ബഹ്റൈൻ ഭരണാധികാരികൾക്ക് ഐക്യദാർഢ്യം പ്രഖ്യാപിച്ച് ഐ.സി.ആർ.എഫ്; 'ലോയൽറ്റി പ്ലെഡ്ജ്' ഒപ്പുവെക്കൽ ചടങ്ങ് സംഘടിപ്പിച്ചു
പ്രദീപ് പുറവങ്കര
മനാമ: ഇന്ത്യൻ കമ്മ്യൂണിറ്റി വെൽഫെയർ അസോസിയേഷൻ (ഐ.സി.ആർ.എഫ് - ICRF ബഹ്റൈൻ) തൊഴിലാളി ദിനാഘോഷങ്ങളുടെയും 'സമ്മർ ഫെസ്റ്റ് 2026'ന്റെയും ഭാഗമായി ബഹ്റൈൻ ഇന്ത്യൻ ക്ലബ്ബിൽ വെച്ച് സവിശേഷമായ “ലോയൽറ്റി പ്ലെഡ്ജ്” (ഐക്യദാർഢ്യ പ്രതിജ്ഞ) ഒപ്പുവെക്കൽ ചടങ്ങ് സംഘടിപ്പിച്ചു.
ഈ പരിപാടിയിലൂടെ ബഹ്റൈനിലെ ഇന്ത്യൻ സമൂഹം ബഹ്റൈൻ രാജാവ് ഹിസ് മജസ്റ്റി കിംഗ് ഹമദ് ബിൻ ഈസ അൽ ഖലീഫയ്ക്കും, കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനെസ് പ്രിൻസ് സൽമാൻ ബിൻ ഹമദ് അൽ ഖലീഫയ്ക്കും ബഹ്റൈൻ സർക്കാരിനുമുള്ള തങ്ങളുടെ അചഞ്ചലമായ പിന്തുണയും വിശ്വസ്തതയും വീണ്ടും പ്രഖ്യാപിച്ചു. ഐ.സി.ആർ.എഫ് ചെയർമാൻ അഡ്വ. വി. കെ. തോമസ് ചടങ്ങ് ഉദ്ഘാടനം ചെയ്തു.
ലേബർ മാർക്കറ്റ് റെഗുലേറ്ററി അതോറിറ്റി (LMRA) പാർട്ണർഷിപ്പ്സ് ആൻഡ് ഔട്ട്റീച്ച് ഡയറക്ടർ ഫഹദ് അബ്ദുൽ അസീസ് അൽ ബിൻ അലി, തൊഴിൽ മന്ത്രാലയത്തിലെ സീനിയർ ഒക്ക്യുപേഷണൽ സേഫ്റ്റി എഞ്ചിനീയർ ഹുസൈൻ അൽ ഹുസൈനി, LMRA പ്രതിനിധി ഷൈഖ അൽമുല്ല എന്നിവർ ചടങ്ങിൽ മുഖ്യാതിഥികളായിരുന്നു. ഐ.സി.ആർ.എഫ് എക്സിക്യൂട്ടീവ് കമ്മിറ്റി അംഗങ്ങൾ, സന്നദ്ധ പ്രവർത്തകർ, അഭ്യുദയകാംക്ഷികൾ എന്നിവർക്കൊപ്പം ബഹ്റൈനിലെ വിവിധ ലേബർ ക്യാമ്പുകളിൽ നിന്നുള്ള 400-ലധികം തൊഴിലാളികളും ചടങ്ങിൽ സന്നിഹിതരായിരുന്നു.
രാജ്യത്തിന്റെ സുരക്ഷയും സമാധാനവും സ്ഥിരതയും ജനങ്ങളുടെയും പ്രവാസികളുടെയും ക്ഷേമവും ഉറപ്പാക്കുന്നതിനായി ബഹ്റൈൻ ഭരണാധികാരികളും സർക്കാരും സ്വീകരിച്ച നടപടികൾക്ക് ഇന്ത്യൻ സമൂഹം ഹൃദയംഗമമായ നന്ദി രേഖപ്പെടുത്തി. നിരവധി പതിറ്റാണ്ടുകളായി ആയിരക്കണക്കിന് ഇന്ത്യക്കാർക്ക് സ്വന്തം നാടുപോലെ അഭയം നൽകിയ ബഹ്റൈൻ രാജ്യത്തോടുള്ള ആദരവും പ്രതിബദ്ധതയും അടിവരയിടുന്നതായിരുന്നു ഈ ചടങ്ങ്. ഇന്ത്യൻ സമൂഹവും ബഹ്റൈനും തമ്മിലുള്ള സൗഹൃദത്തിന്റെയും പരസ്പര ബഹുമാനത്തിന്റെയും ശക്തമായ ബന്ധത്തിന്റെ പ്രതിഫലനമാണ് ഈ പരിപാടിയെന്ന് ഐ.സി.ആർ.എഫ് ഭാരവാഹികൾ അറിയിച്ചു.
പരിപാടി വൻ വിജയമാക്കാൻ സഹകരിച്ച എൽ.എം.ആർ.എ (LMRA), തൊഴിൽ മന്ത്രാലയം, ഇന്ത്യൻ ക്ലബ് അധികൃതർ, ലേബർ ക്യാമ്പ് പ്രതിനിധികൾ, സന്നദ്ധ പ്രവർത്തകർ എന്നിവർക്ക് ഐ.സി.ആർ.എഫ് നന്ദി അറിയിച്ചു.
dfsf
