്കല് കോളേജുമായി ശ്രീവത്സം ഗ്രൂപ്പിന് ബന്ധമുണ്ടെന്ന ആരോപണവും വസ്തുതാപരമല്ല. യഥാര്ത്ഥ്യവുമായി ഒരു ബന്ധവുമില്ലാതെ യുഡിഎഫിനെ കരിതേച്ച് കാണിക്കാന് കെട്ടിച്ചമച്ചുണ്ടാക്കിയതാണ് ഈ ആരോപണങ്ങള്. ഈ പശ്ചാത്തലത്തില് പൊതുസമൂഹത്തിന് ഉണ്ടായിരിക്കുന്ന സംശയങ്ങള് നീക്കാന് സമഗ്ര അന്വേഷണം ആവശ്യമാണ്. രമേശ് ചെന്നിത്തല മുഖ്യമന്ത്രിയോട് കത്തിലൂടെ ആവശ്യപ്പെട്ടു.
