യുദ്ധം രൂക്ഷം; ഇറാനിലേയും ഇസ്രയേലിലെയും ഇന്ത്യക്കാരെ ഒഴിപ്പിക്കുന്നു
ഷീബ വിജയൻ
ടെഹ്റാന്: ഇറാന്-ഇസ്രയേല് സംഘര്ഷം രൂക്ഷമായ സാഹചര്യത്തില് ഇരുരാജ്യങ്ങളില് നിന്നും ഇന്ത്യക്കാരെ ഒഴിപ്പിക്കാന് ശ്രമങ്ങള് ആരംഭിച്ചു. ഇന്ത്യന് വിദേശകാര്യമന്ത്രി എസ്. ജയ്ശങ്കര് ഇറാന്, ഇസ്രയേല് വിദേശകാര്യമന്ത്രിമാരുമായി സംസാരിച്ചിരുന്നു. ടെഹ്റാനിലെ ഇന്ത്യന് എംബസി സുരക്ഷാ സാഹചര്യം നിരന്തരം നിരീക്ഷിക്കുകയും ഇറാനിലെ ഇന്ത്യന് വിദ്യാർഥികളുടെ സുരക്ഷ ഉറപ്പാക്കാന് ശ്രദ്ധിക്കുകയും ചെയ്യുന്നുണ്ടെന്ന് അറിയിച്ചു. ഇറാനില് പതിനായിരത്തോളം ഇന്ത്യക്കാരുണ്ടെന്നും അവരില് ആറായിരം പേര് വിദ്യാർഥികളാണ് എന്നുമാണ് വിവരം.
അതേസമയം, ഇന്ത്യന് വിദ്യാർഥികളുടെ സുരക്ഷ ഉറപ്പാക്കാനായി അവരെ ഇറാനില് തന്നെയുളള സുരക്ഷിത കേന്ദ്രങ്ങളിലേക്ക് മാറ്റിപ്പാര്പ്പിക്കുകയാണെന്ന് സര്ക്കാര് അറിയിച്ചിരുന്നു. 600 വിദ്യാർഥികളെ ഖോമിലേക്ക് മാറ്റി. സുരക്ഷാകേന്ദ്രങ്ങളിലെത്തുന്ന ഇന്ത്യന് പൗരന്മാരെ ഇറാന്റെ അതിര്ത്തി രാജ്യങ്ങള് വഴി ഒഴിപ്പിച്ച് ഇന്ത്യയിലെത്തിക്കാനാണ് ആലോചന. ഇവരെ അര്മേനിയയിലേക്കോ അസര്ബൈജാനിലേക്കോ മാറ്റാനും തുടര്ന്ന് ഇന്ത്യയിലേക്ക് കൊണ്ടുവരാനുമാണ് സാധ്യത. ഇറാന് വ്യോമാതിര്ത്തി അടച്ചിട്ടിരിക്കുന്നതിനാല് വിദ്യാർഥികള്ക്ക് കരമാര്ഗത്തിലൂടെ അസര്ബൈജാന്, തുര്ക്ക്മെനിസ്ഥാന്, അഫ്ഗാനിസ്ഥാന് എന്നിവിടങ്ങളിലേക്ക് കടക്കാമെന്ന് ഇറാന് അറിയിച്ചിട്ടുണ്ട്. ഉര്മിയയില് നിന്നുളള 110 വിദ്യാർഥികള് തിങ്കളാഴ്ച വൈകുന്നേരത്തോടെ അര്മേനിയന് അതിര്ത്തിയിലെത്തി. അവരെ വ്യോമ മാര്ഗം ഒഴിപ്പിക്കാനാണ് സാധ്യത. വിദേശകാര്യ മന്ത്രി എസ് ജയ്ശങ്കര് അര്മേനിയന് വിദേശകാര്യ മന്ത്രി അരാരത്ത് മിര്സോയയുമായി സംസാരിച്ചിരുന്നു. ഷിറാസില് നിന്നും ഇസ്ഫഹാനില് നിന്നുമുളള വിദ്യാർഥികളെ യാസ്ദിലേക്ക് മാറ്റുന്നുണ്ടെന്നാണ് വിവരം.
DSFFFDSFA
