രാജ്യത്ത് ചെമ്മീൻ മത്സ്യബന്ധന നിരോധനം അവസാനിച്ചു
മനാമ : ചെമ്മീൻ പ്രേമികൾക്ക് ഇനി സന്തോഷിക്കാം. മാർച്ച് 15 മുതൽ രാജ്യത്ത് ആരംഭിച്ച ചെമ്മീൻ മൽസ്യബന്ധന നിരോധനം അവസാനിച്ചു. ഇതോടെ ഇന്നുമുതൽ വിപണിയിൽ ചെമ്മീൻ സുലഭമാകും.
നേരത്തെ ആറ് മാസത്തേയ്ക്കാണ് ചെമ്മീൻ മത്സ്യബന്ധന നിരോധനം ഏർപ്പെടുത്തിയതെങ്കിലും നിരോധനം മൂലം പ്രതിസന്ധിയിലായ മത്സ്യത്തൊഴിലാളികളുടെ അഭ്യർത്ഥന പരിഗണിച്ച് ജൂലൈ 10ന് പ്രധാനമന്ത്രി പ്രിൻസ് ഖലീഫ ബിൻ സൽമാൻ അൽ ഖലീഫ ഈ നിരോധനം നാലുമാസമായി കുറയ്ക്കാൻ ഉത്തരവിടുകയായിരുന്നു.
അടുത്ത നിരോധന കാലയളവ് മുതൽ മറ്റ് ജിസിസി രാജ്യങ്ങളുമായി ചേർന്ന് ആവശ്യമായ നടപടിക്രമങ്ങൾ സ്വീകരിക്കാൻ പ്രതിവാര കാബിനറ്റ് സമ്മേളനത്തിൽ പ്രധാനമന്ത്രി അധികാരികൾക്ക് നിർദ്ദേശം നൽകി.
