ഇറാനിലും കടുത്ത ആക്രമണങ്ങൾ : തെഹ്‌റാനിലും പ്രധാന നഗരങ്ങളിലും വൻ സ്ഫോടനങ്ങൾ

ശാരിക I അന്തർദേശീയം

തെഹ്‌റാൻ/വാഷിംഗ്ടൺ: ഇറാനും ഇസ്രായേൽ-അമേരിക്ക സഖ്യവും തമ്മിലുള്ള യുദ്ധം ഒരു മാസം പിന്നിടുമ്പോൾ ഇറാന്റെ തലസ്ഥാനമായ തെഹ്‌റാനിൽ സമാനതകളില്ലാത്ത വ്യോമാക്രമണം റിപ്പോർട്ട് ചെയ്തു. ഇന്ന് പുലർച്ചെ തെഹ്‌റാൻ്റെ കിഴക്ക് മുതൽ പടിഞ്ഞാറ് വരെയും നഗരമധ്യത്തിലും ശക്തമായ സ്ഫോടനങ്ങൾ മുഴങ്ങി. ഇറാന്റെ ചരിത്രത്തിൽ ഇന്നുവരെ ഉണ്ടായിട്ടില്ലാത്ത വിധം തീവ്രമായ ബോംബാക്രമണമാണ് നടക്കുന്നതെന്ന് ദൃക്സാക്ഷികളെ ഉദ്ധരിച്ച് പ്രാദേശിക മാധ്യമങ്ങൾ റിപ്പോർട്ട് ചെയ്തു. തെഹ്‌റാനു പുറമെ അഹ്‌വാസ്, കെർമാൻഷാ, ഷിറാസ്, കരാജ് എന്നീ പ്രമുഖ നഗരങ്ങളിലും ശക്തമായ ആക്രമണങ്ങൾ രേഖപ്പെടുത്തി. അഹ്‌വാസിലുണ്ടായ നാലോളം പ്രബലമായ സ്ഫോടനങ്ങൾ നഗരത്തെ നടുക്കി. ഇറാന്റെ തെക്കൻ മേഖലകളിലും പടിഞ്ഞാറൻ അതിർത്തികളിലും സ്ഫോടന ശബ്ദങ്ങൾ വിറപ്പിച്ചു. അതേസമയം, യമനിൽ നിന്ന് ഇസ്രായേലിലെ നെഗേവ് ലക്ഷ്യമാക്കി മിസൈൽ വർഷമുണ്ടായതായും റിപ്പോർട്ടുകളുണ്ട്. ഡ്രോൺ ഭീഷണിയെത്തുടർന്ന് വടക്കൻ ഇസ്രായേലിൽ അതീവ ജാഗ്രതാ നിർദ്ദേശവും സൈറണുകളും മുഴങ്ങി.

ഇറാനിൽ സൈനിക നടപടി ആരംഭിച്ച ശേഷം ഇതുവരെ 800 വിമാനങ്ങൾ ഉപയോഗിച്ച് 16,000-ത്തിലധികം വെടിക്കോപ്പുകൾ വർഷിച്ചതായി ഇസ്രായേൽ സൈന്യം സ്ഥിരീകരിച്ചു. ആകാശ പ്രതിരോധ സംവിധാനങ്ങൾ, ബാലിസ്റ്റിക് മിസൈൽ വിക്ഷേപണ കേന്ദ്രങ്ങൾ, ആണവ നിലയങ്ങൾ എന്നിവയുൾപ്പെടെ 4,000 ലക്ഷ്യസ്ഥാനങ്ങളിൽ ഇസ്രായേൽ ഇതിനകം ആഞ്ഞടിച്ചു കഴിഞ്ഞു. ആക്രമണങ്ങളിൽ 2,000-ത്തോളം ഇറാനിയൻ സൈനികരും കമാൻഡർമാരും കൊല്ലപ്പെട്ടതായും ഇസ്രായേൽ അവകാശപ്പെട്ടു. ഇറാന്റെ മിസൈലുകൾ ഇനി ഇസ്രായേലിന് അസ്തിത്വപരമായ ഭീഷണിയല്ലെന്ന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു പറഞ്ഞു. ഇറാന്റെ സൈനിക വ്യാവസായിക ശേഷിയെ ഇസ്രായേൽ വ്യോമസേന തകർത്തിട്ടുണ്ടെങ്കിലും യുദ്ധം അവസാനിച്ചതായി പറയാറായിട്ടില്ലെന്ന് അദ്ദേഹം വ്യക്തമാക്കി.

അമേരിക്കൻ പ്രസിഡന്റ് ഡൊണാൾഡ് ട്രംപിന്റെ കണക്കുകൂട്ടൽ പ്രകാരം യുദ്ധം ഉടൻ അവസാനിക്കും. രണ്ടോ മൂന്നോ ആഴ്ചയ്ക്കുള്ളിൽ ഇതിന് പരിസമാപ്തിയുണ്ടായേക്കാം എന്ന സൂചന അദ്ദേഹം നൽകി. ഇറാന്റെ കാര്യത്തിൽ നിർണ്ണായകമായ ഒരു പ്രസംഗം ട്രംപ് ഇന്ന് വൈകുന്നേരം നടത്തുമെന്നും പ്രതീക്ഷിക്കുന്നു. യുഎസ് സ്റ്റേറ്റ് സെക്രട്ടറി മാർക്കോ റൂബിയോയും സമാനമായ രീതിയിൽ യുദ്ധം ഉടൻ അവസാനിക്കുമെന്ന പ്രതീക്ഷ പങ്കുവെച്ചു. മേഖലയിലെ സംഘർഷം കുറയ്ക്കുന്നതിനായി പാകിസ്ഥാൻ നടത്തുന്ന മധ്യസ്ഥ ശ്രമങ്ങളിൽ ചൈനയും പങ്കുചേർന്നിട്ടുണ്ട്. ചർച്ചകളിലൂടെ യുദ്ധം അവസാനിപ്പിക്കാനാണ് മധ്യസ്ഥ രാജ്യങ്ങളുടെ ശ്രമം. ഫെബ്രുവരി 28-ന് ആരംഭിച്ച ഈ യുദ്ധം മിഡിൽ ഈസ്റ്റിനെ മൊത്തത്തിൽ കടുത്ത അസ്ഥിരതയിലേക്ക് തള്ളിവിട്ടിരിക്കുകയാണ്.