യുഎസ് വിലക്ക് മറികടന്ന് ചൈനീസ് സൈനിക ഗവേഷണ സ്ഥാപനങ്ങൾ എൻവിഡിയ എഐ ചിപ്പുകൾ സ്വന്തമാക്കിയതായി റിപ്പോർട്ട്; സിഇഒ ജെൻസൻ ഹുവാങ്ങിനെതിരെ പ്രതിഷേധം ശക്തം

ശാരിക

വാഷിംഗ്ടൺ: അമേരിക്കയുടെ കർശനമായ വ്യാപാര വിലക്കുകൾ (Entity List) മറികടന്ന്, ചൈനയിലെ സൈനിക ബന്ധമുള്ള സർവ്വകലാശാലകളും ഗവേഷണ സ്ഥാപനങ്ങളും പ്രാദേശിക വിതരണക്കാർ വഴി എൻവിഡിയയുടെ (Nvidia) അത്യാധുനിക എഐ ചിപ്പുകൾ സ്വന്തമാക്കുന്നതായി റോയിട്ടേഴ്‌സ് അന്വേഷണ റിപ്പോർട്ട്. ചൈനീസ് ചാരവൃത്തിയുമായി ബന്ധപ്പെട്ട വിവാദങ്ങളിൽ എൻവിഡിയ സിഇഒ ജെൻസൻ ഹുവാങ് വാഷിംഗ്ടണിൽ കടുത്ത സമ്മർദ്ദം നേരിടുന്നതിനിടെയാണ് ഈ വിവരങ്ങൾ പുറത്തുവരുന്നത്.

നൂതന എഐ സംവിധാനങ്ങൾ പരിശീലിപ്പിക്കുന്നതിനും പ്രവർത്തിപ്പിക്കുന്നതിനും ഉപയോഗിക്കുന്ന എൻവിഡിയയുടെ കരുത്തുറ്റ H200 ചിപ്പുകൾ യുഎസ് കയറ്റുമതി നിയന്ത്രണങ്ങൾക്ക് വിധേയമാണ്. അമേരിക്ക കരിമ്പട്ടികയിൽ പെടുത്തിയിട്ടുള്ള നോർത്ത് വെസ്റ്റേൺ പോളിടെക്നിക്കൽ സർവ്വകലാശാല പോലുള്ള സ്ഥാപനങ്ങൾക്ക് സാധാരണഗതിയിൽ ഇവയുടെ ലൈസൻസ് നിഷേധിക്കപ്പെടാറാണ് പതിവ്. എന്നാൽ, ചൈനീസ് കമ്പനികളിൽ നിന്ന് കമ്പ്യൂട്ടിംഗ് ശേഷി വാടകയ്‌ക്കെടുക്കുന്ന അഞ്ച് കരാറുകളിലൂടെ ഈ വർഷം H200 ചിപ്പുകളും മറ്റ് ശക്തമായ പ്രോസസറുകളും ഇവർ ഉപയോഗിച്ചതായി രേഖകൾ വ്യക്തമാക്കുന്നു.

വടക്കുപടിഞ്ഞാറൻ നഗരമായ ഷിയാൻ ആസ്ഥാനമായി പ്രവർത്തിക്കുന്ന നോർത്ത് വെസ്റ്റേൺ പോളിടെക്നിക്കൽ സർവ്വകലാശാല സൈനിക വിമാനങ്ങൾ, മിസൈലുകൾ, ഉപഗ്രഹങ്ങൾ എന്നിവയുമായി ബന്ധപ്പെട്ട ഗവേഷണങ്ങളാണ് നടത്തുന്നത്. 2001-ൽ യുഎസ് വാണിജ്യ വകുപ്പ് ഈ സ്ഥാപനത്തെ കരിമ്പട്ടികയിൽ ഉൾപ്പെടുത്തുകയും 2019-ൽ നിയന്ത്രണങ്ങൾ കൂടുതൽ കടുപ്പിക്കുകയും ചെയ്തിരുന്നു. എങ്കിലും, പ്രാദേശിക വിതരണക്കാരിൽ നിന്ന് നേരിട്ട് ചിപ്പുകൾ വാങ്ങിയോ അവയുള്ള സെർവറുകൾ വാടകയ്‌ക്കെടുത്തോ ഇവർ യുഎസ് സാങ്കേതികവിദ്യ സ്വന്തമാക്കുകയാണ്. ചൈനീസ് പ്രതിരോധ മേഖലയുമായി ബന്ധമുള്ള മറ്റ് നിരവധി സ്ഥാപനങ്ങളും സമാനമായ രീതിയിൽ എൻവിഡിയ ചിപ്പുകൾ ഉപയോഗിക്കുന്നതായി 26-ഓളം രേഖകൾ പരിശോധിച്ചതിൽ നിന്ന് വ്യക്തമായിട്ടുണ്ട്.

