മമ്മൂട്ടിയുടെ തമിഴ് ചിത്രം പേരൻന്പ് അന്താരാഷ്ട്ര ചലചിത്രമേളയിലേക്ക്
ശ്രീ രാജലക്ഷി ഫിലിംസിന്റെ ബാനറിൽ മമ്മൂട്ടിയെ നായകനാക്കി റാം സംവിധാനം ചെയ്ത തമിഴ് ചലച്ചിത്രം ‘പേരൻന്പ’് റോട്ടർ‍ഡാം ചലച്ചിത്ര മേളയിലേക്ക്. ജനുവരി 24 മുതൽ ഫെബ്രവരി നാല് വരെ നടക്കുന്ന മേളയുടെ നാൽ‍പ്പത്തിയേഴാം പതിപ്പിൽ ചിത്രം പ്രദർ‍ശിപ്പിക്കുമെന്ന് ഒരു പ്രമുഖ മാധ്യമം റിപ്പോർട്ട് ചെയ്തു. എന്നാൽ ഇത് സംബന്ധിച്ച് ഒദ്യോഗിക വിവരങ്ങളൊന്നും ലഭിച്ചിട്ടില്ല. ‘ഡീപ്പ് ഫോക്കസ്’, ‘പേർ‍സ്‌പെക്റ്റിവ്‌സ്’ ബ്രൈറ്റ് ഫ്യൂച്ചർ’, ‘വോയിസസ്’, എന്നിങ്ങനെ നാല് കാറ്റഗറികളുള്ള മേളയിൽ ഏത് വിഭാഗത്തിലേക്കാണ് ചിത്രം തിരഞ്ഞെടുക്കപ്പെട്ടതെന്ന് വ്യക്തമല്ല. ദേശീയപുരസ്‌ക്കാര ജേതാവായ റാം ആൻഡ്രിയയെ നായികയാക്കി സംവിധാനം ചെയ്ത ‘തരമണി’ എന്ന ചിത്രത്തിന് ശേഷം സംവിധാനം ചെയ്ത പടമാണ് പേരൻന്പ്. വിദേശത്ത ടാക്‌സി ഡ്രൈവറായി ജോലി ചെയ്യുന്ന ആളായാണ് മമ്മൂട്ടി ചിത്രത്തിൽ അഭിനയിക്കുന്നത്. ചിത്രത്തിൽ തമിഴ് നടി അഞ്ജലി, മലയാളിയായ അഞ്ജലി അമീർ, സാധന, സമുദ്രകനി എന്നിവർ പ്രധാന വേഷങ്ങളിൽ അഭിനയിക്കുന്നു. ചിത്രം മലയാളത്തിലും തമിഴിലും ഒരേ സമയം റിലീസ് ചെയ്യും. മലയാളത്തിലെ പേര് ഇതുവരെ തീരുമാനിച്ചിട്ടില്ല. ചിത്രം ഉടൻ തിയേറ്ററുകളിലെത്തും.
