അമേരിക്കയിൽ പ്രസിഡന്റിന്റെ അധികാരം വാനോളം; 91 വർഷം പഴക്കമുള്ള വിധി റദ്ദാക്കി സുപ്രീം കോടതി, ഡെമോക്രാറ്റുകൾ പ്രതിരോധത്തിൽ!
ഷീബ വിജയൻ
അമേരിക്കയിലെ സ്വതന്ത്ര ഫെഡറല് ഏജന്സികളുടെ തലവന്മാരെ പദവിയില് നിന്ന് നീക്കാനുള്ള പ്രസിഡന്റ് ഡോണള്ഡ് ട്രംപിന്റെ തീരുമാനത്തെ പൂർണ്ണമായി ശരിവെച്ചുകൊണ്ട് യുഎസ് സുപ്രീം കോടതി ചരിത്രവിധി പുറപ്പെടുവിച്ചു. ഇതോടെ അമേരിക്കൻ പ്രസിഡന്റിന്റെ ഭരണനിര്വ്വഹണ അധികാരം വലിയ തോതില് ശക്തിപ്പെട്ടിരിക്കുകയാണ്. എന്നാല് രാജ്യത്തെ കേന്ദ്ര ബാങ്കായ ഫെഡറല് റിസര്വിനെ മാത്രം കോടതി ഈ പരിധിയില് നിന്ന് താല്ക്കാലികമായി ഒഴിവാക്കിയിട്ടുണ്ട്. ഭവനവായ്പ തട്ടിപ്പ് ആരോപണം ഉന്നയിച്ച് തന്നെ പുറത്താക്കാനുള്ള ട്രംപിന്റെ നീക്കത്തിനെതിരെ നിയമപോരാട്ടം നടത്തുന്ന ഫെഡറല് റിസര്വ് ഗവർണർ ലിസ കുക്കിന് തല്സ്ഥാനത്ത് തുടരാൻ കോടതി അനുമതി നല്കി. നിയമപരമായ നടപടിക്രമങ്ങള് പൂര്ത്തിയാകാതെ അവരെ പുറത്താക്കാനാകില്ലെന്ന് വ്യക്തമാക്കിയ കോടതി, കേന്ദ്ര ബാങ്ക് ഒഴികെയുള്ള മറ്റെല്ലാ ഫെഡറല് ഏജന്സി തലവന്മാരെയും യാതൊരു കാരണവുമില്ലാതെ പുറത്താക്കാൻ പ്രസിഡന്റിന് പൂര്ണ്ണ സ്വാതന്ത്ര്യമുണ്ടെന്ന് അടിവരയിട്ടു. ഏജൻസി തലവന്മാരെ മാറ്റാൻ വ്യക്തമായ കാരണം വേണമെന്ന നിലവിലെ ഫെഡറല് നിയമങ്ങളെയും, 91 വര്ഷം പഴക്കമുള്ള 'ഹംഫ്രീസ് എക്സിക്യൂട്ടര്' (1935) എന്ന മുൻകാല വിധിയെയും മറികടന്നാണ് ആറ് കൺസർവേറ്റീവ് ജഡ്ജിമാരുടെ ഭൂരിപക്ഷത്തോടെ പുതിയ ഉത്തരവ് വന്നിരിക്കുന്നത്. ഭരണഘടനയനുസരിച്ച് എക്സിക്യൂട്ടീവ് അധികാരങ്ങളുടെ തലവന് പ്രസിഡന്റാണെന്ന് ചീഫ് ജസ്റ്റിസ് ജോൺ റോബര്ട്ട്സ് വ്യക്തമാക്കി. ഈ വിധി ഫെഡറല് ട്രേഡ് കമ്മീഷന് (FTC), നാഷണൽ ലേബര് റിലേഷൻസ് ബോര്ഡ് (NLRB) തുടങ്ങിയ സ്വതന്ത്ര ഏജന്സികളില് വൈറ്റ് ഹൗസിന് നേരിട്ട് ഇടപെടാൻ വഴിയൊരുക്കും. ഇതിനെതിരെ പ്രതിപക്ഷമായ ഡെമോക്രാറ്റുകള് കടുത്ത വിമര്ശനവുമായി രംഗത്തെത്തിയിട്ടുണ്ട്.
ASSWSAQWQW