ചൈനയിലേക്കുള്ള വിൽപ്പന തുടരുന്നത് അമേരിക്കയുടെ സാങ്കേതിക മേധാവിത്വം നിലനിർത്താൻ സഹായിക്കുമെന്നാണ് സിഇഒ ജെൻസൻ ഹുവാങ്ങിന്റെ വാദം. എന്നാൽ, ആയുധ രൂപകൽപ്പനയ്ക്കും സൈനിക നവീകരണത്തിനുമുള്ള എഐ സംവിധാനങ്ങൾ വികസിപ്പിക്കാൻ ചൈനയ്ക്ക് ഇത് വേഗത കൂട്ടുമെന്ന് യുഎസ് നിയമനിർമ്മാതാക്കൾ ആശങ്കപ്പെടുന്നു. ഡൊണാൾഡ് ട്രംപ് ഭരണകൂടം ജനുവരിയിൽ ചില H200 കയറ്റുമതികൾക്ക് ഇളവ് നൽകിയിരുന്നെങ്കിലും കരിമ്പട്ടികയിലുള്ള സ്ഥാപനങ്ങൾക്കുള്ള വിലക്ക് തുടരുകയാണ്. ചിപ്പ് ട്രാക്കിംഗ് ഉൾപ്പെടെയുള്ള കർശന നിയന്ത്രണങ്ങൾ വേണമെന്ന് ഡെമോക്രാറ്റിക്, റിപ്പബ്ലിക്കൻ അംഗങ്ങൾ ഒരുപോലെ ആവശ്യപ്പെടുന്നു.

അതേസമയം, ചൈനീസ് രഹസ്യാന്വേഷണ ഏജൻസിക്ക് വേണ്ടി പ്രവർത്തിക്കുന്നുവെന്ന് ആരോപിക്കപ്പെടുന്ന ആലീസ് ഹുവാങ്ങുമായുള്ള വ്യക്തിബന്ധത്തിന്റെ പേരിൽ ജെൻസൻ ഹുവാങ് കടുത്ത പ്രതിസന്ധിയിലാണ്. ബ്ലാക്ക്‌മെയിലിംഗിനുള്ള സാധ്യത ചൂണ്ടിക്കാട്ടി ഹുവാങ് സിഇഒ സ്ഥാനം രാജിവെക്കണമെന്ന് റിപ്പബ്ലിക്കൻ സെനറ്റർ കെവിൻ ക്രാമർ ആവശ്യപ്പെട്ടു. വിഷയത്തിൽ വിശദീകരണം നൽകാൻ മൂന്ന് റിപ്പബ്ലിക്കൻ കോൺഗ്രസ് കമ്മിറ്റി ചെയർമാൻമാർ നവംബർ 18-ന് ഹുവാങ്ങിനെ വിളിപ്പിച്ചിട്ടുണ്ട്.

ഭാര്യയോട് വിശ്വാസവഞ്ചന കാണിച്ചതായി 63-കാരനായ ജെൻസൻ ഹുവാങ് ഞായറാഴ്ച സമ്മതിച്ചിരുന്നു. എന്നാൽ യുഎസ് ദേശീയ സുരക്ഷയെയോ രഹസ്യ വിവരങ്ങളെയോ ഇത് ബാധിച്ചിട്ടില്ലെന്നാണ് കമ്പനിയുടെ നിലപാട്. സിംഗപ്പൂർ ആസ്ഥാനമായുള്ള ഒരു ഡാറ്റാ സെന്റർ കമ്പനിയിലെ മുൻ എക്സിക്യൂട്ടീവായ ആലീസ് ഹുവാങ്ങുമായുള്ള ബന്ധത്തിലൂടെ വിദേശ ചാരസംഘടന ജെൻസൻ ഹുവാങ്ങിനെ ലക്ഷ്യമിട്ടിരുന്നോ എന്ന് പരിശോധിക്കാൻ എൻവിഡിയ ബോർഡ് സ്വതന്ത്ര അന്വേഷണം പ്രഖ്യാപിച്ചിട്ടുണ്ട്.