സൗദിക്കെതിരെയുള്ള ഹൂതി ആക്രമണത്തെ അപലപിച്ച യു.എൻ പ്രസ്താവനയെ സ്വാഗതം ചെയ്ത് ബഹ്റൈൻ
പ്രദീപ് പുറവങ്കര
മനാമ: സൗദി അറേബ്യക്കും വാണിജ്യ കപ്പലുകൾക്കും നേരെ ഇറാൻ പിന്തുണയുള്ള ഹൂതി മിലിഷ്യ നടത്തുന്ന മിസൈൽ ആക്രമണങ്ങളെ ശക്തമായി അപലപിച്ചുകൊണ്ട് ഐക്യരാഷ്ട്രസഭാ രക്ഷാസമിതി പുറപ്പെടുവിച്ച പ്രസ്താവനയെ സ്വാഗതം ചെയ്ത് ബഹ്റൈൻ. സൗദി അറേബ്യയുടെ സുരക്ഷയും സ്ഥിരതയും സുപ്രധാന താൽപ്പര്യങ്ങളും സംരക്ഷിക്കുന്നതിനായി രാജ്യം കൈക്കൊള്ളുന്ന എല്ലാ നടപടികൾക്കും ബഹ്റൈന്റെ പൂർണ്ണ പിന്തുണയും ഐക്യദാർഢ്യവും വിദേശകാര്യ മന്ത്രാലയം വ്യക്തമാക്കി.
സൗദി അറേബ്യയുടെ സുരക്ഷയും സ്ഥിരതയും ബഹ്റൈന്റെയും മറ്റ് ജി.സി.സി (GCC) രാജ്യങ്ങളുടെയും സുരക്ഷയുടെ അവിഭാജ്യ ഘടകമാണെന്ന് മന്ത്രാലയം വ്യക്തമാക്കി. ഇരു രാജ്യങ്ങളും തമ്മിലുള്ള ദീർഘകാല ബന്ധവും ജി.സി.സി സംയുക്ത പ്രതിരോധ കരാറും (GCC Joint Defence Agreement) ചൂണ്ടിക്കാണിച്ചാണ് വിദേശകാര്യ മന്ത്രാലയം ഇക്കാര്യം വ്യക്തമാക്കിയത്.
കൂടാതെ, യെമനിൽ സൗദി അറേബ്യ നടത്തുന്ന നയതന്ത്ര, ജീവകാരുണ്യ, വികസന പ്രവർത്തനങ്ങളെയും ബഹ്റൈൻ പ്രശംസിച്ചു. സമുദ്ര സുരക്ഷ ശക്തിപ്പെടുത്തുന്നതിലും അന്താരാഷ്ട്ര വ്യാപാരം സംരക്ഷിക്കുന്നതിലും ആഗോള ഊർജ്ജ വിതരണം സുരക്ഷിതമാക്കുന്നതിലും സൗദി വഹിക്കുന്ന പങ്കിനെയും ബഹ്റൈൻ അഭിനന്ദിച്ചു.
asdads
